ކުރިން ޖަލުތަކުގައި އަނިޔާކުރި ގޮތަށް އިންސާނީ ކަރާމާތް ގެއްލޭގޮތަށް މިހާރު ކަމެއް ނުކުރާނެ، ކޮށްފިއްޔާ ފިޔަވަޅުވެސް އަޅާނެ: ރައީސް ޞާލިޙް
ކުރިން ޖަލުތަކުގައި ގައިދީންނަށް އަނިޔާކުރި ގޮތަށް އިންސާނީ ކަރާމާތް ގެއްލޭ ފަދަ ކަމެއް މިހާރު ނުކުރާނެކަމަށާއި އެފަދަ ޝަކުވާއެއް އަތުވެއްޖެނަމަ ފިޔަވަޅުވެސް އަޅުއްވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕޭނަށް ލ. ހިތަދުއަށް ވަޑައިގެން އެ ރަށުގެ އެމްޑީޕީ ސަޕޯޓަރުންނާއެކު ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ މި ސަރުކާރުން ޖަލުތަކުގައި އަނިޔާވެރިވުމަށް ޖާގައެއް ނުދޭނެ ކަމަށާއި މި ސަރުކާރުން ބޭނުންވީ ޖަލުގައި އަނިޔާތަކުން ސަލާމަތްވުން ކަމަށެވެ. އަދި މިއަދު އެންމެން ގުޅިގެން އެކަން ހުއްޓުވިއްޖެކަމަށްވެސް އެމަނިކުފާނު ވިދާޅުވިއެވެ.
"އަޅުގަނޑުމެން ބޭނުންވީ ޖަލުގައި އަނިޔާތަކުން ސަލާމަތްވުމަށް. މިއަދު ގުޅިގެން އަޅުގަނޑުމެންނަށް އެކަން ހުއްޓުވިއްޖެ. މިއަދު ޖަލަކު އޭރު އަނިޔާކުރި ގޮތަށް އިންސާނީ ކަރާމަތް ގެއްލޭ ގޮތަށް ކަމެއް ނުކުރާނެ. ޝަކުވާ އަތުވެއްޖެ ނަމަ، މިނިސްޓްރީ އޮފް ހޯމް އެފެއާޒުން ފިޔަވަޅު އަޅާނެ. އެކަމަށް އަޅުގަނޑުމެން ޖާގައެއް ނުދޭނަން،" ރައީސް ޞާލިޙް ވިދާޅުވިއެވެ.
މީގެ އިތުރުން، ލ. ހިތަދޫއަކީ ރާއްޖޭގައި އިސްލާހީ ހަރަކާތް އެންމެ ފުރަތަަމަ ފަށައިގެން ކުރިއަށް ގެންދިޔައިރުގައިވެސް ބައިވެރިވި ބަޔަކު ތިބި ރަށެއް ކަމަށާއި އަދިވެސް އެ ރަށުން ފެންނަނީ އެ ފޯރި ކަމަށް ފާހަގަކުރައްވަމުން ރައީސް ޞާލިޙްވަނީ އޭރުގެ ރައީސް މައުމޫން އަބްދުލްގައްޔޫމްގެ ސަރުކާރުން ޖަލުތަކުގައި ހިންގި އަނިޔާވެރި އަމަލުތަކަށްވެސް އަލިއަޅުއްވައިލައްވާފައެވެ.
އަދި ހިތަދޫ ފަދަ ކުދި ރަށްތަކަކީ މިދިޔަ ސަރުކާރުތަކުން އަސާސީ ހިދުމަތް ފޯރުކޮށްދިނުމަށްވެސް ލިސްޓުގެ އެންމެ ފަހަތުގައި ބާއްވާ ރަށްތައް ކަމަށާއި މި ސަރުކާރުން އެ މަސައްކަތްތައް ކޮށްދިނުމަށް ބުރަ މަސައްކަތްތަކެއް ކޮށްފައިވާ ކަމަށްވެސް ރައީސް ޞާލިޙް ވިދާޅުވިއެވެ.
"އޭގެ ފަސް އަހަރު ފަހުން އަޅުގަނޑު ދަންނަވާނީ ހިތްހަމަޖެހުމެއް އެބަ ލިބެއޭ، އޭރު ވީ ވައުދުތައް ފުއްދެމުންދާތީ. ފެނާއި ނަރުދަމާ ތަފާތު ކުރުމެއް ނެތި މި އަންނަނީ ފުއްދައިދެމުން، އިންޖީނުގެތައް އެޅުމާއި ތައުލީމާއި ސިއްހީ ދާއިރާގައިވެސް ތަފާތުކުރުމެއް ނެތި ކޮށްދެމުން މި ގެންދަނީ. އަޅުގަނޑުމެން ރަށްތައް ތަރައްގީ ކުރާ އިރު، ހިތަދޫއާއި ކުނަހަންދޫ ގުޅައިލުމަކީވީ ވައުދެއް. ފެށުން ލަސްވުމުން ހުންނާނެ ކަންބޮޑުވުންތަކެއް. އަޅުގަނޑުމެންނަށް ކުރިމަތިވި ދަތިތަކާ ހުރެ ލަސްތަކެއް އައީ. މިއަދު ކޯޒްވޭ އެ އޮތީ ކޮންޓްރެކްޓް ކުރެވިފައި. ލަސްތަކެއް ނުވެ އެމްޓީސީސީން އެ މަސައްކަތް ފަށައިގެން ކުރިއަށް ގެންދާނެ،" ރައީސް ޞާލިޙް ވިދާޅުވިއެވެ.
އަންނަ ދައުރަށް ރައީސް ވަނީ ހިތަދުއަށްވެސް ވައުދުތަކެއް ވެވަޑައިގެންފައެވެ. އޭގެ ތެރޭގައި އެ ރަށުގެ ބޮޑެތި މަގުތަކުގައި ތާރު އަޅައި، ޒަމާނީ ފެންވަރަށް ހެދުމާއި ފުޓުބޯޅަ ދަނޑުގައި ޓާފް އަޅައި، ޒަމާނީ ފެންވަރު ވޮލީ ކޯޓެއް ހެދުން އަދި ސިއްހީ މަރުކަޒު ތަރައްގީކުރުން ހިމެނެއެވެ.
ޖަލުތަށް ބަންދު ކުރަންވީ ނުންތޯ ތިހާ ސޯލިހު ވީމާ !