ދިރާސީ އާއަހަރާއި ބޮޑު ޗުއްޓީ ކުރިން އޮތްގޮތަށް ބަދަލުކުރާނަން: މުއިއްޒު

ދިރާސީ އާ އަހަރަށް މި ސަރުކާރުން ގެނައި ބަދަލާއި ގުޅިގެން ބެލެނިވެރިންނާއި އާންމުން އެކަން ބަލައިނުގަންނާތީ، ކުރީގައި އޮތް ގޮތަށް ދިރާސީ އާ އަހަރާއި ބޮޑު ޗުއްޓީ ބަދަލުކުރައްވާނެކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.

Ads by Hajj Corporation

ޕީއެންސީގެ ރިޔާސީ އިންތިހާބުގެ ކެމްޕެއިނަށް ވ، މ، ފ އަދި ދ. އަތޮޅުގެ ރަށްތަކަށް ކުރައްވާ ދަތުރުފުޅުގައި އެ އަތޮޅު ކުޑަހުވަދޫއަށް ވަޑައިގެން މުއިއްޒު ވިދާޅުވީ، އެ ރަށުގެ ބަނދަރު ސަރަހައްދުގައި މި ސަރުކާރުން ކަންކަން ނިންމަނީ އާންމުންގެ ހިޔާލު ނުހޯދައި އުނދަގޫވާނެ ގޮތްގޮތަށް ކަމަށާއި، ސްކޫލްތަކުގެ ބޮޑު ޗުއްޓީ ޖޫން/ޖުލައި މަހަށް ބަދަލުކުރުމަކީ ވެސް އެ ގޮތަށް ނިންމި ނިންމުމެއް ކަމަށެވެ.

"އަނެއް ކަމަކީ [ބޮޑު ޗުއްޓީގެ ތެރެއިން] ޖުލައި 26 އާދޭ. ޖުލައި 26 އައުމުން ސްކޫލްތަކުން މިނިވަން ދުވަހުގެ ކުޅިވަރުތަކުގައި ބައިވެރިވާ ހުރިހާ ދަރިވަރުން އެކަމުގައި ޝާމިލުވާން އެބަ މަޑުކުރަން ޖެހޭ. އެހެންވީމާ، ބޮޑު ބަންދުގެ ބޮޑު ބައެއް އެބަ ގެއްލޭ ޕްރެކްޓިސް ކުރުމަށް މަޑުކުރަން ޖެހިގެން ވެސް،...މިފަދަ އެތައް ކަމެއް ވެގެން ވަރަށް ގިނަ ބެލެނިވެރިން، ވަރަށް ގިނަ އާއިލާތަކުން އެކަމާ ކަންބޮޑުވުން ފާޅުކޮށް ސަރުކާރަށް ތަކުރާރުކޮށް، އެ ބަދަލު ގެނައީއްސުރެ މި އަންނަނީ އެކަން ހުށަހަޅަމުން" މުއިއްޒު ވިދާޅުވި އެވެ.

ބޮޑު ޗުއްޓީ އަށް މި ސަރުކާރުން ގެނައި ބަދަލާއެކު އެ ދުވަސްތައް އަހަރުގެ މެދަށް ދިމާވާއިރު، އެއީ ހުޅަނގު މޫސުމުގެ ވިއްސާރަވެސް އާންމުކޮށް ކުރާ ދުވަސްވަރެކެވެ. އެހެންކަމުން އަބަދުވެސް އެ ދުވަސްވަރަކީ ދަތުރުކޮށް އެއްތަނުން އަނެއްތަނަށް ދާންވެސް އުދަނގޫ ދުވަސްވަރަކަށްވާތީ، ބެލެނިވެރިންނާއި ދަރިވަރުންނަށް ޗުއްޓީ ރަނގަޅަށް ހޭދަނުކުރެވޭކަމަށް ބުނެ ވަރަށް ގިނަ މީހުން ޝަކުވާކުރެއެވެ.

ސަރުކާރުން އެ ބަދަލު ގެނައީ ޓޫރިޒަމްގެ ދާއިރާގައި މަސައްކަތްކުރާ މުވައްޒަފުންނާ މެދުގައި ވިސްނައިގެން ކަމަށް ބުނި ނަމަވެސް، އެ ދާއިރާގައި އުޅޭ މީހުންނަށް ވެސް މި ބަދަލުން އެއްވެސް ފައިދާއެއް ނުކުރާކަމަށާއި މިއީ އާންމުން ބޭނުންވި ބަދަލަކަށް ނުވި ކަމަށް ފާހަގަކުރައްވަމުން މުއިއްޒު ވިދާޅުވީ، ބޮޑު ޗުއްޓީ އަލުން ޑިސެމްބަރަށް ބަދަލުކުރަން ވަގުތު ބޭނުންވާނެ ކަމަށާއި އެކަން އެންމެ އަވަހަށް ވެސް ކުރެވޭނީ ޖެނުއަރީ 2025 ގެ ދިރާސީ އާ އަހަރުގެ ކިޔެވުން ފެށޭ ގޮތަށް ބަދަލު ގެނެސްގެން ކަމަށެވެ.

ހަމައެއާއެކު، އެބަދަލު މުއިއްޒުގެ ސަރުކާރަކުން ގެންނެވުމުގެ ކުރިން ޓޫރިޒަމްގެ ދާއިރާގައި މަސައްކަތްކުރާ މުވައްޒަފުންނަށް ގެއްލުން ނުވާނެ ގޮތަށް، ލުއި ގޮތެއް ހަމަޖައްސަން އެ ދާއިރާގެ އިސްވެރިންނާ މަޝްވަރާ ކުރައްވާނެ ކަމަށް މުއިއްޒު ވިދާޅުވިއެވެ.

މީގެ އިތުރުން މުއިއްޒު ވިދާޅުވީ އެބޭފުޅާގެ ވެރިކަމެއްގައި ރާއްޖޭގައި އެއާ އެންބިއުލެންސްގެ ހިދުމަތް ފަށާނެކަމަށާއި އަދި އައިވީއެފްގެ ހަރަދުތައް އާސަންދައިގެ ދަށުން ލިބޭ އިންތިޒާމު ވެސް ހަމަޖައްސާނެ ކަމަށެވެ.

ކުޑަހުވަދޫގައި ބޭއްވި ޖަލްސާގައި އެރަށަށް ކޮށްދެއްވާނެ ބައެއް ކަންތައްތައްވެސް މުއިއްޒުވަނީ ޙިއްޞާކުރައްވާފައެވެ. އޭގެތެރޭގައި، އެރަށުގައި ކޮމާޝަލް ޕޯޓެއް ހެދުމާއި، ހިއްކި ބިމަށް ފެނާއި ނަރުދަމާ އަދި ކަރަންޓުގެ ހިދުމަތް ދިނުމާއި، ރަށުގެ ބިން އިތުރުކުރުމާއި، އާންމުން ބޭނުންވާ ގޮތަށް ބަނދަރު ބޮޑުކުރުމުގެ މަޝްރޫއަށް ބަދަލު ގެނައުމާއި އަދި ސްޕޯޓްސް ކޮމްޕްލެކްސް ހެދުން ހިމެނެއެވެ.