ކޮމިޓީއެއް އެކުލަވާލައި އެމްޑީޕީ އަދި ޕީޕީއެމް/ޕީއެންސީއާއެކު މަޝްވަރާކުރުމަށް ޑިމޮކްރެޓްސްއިން ނިންމައިފި

ސެޕްޓެންބަރު 30 ވަނަ ދުވަހު ބާއްވާ ރިޔާސީ އިންތިޚާބުގެ ދެވަނަ ބުރުގައި އެމްޑީޕީއާއި، ޕީޕީއެމް/ޕީއެންސީއާއިއެކު މަޝްވަރާ އަށް ދިއުމަށް 6 މެމްބަރުންގެ މައްޗަށް އެކުލެވޭ ކޮމިޓީއެއް އެކުލަވާލައި މަޝްވަރާތައް ފެށުމަށް ދަ ޑިމޮކްރެޓްސް ޕާޓީން ނިންމައިފިއެވެ.

Ads by STELCO

އިންތިހާބުގެ ދެވަނަ ބުރުގައި ޑިމޮކްރެޓްސްއިން ނިންމާނެ ގޮތަކާ ބެހޭގޮތުން މަޝްވަރާ ކުރުމަށްޓަަކައި މިއަދު ބޭއްވި، އެ ޕާޓީގެ ވަގުތީ ކައުންސިލް ބައްދަލުވުމުގައި އެކަމަށް ކޮމިޓީއެއް އެކުލަވައިލުމަށް އެ ޕާޓީގެ ވަގުތީ ޗެއަރޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ހުށަހަޅުއްވާފައިވެއެވެ.

އެގޮތުން އެ ކޮމިޓީގައި ލަތީފުއާއެކު، އެ ޕާޓީގެ ރިޔާސީ ކެނޑިޑޭޓް ހުޅުދޫ ދާއިރާގެ މެންބަރު އިލްޔާސް ލަބީބާއި ރަނިންމޭޓް އަހުމަދު އަމްރާއި އެ ޕާޓީގެ ވަގުތީ ޗެއާޕާސަން އަދި މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފާއި މަޖިލީހުގެ ނާއިބު ރައީސް ގަލޮޅު އުތުރު ދާއިރާގެ މެންބަރު އީވާ އަބުދުﷲ އާއި މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމްގެ އިތުރުން މުހައްމަދު ޝިފާޒު ހިމެނިވަޑައިގަންނަވައެވެ.

އެ ކޮމިޓީގެ މަސައްކަތަކީ ޕީޕީއެމް/ޕީއެންސީ އަދި އެމްޑީޕީއާއި ވާހަކަދެއްކުން ކަމަށާއި އެ ޕާޓީން ގުޅޭނެ ފަރާތެއް ނިންމާނީ، ޕާޓީން ކުރި މަޝްވަރާތައް ޕާޓީ ކައުންސިލަށް ގެނެސް ކައުންސިލުގައި މަޝްވަރާ ކުރުމަށްފަހު، ކައުންސިލުން ކަމަށް ލަތީފު ވިދާޅުވިއެވެ.

މިއަދު ޑިމޮކްރެޓްސްއިން ބޭއްވި ކައުންސިލު ބައްދަލުވުމުގައި ވާހަކަ ދެއްކެވި ހުރިހާ މެމްބަރުން ވަނީ މިސަރުކާރާއިއެކީ ކުރިއަށް ނުދާނެކަމަށް ވިދާޅުވެފައެވެ. އަދި މިހާރު އޮތް ދެ ޗޮއިސް ކަމުގައިވާ ރައީސް ޞާލިހާއި، ޑރ. މުއިއްޒާއިއެކީގައިވެސް ކުރިއަށް ދިއުމަކީ ފަސޭހަ ކަމެއް ނޫންކަމަށް ބައެއް ބޭފުޅުން ފާހަގަކުރި ނަމަވެސް ޤައުމަށްޓަކައި ނިންމަންޖެހޭ ކޮންމެ ނިންމުމެއް ނިންމައިގެން ކުރިއަށްދާނެކަމަށް އެބޭފުޅުން ވިދާޅުވިއެވެ.

ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް ވިދާޅުވީ އޮތީ ތިން ގޮތެއް ކަމަށާއި އެއްގޮތަކީ އެއްވެސް ކޮޅަކަށް ނާރާ ތިބުން ކަމަށެވެ. އަދި އަނެއް ގޮތަކީ ރައީސް ޞާލިހު ނޫނީ، ޑރ. މުއިއްޒުގެ ފަހަތަށް އެރުންކަމަށާއި މިތިން ގޮތުގެ ތެރެއިން ގޮތެއް ނިންމާނީ ޢާންމު މެމްބަރުންނާއި ރައްޔިތުންނާއި ޤައުމަށް އެންމެ ރަނގަޅު ގޮތަކަށް މަޝްވަރާ ކުރުމަށްފަހުކަމަށް އިލްޔާސް ވިދާޅުވިއެވެ.