ރައީސް ޔާމީން މިނިވަން ކުރުމަށް ގޮވާލާ އިދިކޮޅު ލީޑަރުން ޖުމްހޫރީ މައިދާނުގައި
އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލާ އެ އިއްތިހާދުގެ ލީޑަރުން ޖުމްހޫރީ މައިދާނަށް އެއްވެއްޖެއެވެ.
ޖުމްހޫރީ މައިދާނުގައި ހަރަކާތްތެރިވަމުންދާ ލީޑަރުންގެ ތެރޭގައި ޕީޕީއެމްގެ ނައިބު ރައީސް އަދި މަޖިލިހުގެ ނައިފަރު ދާއިރާގެ މެންބަރު އަހުމަދު ޝިޔާމް، ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު، ޕީއެންސީގެ ނައިބު މަޑުއްވަރީ ދާއިރާގެ މެންބަރު އާދަމް ޝަރީފާއި މާވަށު ދާއިރާގެ މެންބަރު މުހައްމަދު ސައީދް ހިމެނެއެވެ.
ރައީސް ޔާމީން 11 އަހަރަށް ޖަލަށްލުމާ ގުޅިގެން އިދިކޮޅުން އަންނަނީ ކޮންމެ ރެއަކު މާލޭގައި އެއްވުންތައް ބާއްވަމުންނެވެ.
އިދިކޮޅު ޕީޕީއެމް، ޕީއެންސީން އަންނަނީ އެ ޕާޓީގެ ރިޔާސީ ކެންޑިޑޭޓަކީ، ރައީސް ޔާމީން ކަމަށް ތަކުރާރުކޮށް ބުނަމުންނެވެ. އެހެންނަމަވެސް 11 އަހަރުގެ ޖަލު ހުކުމެއްގައި އެމަނިކުފާނު ހުންނެވި އިރު، ޖަލު ހުކުމެއް އޮތްހާ ހިނދަކު ކެންޑިޑެންސީ ބަލައިނުގަންނާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީީގު ވަނީ ވިދާޅުވެފައެވެ.
