ރައީސް މަޢުމޫނާއި އިބްރާހީމް ނާސިރުގެ ޚާރިޖީ ސިޔާސަތު ވަރަށް ކަމުދޭ: ޤާސިމް
ޖުމްހޫރީ ޕާޓީ (ޖޭޕީ) ގެ ސަރުކާރެއްގައި ގެންގުޅޭނީ ކުރީގެ ރައީސް މަޢުމޫން ޢަބްދުލްޤައްޔޫމް އާއި އިބްރާހީމް ނާސިރު ގެންގުޅުއްވި ފަދަ ޚާރިޖީ ސިޔާސަތެއްކަމުގައި އެޕާޓީގެ ރިޔާސީ ކެނޑިޑޭޓް ޤާސިމް އިބްރާހީމް ވިދާޅުވެއްޖެއެވެ.
ސަންގު ޓީވިން ކުރިއަށް ގެންދާ ރިޔާސީ ބަހުސްގައި ހާރިޖީ ސިޔާސަތާ ގުޅޭގޮތުން ކުރެއްވި ސުވާލަށް ޖަވާބު ދެއްވަމުން ޤާސިމް ވިދާޅުވީ ރައީސް މަޢުމޫން ގެންގުޅުއްވި ޚާރިޖީ ސިޔާސަތު އެމަނިކުފާނަށް ވަރަށް ކަމުދާކަމަށާއި، އެމަނިކުފާނުގެ ވިސްނުމަކީ ބޭރުގެ ހުރިހާ ޤައުމާކާއެކު ގުޅިގެން މަސައްކަތްކުރުން ކަމަށެވެ. އަދި އިބްރާހިމް ނާސިރުގެ ވެރިކަމުގައި އިޒްރޭލާއެކު ގުޅުން ފެށިނަމަވެސް، ފަހުން އެކަން ހުއްޓާލެއްވިކަމަށާއި، ރައީސް މަޢުމޫން ވެރިކަމަށް ވަޑައިގެންވެސް އެކަން އެގޮތުގައި ދަމަހައްޓަވައި، ބޭރުގެ ޤައުމުތަކާއެކު ބަދަހި ގުޅުމެއް ބޭއްވިތަން ފެނިގެންދިޔަކަމަށް ޤާސިމް ވިދާޅުވިއެވެ.
"އަޅުގަނޑުމެންގެ ޚާރިޖީ ސިޔާސަތުގަ އޮންނާނީ ދިވެހިންނަށް އިސްކަން ދިނުމުގެ ސިޔާސަތު، އިޤްތިޞޯދީ ކަންތައްތަކުގަވެސް، އިޖްތިމާޢީ ކަންތައްތަކުގަވެސް އަދި ދާޚިލީ ކަންތައްތަކުގަވެސް"
ޤާސިމް ވިދާޅުވީ ރާއްޖޭގައި ހުރި ބޭރުގެ އެންބަސީތަކާއި ގުޅިގެން ރާއްޖެއަށް ފައިދާ ވާނެ ގޮތްތަށް ހޯދުމުގެ މަސައްކަތްކުރައްވާނެކަމަށާއި އަވައްޓެރި ހުރިހާ ޤައުމުތަކާއެކުގައިވެސް ގާތްގުޅުމެއް ބާއްވާނެކަމަށެވެ.
