ރައީސް ޔާމީނުގެ ޝަރީއަތަށް ރައީސް ޞާލިޙް އަތްބާނާ: ރައީސް ނަޝީދު
ޕީޕީއެމްގެ ލީޑަރު، ރައީސް އަބްދުﷲ ޔާމީންގެ ޝަރީއަތުގެ ތެރެއަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް އަތްބާނާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ތުހުމަތު ކުރައްވައިފި އެވެ.
ރައީސް ނަޝީދު މިހެން ވިދާޅުވެފައިވަނީ، ރައީސް ޔާމީނު ޖަލުގައި ހުންނަވަން ޖެހުމުން އެކަމާމެދު ކަންބޮޑުވެވަޑައިގަންނަވާ ކަމަށާއި ނަމަވެސް ޝަރީއަތެއްގެ މެދުތެރޭގައި އޮއްވައި އެއާ ދޭތެރެއަކު ގޮތެއް ނިންމުމުގެ ބާރެއް ނޯންނަކަމަށް ރައީސް ޞާލިޙް ވިދާޅުވެފައިވަނިކޮށެވެ.
ކުރިއަށް އޮތް ރިޔާސީ އިންތިޚާބުގެ ކެމްޕޭނަށް ދަ ޑިމޮކްރެޓްސްއިން ރަށްރަށަށް ކުރައްވާ ދަތުރުތަކުގެ ތެރެއިން، ހއ. ދިއްދޫއަށް ވަޑައިގެން ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، އެމްއެމްޕީއާރްސީ މައްސަލައިގައި ހަމައެކަނި ރައީސް ޔާމީން ޖަލުގައި އޮތުމަކީ އިންސާފެއް ނޫން ކަމަށާއި ވަގުތުން އެމަނިކުފާނު ދޫކޮށްލެއްވުމަށެވެ. އަދި ޝަރީއަތުގެ ތެރެއަށް އަތް ނުލެވޭނެ ކަމަށް ރައީސް ޞާލިޙް ވިދާޅުވި ނަމަވެސް އެމަނިކުފާނު އަތް އޮތީ ޝަރީއަތުގެ ތެރޭގައި ތާށިވެފައި ކަމަށްވެސް ރައީސް ނަޝީދު ވިދާޅުވި އެވެ.
"ހަގީގަތުގައި ވެފައި އޮތް ގޮތަކީ އަތްބޭނި ބޮނޑީގައި ފައްޓަރުގައި އަޅައިގަނެފައި އެ އޮތީ ތާށިވެފައި. އަތް އޮތީ ޝަރީއަތުގެ ތެރޭގައި،" ރައީސް ނަޝީދު ވިދާޅުވި އެވެ.
މީގެ އިތުރުން، ކޯޓުތަކުގެ ކަންކަން ބަލަހައްޓަމުންދާ ޖުޑީޝަލް ސާވިސް ކޮމިޝަނުގައި މަސައްކަތް ކުރައްވާކަމަށާއި ރާއްޖޭގައި ހިނގާ ކަންކަން އެމަނިކުފާނަށް އޮޅުވާލަން ނޫޅުއްވުމަށް ރައީސް ނަޝީދުވަނީ ގޮވާލައްވާފައެވެ. އެގޮތުން ރައީސް ޞާލިޙް ކުރައްވާ ހުރިހާ ކަމެއް ވަރަށް ސާފުކޮށް އެނގިވަޑައިގަންނަވާ ކަމަށާއި ބުއްދިވެރި ގޮތަކީ ރައީސް ނަޝީދު ބުނުއްވާ ގޮތަށް ކަންކަން ކުރެއްވުން ކަމަށް އެމަނިކުފާނު ވިދާޅުވި އެވެ.
"އަޅުގަނޑުމެން ދެންނެވީމާ އެކަން ކުރެއްވުން ބުއްދިވެރީ. ތަކުރާރުކޮށް އަނެއްކާވެސް މި ދަންނަވަނީ ރައީސް ސޯލިހަށް މި އިންތިހާބުގެ ކުރީގައި ރައީސް ޔާމީން ގެއަށް ގެނައުމަކީ ކޮންމެހެން ބޭނުންތެރި ކަމެއް. އިންސާފުވެރި އިންތިހާބަކަށްޓަކާ ކޮންމެހެން ބޭނުންތެރި ކަމެއް،" ނަޝީދު ވިދާޅުވި އެވެ.
އަންނަ މަހު އޮންނަ ރިޔާސީ އިންތިހާބު އިންސާފުވެރިކޮށް ބާއްވަން ކުރީގެ ރައީސް ޔާމީން ގެއަށް ބަދަލުކޮށްދިނުމުގައި އެހީތެރިވެވަޑައިގަތުމަށް އީޔޫގެ އޮބްޒަވޭޝަން ޓީމާއި ބައްދަލުކޮށް ރައީސް ނަޝީދު އެދިވަޑައިގެންފައިވާއިރު، އީޔޫގެ އެ މިޝަނާ ހަވާލު ކޮށްފައިވާ ޒިންމާއަކީ އިންތިޚާބު އޮބްޒާވް ކުރުން ކަމަށާއި ރާއްޖޭގެ އެތެރޭގެ ސިޔާސީ ކަންކަމާއި ޝަރުއީ މަރުހަލާގެ ތެރެއިން ހިނގާ ކަންކަމާ މެދު ހިޔާލުދީ ނުހެދޭނެ ކަމަށް އީޔޫގެ ވަފުދުން ވަނީ ބުނެފައެވެ.
އީޔޫއަށް ކަލޭއެދުނީ އަތްބާނަން. އިބޫކާރީގައި ކަލޭ ބުނަނީ އަތްބާނަން. އެކަމަކު އެދެފަރާތުންވެސް އެބުނަނީ އަތް ނުބާނާނަމޭ. އެހެން ބުނީމާ ކަލޭ ރުޅުއައިސްގެން ގަދަ ބަސް ތިބުނަނީ، އެމްޑީޕީ ރޫޅާލާނަމޭ ބުނިހެން. ކަލެއަށް އެއްކަމެއްވެސް ނުވާނެ.
ކޮން “ރައީސް” ޔާމީނެއްހޭ؟ ކޮން “ރައީސް” ނަޝީދެްހޭ؟ މައުލޫމތު އޮޅުވާ ނުލައްވާ. ގައުމެއްގައި ހުންނާނީ އެއް ރައީސް.
ޔާމީނު ހައްޔަރުކުރަން ލިއުންހަދާ ބަދަލުހިފުމަށް ހުރިހަކަމެއް ރާވަ ހެދީ ނަސީދު އާއި މިހާރު ދަނޑި ޕާޓީ ގްރޫޕް