ޤާސިމް ދޫކޮށްލެއްވުމަކީ ދުވަހަކުވެސް ކުރަން ހިތަށް އެރި ކަމެއް ނޫން: އިލްހާމް
ޖުމްހޫރީ ޕާޓީ (ޖޭޕީ) ގެ ލީޑަރު ޤާސިމް އިބްރާހިމް ދޫކޮށްލެއްވުމަކީ ދުވަހަކުވެސް ކުރަން ހިތަށް އެރި ކަމެއް ނޫންކަމަށް އެޕާޓީގެ އެޑްވައިޒަރުގެ މަޤާމުގައި ހުންނެވި އިލްހާމް އަޙްމަދު ވިދާޅުވެއްޖެއެވެ.
ޖޭޕީން ވަކިވެ، އެމްޑީޕީ އާ ގުޅިވަޑައިގެން ރޭ އެޕާޓީން ބޭއްވި ކެންޕެއިން ޖަލްސާގައި ވާހަކަ ދައްކަވަމުން އިލްހާމް ވިދާޅުވީ ޤާސިމްއަށްވުރެ ހެޔޮ އިންސާނަކު ނުހުންނާނެކަމަށާއި، ކުރީގެ ރައީސް ޢަބްދުﷲ ޔާމިންގެ ވެރިކަމުގައި ޤާސިމްގެ އެކައުންޓުތައް ފްރީޒްކޮށް، ކުންފުނި ބަނގުރޫޓުކޮށްލައި، ބަލި އެނދުގައި އޮއްވާ ޙުކުމްކުރިކަމަށާއި، އަދި އެމަނިކުފާނުގެ ދަރިކަލުން ސިޔާދު ޤާސިމްވެސް ބޭއްވީ ޖަލުގައިކަމަށެވެ.
އިލްހާމް ވިދާޅުވީ އިދިކޮޅު ޕީޕިއެމުން ވެސް ބޮޑެތި ހުށަހެޅުންތަށް ލިބުނުކަމަށާއި ނަމަވެސް އެޕާޓީގެ އެޕާޓީއަށް ނުދިޔައީ އެޕާޓީގެ ކުރިމަގު އޮތީ ނާމާންކަމާއި ބިރުވެރިކަމުން ފުރިފައިވާތީކަމަށެވެ. އަދި އެޕާޓީ އުފެއްދުމުގައި އިސްކޮށް އޭނާ އުޅުއްވި ނަމަވެސް އެޕާޓީން ހުށަހެޅި ހުރިހާކަމަކަށް ދެންނެވީ "ސޮރީ" އޭ ކަމަށްވެސް އިލްހާމް ވިދާޅުވިއެވެ.
އިލްހާމް ވިދާޅުވީ ޕީޕީއެމްގެ ސަރުކާރެއް އަލުން އަތުވެއްޖެނަމަ ހިފައި ހައްޔަރުކުރަންޖެހޭ މީހުންނާއި އެޕާޓީގެ މެންބަރުންގެ ތެރެއިންވެސް މަޖިލީހުން ޖާގަ ނުދީ ކަޓުވާލާނެ މެންބަރުންގެ ލިސްޓެއް ގެންގުޅޭކަމަށެވެ. އަދި ކުރީގެ ރައީސް ޢަބްދުﷲ ޔާމިންގެ ވެރިކަމުގައި އަނިޔާ ލިބުނު އެއްވެސް އާއިލާއަކުން ޕީޕީއެމްގެ ވެރިކަމެއް އަލުން އިއާދަވާން ނޭދޭނެކަމަށާއި އެކަމުގެ ހެއްކަކީ ޚުދު އޭނާކަމަށް އިލްހާމް ވިދާޅުވިއެވެ.
އިލްހާމް ވިދާޅުވީ ޕީޕީއެމްގެ ވެރިކަމެއްގައި ފުލުހުންނާއި ކޯޓުތަކަށްވެސް ޣައިރު ޤާނޫނި އަމުރުތައް ތަންފީޒުކުރުން ނޫންކަމެއް ކުރަން ނުޖެހޭނެކަމަށާއި، ފުލުހުންނަށް ޖެހޭނީ ޣައިރު ޤާނޫނީ އަމުރަށް ކިޔަމަންތެރިވެގެން ހުރެ، ފުރާޅުން ޓިނު ނަގައި، މީހުން ހައްޔަރުކުރުން ކަމަށްވެސް އިލްހާމް ވިދާޅުވިއެވެ.
"ޕީޕީއެމަށް ވެރިކަން ލިބިއްޖިއްޔާ ކޯޓުގެ ފަނޑިޔާރުންނާ އެތާ ތިބޭ މުވައްޒަފުންނަށް ޖެހޭނެ ކަމަކީ ރޭގަނޑު ހޭލާ ތިބެގެން ފަހަރަކު އަމުރެއް, ފަހަރަކު އަމުރެއް ނެރުން. ރަންކޮޅާ މި ނޫން އެއްވެސް ގޮތެއް ނޯންނާނެ" އޭނާ ވިދާޅުވިއެވެ.
"ދިވެހި ފުލުހުންނާ ސިފައިންނަށް އޮންނާނީ ކޮން ކަމެއްތޯ؟ ފުރާޅުން ޓިނު ނެގުން. މީހުން ހިފައި ހައްޔަރުކުރުން. ޣައިރު ގާނޫނީ އަމުރަށް ކިޔަމަންތެރިވެގެން އެކަން ކުރުން. ފަހުން އޭގެ މައްޗަށް ޙުކުމެއް އައުން. މިއީ ކުރައްވަން ޖެހޭ ކަމަކީ" އިލްހާމް ވިދާޅުވިއެވެ.
އިލްހާމް ވަނީ މާޒީގެ އެ މަންޒަރު އަލުން ފެންނަން ނޭދޭނަމަ، ރައީސް ޞާލިޙުއަށް ވޯޓު ދެއްވުމަށް ގޮވާލާފައެވެ. އަދި ހަމަޖެހިގެން ދިރިއުޅެން ފަހިވެފައި އޮތް ގޮތަށް މި ދައުރު އިތުރަށް ދަންމާލުމަށް ވިސްނާވަޑައިގެން ވޯޓު ދެއްވުމަށް ގޮވާލައްވާފައެވެ.
އިލްހާމު މެންނަކީ މިގައުމު ފަސާދަ ކުރަން އައިބައިގަނޑެއް
ފައިސާގެ ފަހަތުން ދުވާމީހަކު ގާސިމްހުސްކޮށްފަ އަވަހަށް އެއްޗެއްލިބެން އޮތް ދިމާލަކަށް ނިގޮއްސިނަމަ ބަނޑަށްޖެހިދާނެތީ ހަޒާނާ ހުރިފަރާތައް ދިޔައީ.
ބުހުތާން ދޮގު ނުހަދަބަލަ. ތިކަހަލަ ދެފުށް ކެހެރިންނަކަށް ޕީ.ޕީ.އެމް، ޕީ.އެން.ސީއަކުން އެއް ވެސް ހުށަހެޅުމެއް ހުށައެއްނާޅާ. ޢަލީވަހީދު ވެސް އައި ބަލައެއް ނުގަތް. މީ ރިޔަލިޓީއަކީ.