ރިޔާސީ އިންތިޚާބުގެ ފުރަތަމަ ބުރުގައި ވޯޓުނުލާ 56،909 މީހުން އެބަތިބި
ސެޕްޓެންބަރު 9 ވަނަ ދުވަހު ބޭއްވި ރިޔާސީ އިންތިޚާބުގައި 56،909 މީހުން ވޯޓު ނުލާކަން އިލެކްޝަންސް ކޮމިޝަން (އީސީ) ގެ ހިސާބުތަކުން ދައްކައިފިއެވެ.
އިންތިޚާބުގެ ވަގުތީ ނަތީޖާ އީސީން މިއަދު އިޢުލާނުކޮށްފައިވާއިރު 282،395 މީހުންނަކީ ވޯޓް ދިނުމުގެ ހައްްޤު ލިބިފައިވާ މީހުންނެވެ. އެމީހުންގެ ތެރެއިން ވޯޓު ލާފައިވަނީ 225،486 މީހުންކަމަށްވާއިރު ވޯޓު ނުލާ މީހުންގެ އަދަދަކީ 56،909 އެވެ.
ވޯޓު ލި މީހުންގެ ނިސްބަތަކީ 79.85 ކަމަށްވާއިރު އޭގެ ތެރެއިން ސައްޙަ ވޯޓު ލާފައިވަނީ 220،651 މީހުންނެވެ.
އެއްވެސް ކެންޑިޑޭޓަކަށް އިންތިޚާބު ފުރަތަމަ ބުރުން ކާމިޔާބު ކުރެވިފައިނުވާއިރު، 101،635 ވޯޓާއެކު އެންމެ ގިނަ ވޯޓު ހޯއްދެވީ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު އެވެ. އަދި 86،161 ވޯޓާއެކު ދެވަނައަށް އެންމެ ގިނައިން ވޯޓު ހޯއްދެވީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިޙުއެވެ.
އަދި 15،839 ވޯޓާއެކު އިންތިޚާބުގެ ތިންވަނަ އަށް އެންމެ ގިނަ ވޯޓު ހޯއްދެވީ ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބެވެ.
ރިޔާސީ އިންތިހާބުގެ ދެވަނަ ބުރުގެ ވޯޓުލުން އޮންނާނީ މި މަހުގެ 30 ގަ އެވެ.
