އެހެން ކެންޑިޑޭޓުންގެ ކެމްޕެއިނަށް ހުރަސް އެޅުމަކީ ކުރާނެ ކަމެއް ނޫން: މުޢިއްޒު
ރިޔާސީ އިންތިޚާބުގައި ވާދަ ކުރައްވާ އެހެން ކެންޑިޑޭޓުންގެ ކެމްޕެއިނަށް ހުރަސް އެޅުމަކީ ކުރައްވާނެ ކަމެއް ނޫން ކަމުގައި އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުޙައްމަދު މުޢިއްޒު ވިދާޅުވެއްޖެއެވެ.
އަންނަ މަހުގެ ނުވަ ވަނަ ދުވަހު ބާއްވާ ރިޔާސީ އިންތިޚާބުގެ ކެމްޕެއިނަށް އައްޑޫ ސިޓީ އަށް ފުރާވަޑައިގަތުމުގެ ކުރިން ނޫސްވެރިންނާ ބައްދަލުކުރައްވައި، އެމަނިކުފާނު ވިދާޅުވީ، ކެމްޕެއިން ކުރުމަކީ ކޮންމެ ކެނޑިޑޭޓަކަށް އޮތް ހައްގެއް ކަމަށާއި އެހެން ކެންޑިޑޭޓުންގެ ކެމްޕެއިނަށް ހުރަސްއަޅާ އެމީހުން ކަންތައް ކުރާ ގޮތުގެ ވާހަކަ ދެއްކުުމަކީ ދުވަހަކުވެސް ނުކުރާނެ ކަމެއް ކަމަށެވެ.
މުޢިއްޒު ވިދާޅުވީ އައްޑޫ ސިޓީގެ ތަރައްޤީ އާއި ކުރިމަގަށްޓަކައި ރަނގަޅު ތަސައްވުރެއް ގެންގުޅެނީ ޕީޕީއެމް ޕީއެންސީން ކަމަށާއި، އެ ކޯލިޝަނާ އެކީގައި ކުރިއަށް ދިއުމަކީ ވަރަށް ބޮޑަށް އެދިވަޑައިގަންނަވާ ކަމެއް ކަމަށެވެ.
ޑރ.މުޢިއްޒުގެ ”ދިވެހިންގެ ރާއްޖެ“ މެނިފެސްޓޯ ރޭ ލޯންޗުކޮށްފައިވާއިރު އެ މެނިފެސްޓޯގައިވާ ވައުދުތަކަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިޙްގެ ކެމްޕޭން ތަރުޖަމާނު ޑިފެންސް މިނިސްޓަރު މާރިޔާ އަޙްމަދު ދީދީ މިއަދު ވަނީ ފާޑުވިދާޅުވެ، އެ މެނިފެސްޓޯގައިވާ ވައުދުތަކަކީ އެމްޑީޕީގެ މެނިފެސްޓޯއިން ކޮޕީ ކުރައްވާފައިވާ ވައުދުތަކެއް ކަމަށް ވިދާޅުވުމުން، ރައްދުގައި މުޢިއްޒު ވަނީ މެނިފެސްޓޯގެ ކަންކަން ކޮޕީކުރަންޖެހޭ ބޭނުމެއް ނެތް ކަމަށް ވިދާޅުވެފައެވެ.
”މި ފަސް އަހަރުގެ އަކުރާއި ފިއްޔާ އަޅުގަނޑުމެން ފޮލޯކުރަންޏާ އަޅުގަނޑުމެން މެނިފެސްޓޯއެއް ހުށަހަޅައިގެން ނުކުންނަން މަޤްސަދެއް ވެސް ނެތެއް ނޫންތޯ.“މުޢިއްޒު ވިދާޅުވިއެވެ.
