މާލެއަށް އަދި މުޅިރާއްޖެއަށްވެސް ގެންނަންޖެހޭ ބަދަލު އެންމެ ރަނގަޅަށް އިނގޭނީ އަޅުގަނޑަށް: ރައީސް ޞާލިޙް

މާލެ އަށާއި މުޅި ރާއްޖެއަށް ގެންނަޖެހޭ ބަދަލުތައް އެންމެ ރަނގަޅަށް ފަހުމުވެވަޑައިގަންނަވާނީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙަށް ކަމަށް އެމަނިކުފާނު ވިދާޅުވެއްޖެއެވެ.

Ads by STELCO

އެމްޑީޕީގެ "އުފާވެރި މާލެ" ގެ ނަމުގައި މިރޭ ކުރިއަށްގެންދާ ޚާއްސަ ޖަލްސާއެއްގައި ވާހަކަފުޅުދައްކަވަމުން ރައީސް ޞާލިޙް ވިދާޅުވީ ރާއްޖޭގެ ރައްޔިތުންނަށް ބޭނުންވާނެ ކަންކަން އެންމެ ރަނގަޅަށް އެނގިވަޑައިގަންނަވާނީ އެމަނިކުފާނަށް ކަމަށާއި ރައްޔިތުންނަށް ބޭނުންވާ އަސާސީ ޚިދުމަތްތަކުގެ މުހިންމުކަން އެމަނިކުފާނުވަނީ ވަރަށް ގާތުން ތަޖުރިބާކޮށްފައިކަމަށެވެ.

އެގޮތުން، ރައީސް ޞާލިޙް މިހާރު މާލޭގައި އުޅުއްވާތާ 50 އަހަރު ފުރޭއިރު، މާލެއަށް އެމަނިކުފާނު ވަޑައިގަންނަވަން ޖެހުނީ އިތުރު ތައުލީމެއް ހޯދޭނެގޮތެއް އެމަނިކުފާނު ރަށުން ނެތުމުންކަމަށާއި އޭރު އެމަނިކުފާނު ކިޔެވި ސުކޫލުވެސް ނީލަމަށް ލި ކަމަށެވެ. އަދި ބޯފެން ހޯދުމަށް ރަށްރަށުގެ ރައްޔިތުން ކުރި ހިތި ތަޖުރިބާ ރައީސް ޞާލިޙްވެސް ކުރެއްވިކަމަށާއި އެކަންކަން ތަޖުރިބާ ނުކުރައްވާ ބޭފުޅަކަށް އެކަންކަން ފަހުމެއްނުވާނެކަމަށް ރައީސް ޞާލިޙް ވިދާޅުވިއެވެ.

މީގެ އިތުރުން، މި ސަރުކާރުގެ މި ވޭތުވެދިޔަ 5 އަހަރު މީން ދުވަހަކު ނުގެނެވޭ ވަރުގެ ހެޔޮ ބަދަލު ގެނެވިއްޖެކަމަށް ބޭފުޅުން ވިދާޅުވާ އަޑު ރައީސް ޞާލިޙް އައްސަވާ ކަމަށާއި އެއީ ތެދުފުޅެއްކަން ފާހަގަކުރައްވަމުން އެމަނިކުފާނު ވިދާޅުވީ، ހިލޭ ޑިގްރީއާއި ފެނާއި ނަރުދަމާ ފަދަ އަސާސީ ހުރިހާ ކަމެއްގެ ފުރިހަމަ މައުލޫމާތާއި ތަޖުރިބާވެސް އެމަނިކުފާނަށްވުރެ ބޮޑަށް އެނގިވަޑައިގަންނަވާނެ އެހެން ބޭފުޅެއް ވާދަވެރިންގެ ތެރޭގައި ނެތްކަމަށެވެ.