މި 5 އަހަރު ނިމިގެން މިދަނީ އެއްވެސް ނޫސްވެރިޔަކު ޖަލަށް ނުލާ: ރައީސް ޞާލިޙް

މި 5 އަހަރު ނިމިގެން މިދަނީ އެއްވެސް ނޫސްވެރިޔަކު ޖަލަށް ނުލާ ކަމަށް ރައީސުލްޖުމްހޫރިްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

Ads by MWSC

ރިޔާސީ އިންތިހާބުގެ ކެމްޕެއިނަށް ށ. ނިލަންދޫއަށް ވަޑައިގެން މިރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ޞާލިޙް ވިދާޅުވީ މި ފަސް އަހަރު ނިމިގެން މިދަނީ އެއްވެސް ނޫސްވެރިޔަކު ޖަލަށް ނުލާ، ކުއްލި ނުރައްކަލުގެ ހާލަތު ވެސް  އިޢުލާން ނުކޮށް ކަމަށެވެ. އެހެންނަމަވެސް ތަރައްޤީގެ މަޝްރޫޢުތައް ކުރިއަށްދާ ކަމަށެވެ.

“މި ފަސް އަހަރު ނިމިގެންދަނީ، އެއްވެސް މީހަކު، އެއްވެސް މީހަކު ސިޔާސީ ބޭނުމަކު ހައްޔަރެއް ނުކުރޭ. ނޫސްވެރިޔަކު ޖަލަކަށްނުލާ. ކުއްލި ނުރައްކަލުގެ ހާލަތު އިއުލާނު ކުރާކަށްނުޖެހޭ. އެހެންނަމަވެސް ތަރައްގީގެ މަޝްރޫއުތައް މި ދަނީ ބާރަށް” ރައީސް ޞާލިޙް ވިދާޅުވިއެވެ.

މީގެ އިތުރުން އެންމެ މުހިންމު އަމާޒަކީ ފެށި މަސައްކަތްތައް ނިންމުން ކަމަށާއި މިހާތަނަށް ކުރެވުނު މަސައްކަތްތަކުން ރާއްޖެއަށް ހެޔޮ ބަދަލެއް އައިސްފައިވާ ކަމަށް ރައީސް ޞާލިޙް ވިދާޅުވިއެވެ. “އޭގެ ތެރެއިން އެންމެ މުހިންމު ކަމަކީ އިގްތިސާދު ދެ ގުނަ ކޮށްދިނުން” ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ އެންމެ މުހިންމު ކަމަކީ ހަމަޖެހުމާއި ސުލްހަވެރިކަމާއި ސިޔާސީ ހަމަނުޖެހުމުން އެއްކިބާވެ ތިބެ، ރާއްޖޭގެ ތަރައްގީއަށް މަސައްކަތްކުރަން ފުރުސަތު ލިބުން ކަމަށެވެ. އަދި ރައްޔިތުން ބޭނުންވެފައި ތިބި އަސާސީ ހައްގުތައް ފޯރުކޮށްދިނުމަށްޓަކައި ގިނަ މަސައްކަތްތަކެއް ކުރެވެމުންދާ ކަމަށް ރައީސް ޞާލިޙް ވިދާޅުވިއެވެ.