ޝެއިހް އުސްމާން އަބްދުﷲގެ ހަނދާނުގައި މަޖިލީހުގައި ސުކޫތެއް
މަޝްހޫރު ދީނީ އިލްމުވެރިޔާ އަދި ރައްޔިތުންގެ މަޖިލީހުގެ ކުރީގެ މެންބަރު އުސްމާން އަބްދުﷲ އަވަހާރަވުމާ ގުޅިގެން މަޖިލީހުގެ މިއަދުގެ ޖަލްސާގައި ސުކޫތެއް ގެނެސްފިއެވެ.
މަޖިލީހުގެ ހުރިހާ މެންބަރުން ވެސް އެ ސުކޫތުގައި ބައިވެރިވެވަޑައިގަތެވެ. މިއަދުގެ ޖަލްސާ ފެށި އިރު މަޖިލީހަށް ހާޒިރުވެވަޑައިގެން ތިއްބެވީ 28 މެންބަރުންނެވެ.
އުސްމާނަކީ އެކި ދުވަސްވަރު، ދީނީ ގޮތުން ވެސް ސަރުކާރަށް ގިނަ ހިދުމަތްތަކެއް ކުރެއްވި ބޭފުޅެކެވެ.
ޝެއިހް އުސްމާން އަބްދުﷲ ގިނަ ބައެއްގެ ތެރޭގައި މަގްބޫލު ދީނީ އިލްމުވެރިއެކެވެ. ދީނީ ފޮތްތައް ތަރުޖަމާ ކުރެއްވުމާއި، ދީނީ ދަރުސްތައް ދެއްވުމުގައި އެ މަނިކުފާނަކީ މަގްބޫލު ބޭފުޅެކެވެ.
ޝެއިހް އުސްމާން އަބްދުﷲއަސް 2012 ވަނަ އަހަރުވަނީ އިސްލާމްދީނުގެ ހޭލުންތެރިކަން އިތުރުކުރުމާއި، ޚިދްމަތް ކުރުމާއި، ދީނީ ޢިލްމު އުނގަންނައިދިނުމުގެ ދާއިރާއިން ޝަރަފުވެރިކަމުގެ ޤައުމީ އިނާމު ލިބިވަޑައިގެންފައެވެ.
