އިތުރު ޓެކްސްއެއް ތައާރަފްކުރަން ނުވިސްނަން, މިހާރު ހުރި ޓެކްސްގެ ނިޒާމު ބަދަލުކުރާނަން: ޤާސިމް
އިތުރު ޓެކްސްއެއް ތައާރަފްކުރަން ނުވިސްނާ ކަމަށާއި މިހާރު ހުރި ޓެކްސްގެ ނިޒާމު ބަދަލުކުރާނެ ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމް ވިދާޅުވެއްޖެއެވެ.
ސަންގު ޓީވީ އާއި ޕީއެސްއެމް ގުޅިގެން ބިލަބޮންގް އިންޓަނޭޝަނަލް ސްކޫލުގައި ކުރިއަށްގެންދާ "ސަންގު ބަހުސް"ގައި ވާހަކަދައްކަވަމުން ގާސިމް ވިދާޅުވީ އެމަނިކުފާނުގެ ރިޔާސީ ދައުރެއްގައި އާމްދަނީ ހޯދުމަށްޓަކައި ތަފާތު މަސައްކަތްތައް ކުރަން ވިސްނުމުގައި އެބަހުރި ކަމަށެވެ.
އެގޮތުން މިހާރު ހުރި ޓެކްސްގެ ނިޒާމު ބަދަލުކުރާނެ ކަމަށާއި އެކަން ކުރިޔަށްގެންދާނީ އެއް އުސޫލަކަށް ފައްތާލައިގެން ކަމަށް ގާސިމް ވިދާޅުވިއެވެ. އަދި އިތުރު ޓެކްސްއެއް ތައާރަފްކުރަން ނުވިސްނާ ކަމަށާއި މިހާރު ޓެކްސް ނަގާ ދާއިރާތަކުގައި ހުރި ކަންކަން ހާމަނައިޒްކުރާނެ ކަމަށް ގާސިމް ވިދާޅުވިއެވެ.
"އަދި އިމްޕޯޓް ޑިއުޓީގެ ކަންކަންވެސް ހާމަނައިޒްކޮށްގެން އޭގެން ލިބޭ އާމްދަނީއާއި އެކީގަ އަޅުގަނޑުމެން ވެފައިވާ ވައުދުތަކައި އެއްގޮތަށް އާމްދަނީ އިތުރުކުރެވޭނެ މަގު އަޅުގަނޑު ފަހިކުރާނަން" ގާސިމް ވިދާޅުވިއެވެ.
ގާސިމް ވިދާޅުވީ އެކަން ކުރެވޭނެ ޔަގީންކަން އެބައޮތް ކަމަށާއި ކޮރަޕްޝަންގެ މަގު ފަހިވެފައިވާ މިންވަރު އެމަނިކުފާނުގެ ސަރުކާރެއްގައު މަދުކުރާނެ ކަމަށެވެ.
