މުޢިއްޒު ނިކުމެ އެ ހުންނެވީ ރާއްޖެއަށް އަޖައިބުކުރުވަނިވި ތަރައްގީ ގެނައި ވެރިއެއްގެ ފޮތުން ފިލާވަޅު ނަގައިގެން: ސަޢީދު
ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ނިކުމެ އެ ހުންނެވީ ރާއްޖެއަށް އަޖައިބުކުރުވަނިވި ތަރައްގީ ގެނައި ވެރިއެއްގެ ފޮތުން ފިލާވަޅު ނަގައިގެން ކަމަށް ޕީއެންސީގެ ނައިބުރައީސް މުހައްމަދު ސައީދު ވިދާޅުވެއްޖެއެވެ.
ރީޔާސީ އިންތިހާބުގެ ދެވަނަ ބުރުގެ ކެންޕެއިނަށް ޑރ. މުޢިއްޒާއެކު ރ. ހުޅުދުއްފާރަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ސައީދު ވިދާޅުވީ މިރެއަކީ ވަރަށް ވެސް އުފާވެރި ރެއެއް ކަމަށެވެ.
ޑރ. މުޢިއްޒު މިރޭގެ ޖަލްސާގައި ދެއްކެވި ވާހަކަފުޅު ނިންމަވާލައްވަމުން ވިދާޅުވި “ވެރިކަމަކީ ޝަރަފެއް ނޫނޭ، ވެރިކަމަކީ އަމާނާތެކޭ، ވެރިކަމަކީ ޒިންމާއެކޭ”އިން އުފާވެރިކަން ލިބިގަންނަން ޖެހޭ ކަމަށް ސައީދު ފާހަގަކުރެއްވިއެވެ.
އަދި މިއީ ސައްތައިން ސައްތަ މުސްލިމް ޤައުމެއް ކަމަށާއި ކުރާ ވެރިކަމެއްގެ ޖަވާބުދާރީވާން ޖެހޭނީ އާހިރަތުގައި ކަމަށާއި ރާއްޖޭގެ ވަލީއުލްއަމްރުގެ ގޮނޑިއަށް މާދަމާ ވަޑައިގަންނަވާނެ ވެރިއަކު ރައްޔިތުންގެ ކުރިމަތީގައި ހުއްޓި ހުރެ “ވެރިކަމަކީ ޝަރަފެއް ނޫނޭ، ވެރިކަމަކީ އަމާނާތެކޭ، ވެރިކަމަކީ ޒިންމާއެކޭ” ވިދާޅުވުމުން އޭނާއަށް ވޯޓު ނުދީ ދެން ވޯޓު ދޭން ޖެހޭ ދެވަނަ މީހެއް ނޯންނާނެ ކަމަށް ސައީދު ވިދާޅުވިއެވެ.
“ޑރ. މުޢިއްޒަކީ ވަރަށް ސާދާ ބޭފުޅެއް. އަނެއްކާ އަަޅުގަނޑު ޑރ. މުޢިއްޒު ދަންނަން ފެށި ފަހުން އެމަނިކުފާނަކީ ކުރަން ހަވާލުވާ ކޮންމެ ކަމެއް، ކޮންމެ ކަމެއް ވަރަށް ޑީޓެއިލްކޮށް ކުރައްވާ ބޭފުޅެއް. ވަރަށް ތަފްސީލްކޮށް ކުރައްވާ ބޭފުޅެއް” ސައީދު ވިދާޅުވިއެވެ.
ސައީދު ވިދާޅުވީ މަގު ވަރަށް ސާފު ކަމަށާއި ކުރިމަގު ވެސް ވަރަށް ސާފު ކަމަށެވެ. ޤައުމުގެ މިނިވަން ކަމާއި އިސްތިގްލާލާއި ސިޔާދަތު ދަމަހައްޓަން ބޭނުންފުޅުވާނަމަ ޑރ. މުޢިއްޒަށް ވޯޓު ދެއްވުމަށް ސައީދު ވަނީ އެދިފައެވެ.
“އެއީ ޒިންމާއަށް ކެރިގެން ކުރިމަތިލާނެ ބޭފުޅެއް. ތަޢުލީމީ ޤާބިލް ބޭފުޅެއް” ސައީދު ވިދާޅުވިއެވެ.
މީގެ އިތުރުން މުޢިއްޒު ނިކުމެ އެ ހުންނެވީ ގައުމަށް ހެޔޮގޮތް ހޯދަން ކަމަށާއި “މި ރާއްޖެއަށް އަޖައިބު ކުރުވަނިވި ތަރައްގީ ގެނެސްދެއްވި ބޭފުޅެއްގެ ފޮތުން ފިލާވަޅު ނަންގަވައިގެން އެމަނިކުފާނު އެ ހުންނެވީ” ކަމަށް ސައީދު ވިދާޅުވިއެވެ.
Ajaibeh kahala hohli thakehtha alhanee ekahala hohli mueezu alhaaneh kameh neiy