އެމްޑީޕީ މެނިފެސްޓޯ: ދިވެހި އެގްޒިމް ބޭންކަކާއި އިންވެސްޓްމަންޓް ފަންޑެއް ގާއިމް ކުރުން
ދިވެހި ރާއްޖެއަށް އިގުތިސާދީ ބޮޑު ބަދަލެއް ގެނައުމަށް ދިވެހި އެގްޒިމް ބޭންކަކާއި އިންވެސްޓްމަންޓް ފަންޑެއް ގާއިމް ކުރުން ހިމެނޭހެން، ގިނަ ވައުދުތަކެއް، އެމްޑީޕީން ދެވަނަ ދައުރަކަށް ހުށަހަޅާ މެނިފެސްޓޯގައި ހިމަނައިފިއެވެ.
މެނިފެސްޓޯގެ އެންމެ ފަހު ސިޔާސަތު "އިގުތިސާދީ ބޮޑު ބަދަލު" އިއުލާންކޮށްފައި ވަނީ ރޭ ބޭއްވި ޖަލްސާއެއްގައެވެ. އެ ސިޔާސަތު ބަހާލާފައި ވަނީ ހަތަރު ބަޔަކަށެވެ. އެއީ ބާރުވެރި އިގުތިސާދު، އިގުތިސާދީ ހަރަކާތްތަކުގައި އެންމެ ބައިވެރިވުން، އެކާވީސްވަނަ ގަރުނަށް މާލީ ދާއިރާ އަދި ވިލުންތެރި އިގުތިސާދެވެ.
އޭގެތެރެއިން ބާރުވެރި އިގްތިސާދުގެ ސިޔާސަތުގައި ބުނެފައިވަނީ ދިވެހި ވިޔަފާރިތަކަށް އެހެން ގައުމުތަކުގައި ހިންގާ ޕްރޮޖެކްޓްތަކުގައި ބައިވެރިވުމަށް ބޭނުންވާ ފައިނޭންސް ފޯރުކޮށްދިނުމަށް އެކްސްޕޯޓް-އިމްޕޯޓް (އެގްޒިމް) ފައިނޭންސް ލިބޭނެ ގޮތް މަގުފަހިކޮށްދޭނެ ކަމަށެވެ. މިއާއެކު، ދިވެހި ވިޔަފާރިތަކަށް އެހެން ގައުމުތަކުގައި ހިންގާ ޕްރޮޖެކްޓްތަކުގައި ބައިވެރިވުމުގެ ފުރުސަތު ފަހިވެގެންދާނެ ކަމަށް ބުނެފައިވެއެވެ.
މީގެ އިތުރުން ސަރުކާރުގެ ބައެއް ކުންފުނިތަކުގެ ހިއްސާތަކާއި ރާއްޖޭގެ އެހެނިހެން ސްޓްރެޓީޖިކް އެސެޓްތައް، ދެމެހެއްޓެނިވި ގޮތެއްގައި އޭގެން މަންފާ ކުރާނެ ގޮތަށް ނިޒާމު ބަދަލުކުރާނެ ކަމަށާއި މި މޮޑެލްގެ ދަށުން ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކޮށް ފައިދާ އިތުރުކޮށް، އައު އިންވެސްޓްމަންޓްތަކަށް ބޭރުގެ އިންސްޓިޓިއުޝަނަލް ކެޕިޓަލް ރާއްޖެއަށް ހޯދާނެ ކަމަށް ބުނެފައިވެއެވެ.
