ދަރިކަލުންވެސް ވިދާޅުވީ ޔާމީން ނެތްނަމަ ޕީޕީއެމްއިން ކެނޑިޑޭޓެއް ނެރޭނެކަމަށް

ޕީޕީއެމްގެ ރިޔާސީ ކެނޑިޑޭޓު ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަނުކުރެއްވޭ ހާލަތެއް މެދުވެރިވެއްޖެނަމަ ދެވަނަ ޗޮއިސްއަކީ ޕީޕީއެމްއިން ކަނޑައަޅާ ކެނޑިޑޭޓެއްކަމަށް ރައީސް ޔާމީންގެ ދަރިކަލުން ޒެއިން އަބްދުﷲ ޔާމީން ވިދާޅުވެއްޖެ އެވެ.

Ads by STELCO

އަންނަ މަހު 9 ގައި ބާއްވަން ހަމަޖެހިފައިވާ ރިޔާސީ އިންތިހާބުގައި ރައީސް ޔާމީން ވާދަކުރުމާއިމެދު ގޮތެއް ނިންމަން ސުޕްރީމް ކޯޓުގައި އިއްޔެ ވަނީ މައްސަލައެއް ކުރިއަށް ގެންގޮސްފަ އެވެ. 7 ގަޑިއިރަށް ދިގު ދެމިގެންދިޔަ މި އަޑުއެހުމަށްފަހު ދެން އޮންނާނީ ނިޔާ ކަނޑައެޅުމެވެ.

އަޑުއެހުމުން ނިކުމެވަޑައިގެން ޒެއިން ވިދާޅުވީ ރައީސް ޔާމީނަށް ވާދަކުރެއްވޭނެކަމުގެ ފުރިހަމަ ޔަގީންކަން އެބަ އޮތް ކަމަށެވެ. އެހެންނަމަވެސް އެކަން އެގޮތަށް ނުވެއްޖެނަމަ ޕީޕިއެމްއިން އެހެން ކެނޑިޑޭޓެއް އިންތިހާބުގައި ވާދަކުރައްވާނެކަމަށް ޒެއިން ވިދާޅުވި އެވެ.

ޒެއިން ގަބޫލު ކުރައްވާ ގޮތުގައި އިންތިހާބުގެ ފުރަތަމަ ބުރުގައި ޕީޕިއެމް ކެނޑިޑޭޓާއިއެކު ޕީއެންސީގެ ކެނޑިޑޭޓުވެސް ވާދަކުރައްވާނެ އެވެ. އެހެންކަމުން އޭނާ ތާއިދު ކުރައްވާނެ ކެނޑިޑޭޓަކު އަދި ނިންމާފައި ނުވާކަން ފާހަގަކުރެއްވި އެވެ.

ރައީސް ޔާމީނަށް ވާދަ ނުކުރެއްވޭ ހާލަތެއްގައި ޕީއެންސީން ވާދަކުރާނީ މާލެ ސިޓީގެ މޭޔަރު ޑރ. މުހައްމަދު މުއިއްޒު އެވެ. އެހެންނަމަވެސް އިދިކޮޅުގެ ލީޑަޝިޕުން ބަރޯސާވަނީ އެހާލަތުގައި ނެރޭނެ ޕީޕީއެމްގެ ކެނޑިޑޭޓަކަށެވެ. އެކަމަށް ވަކި ނަމެއް އަދި ފެންމަތިކޮށްފައި ނުވެ އެވެ.

ރިޔާސީ އިންތިހާބަށް ނަން ހުށަހެޅުމުގެ ސުންގަޑިއަކީ މިމަހު 7 ވަނަ ދުވަހެވެ. ބާކީ ދެ ދުވަސް އޮތްއިރު ބެލެވޭ ގޮތުގައި ރައީސް ޔާމީންގެ ކެނޑިޑެސީއާ ގުޅޭގޮތުން މިއަދު ނުވަތަ މާދަމާ ސުޕްރީމް ކޯޓުން ވަކި ގޮތެއް ނިންމާނެ އެވެ.