ޤާސިމްގެ ވެރިކަމެއްގައި އާސަންދައިގެ ނިޒާމު ހަރުދަނާކުރާނެ: އިރުތިޝާމް
ޖުމްހޫރީ ޕާޓީ (ޖޭޕީ) ގެ ރިޔާސީ ކެނޑިޑޭޓް ޤާސިމް އިބްރާހީމްގެ ރިޔާސީ މެނިފެސްޓޯގައި "އޯގާތެރި ޒަމާނީ ސިއްޙީ ފަރުވާ" ސިޔާސަތުގެ ދަށުން އެންމެ މުހިއްމުކަމެއްގެ ގޮތުން ކުރައްވާނީ އާސަންދައިގެ ނިޒާމް ހަރުދަނާކުރުންކަމުގައި ވިދާޅުވެއްޖެއެވެ.
ޤާސިމްގެ މެނިފެސްޓޯގެ ތެރެގައި ހިމެނޭ ސިއްޙީ ޚިދުމަތުގެ މަޢުލޫމާތު ދިނުމަށް ރޭ ބޭއްވި ފޯރަމުގައި ވާހަކަދައްކަވަމުން ކުރީގެ ހެލްތު މިނިސްޓަރު އިރުތިޝާމް އާދަމް ވިދާޅުވީ، މި ސިޔާސަތުގެ ސަބަބުން ސިއްޙީ ޚިދުމަތަށް އިންޤިލާބީ ބޮޑު ބަދަލެއް އަންނާނެކަމަށެވެ.
އޯގާތެރި ޒަމާނީ ސިއްޙީ ފަރުވާގެ ސިޔާސަތުގެ ތެރޭގައި ހިމެނެ އެހެނިހެން ބައެއް ބައިތައް:
- ތެލެސީމިއާ ކުދިންނަށް ފަސޭހަކަމާއެކު ލޭ އެޅުމުގެ އިންތިޒާމް ހަމަޖައްސައިދިނުމާއެކު، ޚާއްސަ އިނާޔަތެއް ދިނުން
- ޕެރެމެޑިކްސް އަދި އެންބިއުލަންސްގެ ޚިދުމަތް ވިއުގައެއް ޤައުމީ ފެންވަރެއްގައި ޤާއިމްކުރުން
- ރާއްޖޭގެ ހަތް ސަރަހައްދެއްގައި ޓާޝަރީ ހޮސްޕިޓަލެއް އެޅުން
- އުމުރުން 50 އަހަރުން މަތީގެ މީހުނަށް އަހަރަކު އެއްފަހަރު ހެލްތު ސްކްރީނިން
- އުމުރުން 40 އަހަރުން މަތީގެ އަންހެނުންނަށް އަހަރަކު އެއްފަހަރު ސާވިކަލް އަދި އުރަމަތީގެ ސްކްރީނިން
- ޤައުމީ މެންޓަލް ހެލްތު ޕްރޮގްރާމް
- ކްރޫޒިންގ ހޮސްޕިޓަލް
މީގެ ތެރޭގައިވެސް އެންމެ ޚާއްސަކަމެއްގެ ގޮތުގައި ފާހަގަކުރެވިފައިވަނީ އާޓިފިޝަލް އިންޓަލިޖަންސް ބޭނުންކޮށްގެން، ޒަމާނީ ފެންވަރުގެ ސިއްޙީ ނިޒާމެއް ޤާއިމްކުރުމެވެ.
އަންނަ މަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރައްވާ ޤާސިމްގެ މެނިފެސްޓޯގެ ސިޔާސަތުތައް އެކި ޖަލްސާތަކުގައި ދަނީ އިފްތިތާޙްކުރަމުންނެވެ. ރޭ ބޭއްވި ޖަލްސާގައި ވާހަކަ ދައްކަވަމުން އިރުތިޝާމް އިތުރަށް ވިދާޅުވީ، އާސަންދަ ހިންގުމުގައި ކޮރަޕްޝަންގެ މައްސަލަތައް އިންތިހާއަށް ބޮޑުވެފައިވާކަމަށާއި ރައްޔިތުންނަށް އެ ޚިދުމަތް ދިނުމުގައި ހަމަހަމަކަން ނެތިފައިވާކަމަށެވެ. އަދި ޤާސިމްގެ ވެރިކަމެއްގައި މި ނިޒާމް ހިންގުމުގައި ހުރި އެންމެހައި މައްސަލަތައް ހައްލުކުރުމީ އެންމެ އިސްކަމެއް ދެއްވައިގެން ކުރާނެކަމެއް ކަމަށެވެ.
"ސިއްޙީ ނިޒާމަކީ ރައްޔިތުންނަށް އިތުބާރު ކުރެވޭ ފަދަ ޚިދުމަތަކަށް ވެސް ވާން ޖެހޭ"
މިއަހަރުގެ އިންތިޚާބަށް ޤާސިމް އިޢުލާންކުރައްވާފައިވާ މެނިފެސްޓޯގައި މައިގަނޑު 15 ދާއިރާއަކަށް އަލިއަޅުވާލާފައިވެއެވެ. މި މެނިފެސްޓޯ އަކީ ރާއްޖެ ތަހުޒީބުގެ އާ މަންޒިލަކަށް ގެންގޮސްދޭނެ މެނިފެސްޓޯއެއްކަމަށް ޖޭޕީން މަޢުލޫމާތުދީފައިވެއެވެ.
ޚާއްސަ ގޮތެއްގައި މި މެނިފެސްޓޯއަކީ އުފެއްދުންތެރިކަން އިތުރު ކުރުމާއި، ރާއްޖޭގެ ދަރަނީގެ ނިސްބަތާއި ހިންގުމުގެ ޚަރަދު ކުޑަކޮށް ގިނަ މައްސަލަތަކަކަށް ޙައްލު ހޯދައިދެވޭނެ ފަދަ މެނިފެސްޓޯއެއްކަމަށް އެ ޕާޓީން މަޢުލޫމާތުދީފައިވެއެވެ.
