ރައީސް ޞާލިޙް ފުވައްމުލަކަށް ވަޑައިގަން މަންޒަރު ފެނިފައި ހީވީ ޖަންގައްޔެއްގައި ހިނގަމުންދާ ދާހިލީ ބޮޑު ހަމަނުޖެހުމެއްގެ ފޮޓޯ ކަމަށް: ރައީސް ނަޝީދު

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ފުވައްމުލަކަށް ވަޑައިގަން މަންޒަރު ފެނިފައި ހީވީ ޖަންގައްޔެއްގައި ހިނގަމުންދާ ދާހިލީ ބޮޑު ހަމަނުޖެހުމެއްގެ ފޮޓޯ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

Ads by STELCO

ރިޔާސީ އިންތިހާބުގެ ކެމްޕެއިނަށް އައްޑޫ އަތޮޅަށް ވަޑައިގެން ބޭއްވި ޖަލްސާއެއްގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ ފުވައްމުލަކުން މިހާރު ފެނިގެންދަނީ ހަމަނުޖެހުން ހިންގާ މަންޒަރު ކަމަށެވެ.

ރައީސް ނަަޝީދު މިފަދައިން ވިދާޅުވީ ރައީސް ޞާލިޙް ފުވައްމުލަކަށް ވަޑައިގެން ރޭ ކުރިއަށްގެންދިޔަ އެމްޑީޕީގެ އުފާވެރި އަމާން ރާއްޖެ ޖަލްސާ ނިންމާލި ވަގުތު އެ ސަރަހައްދުގައި ތިބި އެސްއޯ ފުލުުހުންނާ ދިމާލަށް ގާ އުކައި ހަމަނުޖެހުން ހިންގުމާއި ގުޅިގެންނެވެ.

މިކަމާއި ގުޅިގެން ރައީސް ނަޝީދު ވިދާޅުވީ އެ މަންޒަރު ފެނިފައި ހީވީ ޖަންގައްޔެއްގައި ދާހިލީ ބޮޑު ހަމަނުޖެހުމެއްގެ ފޮޓޯތައް ކަމަށެވެ. އަދި ފެނިގެން ދިޔައީ ފިލްމުތަކުން ފެންނަ ކަހަލަ މަންޒަރުތައް ކަމަށް ރައީސް ނަޝީދު ވިދާޅުވިއެވެ.

“ރައީސުލްޖުމްހޫރިއްޔާ ފުވައްމުލަކަށް ވަޑައިގަން މަންޒަރު ފެނިފައި ހީވީ ކޮންމެސް ޖަންގައްޔެއްގައި ހިނގަމުންދާ ދާހިލީ ބޮޑު ހަމަނުޖެހުމެއްގެ ފޮޓޯ ކަމަށް. އެބަފެނޭ ފިލްމުތަކުން ޓާކޫރުންގެ ބަޔަކު ނުވަތަ ނުބައިބައި ބަޔަކު ޖަންގައްޔަށް ވަދެ ރައްޔިތުން އެތަން މިތަނަށް އެކާތަން” ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އެއީ ދެކެން ބޭނުންވާ މަންޒަރެއް ނޫން ކަމަށެވެ. އަދި ޚިޔާލު ފައުޅުކުރުމާއި، އެއްވެ އުޅުމުގެ މިނިވަންކަމަކީ ރައްޔިތުންނަށް ލިބިދީފައިވާ އަސާސީ ހައްޤެއްް ކަމަށް ވިދާޅުވިއެވެ.

މައިލޯ ސްޓޭޑިއަމްގައި ރޭ ކުރިއަށްދިޔަ އެމްޑީޕީ ކެމްޕެއިން ބޮޑު ޖަލްސާ ކުރިއަށްދިޔަ ވަގުތު އިދިކޮޅު ޕީޕީއެމުން އެސަރަހައްދަށް އެއްވެ، ދިޔައީ އަޑުގަދަކުރަމުންނެވެ. އަދި ޖަލްސާ ނިމުނު ވަގުތު އެ ސަރަަހައްދުގައި ސެކިއުރިޓީ ބަލަހައްޓަން ތިބި އެސް އޯ ފުލުހުންނާ ދިމާލަށް ގާއުކައި ހަމަނުޖެހުން ހިންގާފައިވާ އިރު، ތިން މީހަކަށް އެކިވަރުގެ އަނިޔާވެ ހޮސްޕިޓަލަށްވެސް ވަނީ ގެންގޮސްފައެވެ.