ރައީސް ނަޝީދު ރައީސް ޞާލިޙަށް: ކެމްޕެއިނަށް ރަށްރަށަށް ވަޑައިގަންނަވާއިރު ފުލުހުން ފޮނުވާ ހެދުމުން ރައްޔިތުންގެ ރުޅިވެރިކަން ވާނީ ބޮޑު
އަންނަ މަހުގެ 9 ވަނަ ދުވަހު ބާއްވާ ރިޔާސީ އިންތިހާބުގެ ކެމްޕެއިނަށް ރަށްރަށަށް ވަޑައިގަންނަވާއިރު ފުލުހުން ފޮނުވާ ހެދުމުން ރައްޔިތުންގެ ރުޅިވެރިކަން ވާނީ ބޮޑު ކަމަށް އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ ކަމްޕެއިންގައި ރަށްރަށަށް ވަޑައިގަންނަވާއިރު ފުލުހުން ފޮނުވާ ހެދުމުން ރައްޔިތުންގެ ރުޅިވެރިކަން ބޮޑުވާނެކަން ރައީސް އިބްރާހީމް މުޙައްމަދު ޞާލިޙަށް އިނގޭން ޖެހޭނެ ކަމަށެވެ.
ރައީސް ނަޝީދު މިފަދައިން ވިދާޅުވެފައިވާއިރު ރައީސް ޞާލިޙް ކެމްޕޭނު ދަތުރުގައި ގދ. މަޑަވެއްޔަށް ވަޑައިގެން އެ ރަށުގައި ޖަލްސާ ބާއްވަން ތައްޔާރުކޮށްފައިވާ ތަނުގައި ރޭ ބަޔަކު ވަނީ ހުޅުޖަހާފައެވެ. މިކަމާއި ގުޅިގެން ރައީސް ނަޝީދު ވިދާޅުވީ އިންތިހާބާއި ގުޅުވައި މީހުން ހައްޔަރުކޮށް ތަންތަން ރޯކޮށް މުދަލަށް ގެއްލުން ދީގެން ނުވާނެކަމަށެވެ.
މި މައްސަލަ ފެންމަތިވެފައިވާއިރު ދަ ޑިމޮކްރެޓްސްގެ އިންޓެރިމް ކައުންސިލްގެ މެމްބަރު އަހްމަދު މައުރޫފް ވަނީ ރޭގެ ވަގުތެއްގައި ދ. ކުޑަހުވަދޫއިން ހައްޔަރުކޮށްފައެވެ.
Ads by STO
