ޕީއެސްޖީ ހަމަ ބިމަށް ތިރިކޮށް، މޮޅު ކުޅުމާއެކު ޗެމްޕިއަންސް ލީގުގެ ތަށި ބަޔާނުން އުފުލާލައިފި

ޗެމްޕިއަންސް ލީގުގެ ފައިނަލުގައި ޕީއެސްޖީ ބަލިކޮށް ބަޔާނުން 6 ވަނަ ފަހަރަށް ޗެމްޕިއަންސް ލީގުގެ ތަށި އުފުލާލައިފިއެވެ. ބަޔާނުން ޕީއެސްޖީގެ މައްޗަށް ކުރި ހޯދީ 1-0ގެ ނަތީޖާ އަކުންނެވެ.

Ads by STELCO

ޕޯޗުގަލްގެ ކެޕިޓަލް ސިޓީ ލިޒްބަންގައި އާދިއްތަ ދުވަހުގެ ރޭ ކުޅެވުނު ފައިނަލު މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައި ވެއެވެ.

މެޗުގެ ކުރީކޮޅު ޕީއެސްޖީގެ ފަރާތުން ފެނިގެން ގޮސްފައިވަނީ އެޓޭކިން ކުޅުމެކެވެ. ބަޔާންގެ ގޯލަށް ފުލުފުލުގައި ހަމަލާތައް ދެމުން ދިޔައިރު ބަޔާނުން ވެސް ވަނީ ރަނގަޅު ފުރުސަތު ތަކެއް ތަނަވަަސް ކޮށްފައެވެ.

މެޗުގެ 21 ވަނަ މިނެޓުގައި ބަޔާންގެ ފޯވާރޑު ލެވަންޑޮސްކީ ޕީއެސްޖީގެ އޭރިއާ ތެރެއިން ފޮނުވާލި ބޯޅަ ގޮސް ޖެހުނީ ދަނޑީގައެވެ. އަދި މެޗުގެ 44 ވަނަމިނެޓުގައި ޕީއެސްޖީގެ ޒުވާން ފޯވާޑް އެމްބާޕޭއަށް ވަނީ ލަނޑު ޖަހާނެ ހުސް ފުރުސަތެއް ލިބިފައެވެ. ނަމަވެސް އެ ފުރުސަތުގެ ބޭނުމެއް ނުހިފުނެވެ.

މެޗުގެ ފުރަތަމަ ހާފު ނިމުނީ އެގޮތުގައި އޮވެ ދެޓީމުން ކުރެ އެއް ޓީމަކަށް ވެސް ގޯލެއް ނުޖެހިއެވެ.

މެޗުގެ ދެވަނަ ހާފު ފެށި މާގިނައިރެއް ނުވެ ބަޔާންގެ ނަބްރީ ޕީއެސްޖީގެ ނޭމާ އަަށް ކުރި ފައުލަކާއި ގުޅިގެން އޭނާ އަށް ވަނީ ރީނދޫ ކާޑު ދައްކާފައެވެ. އަދި އެފައުލު ކުރުމުން ހަމަ ނުޖެހުން ހިންގުމަށް މަސައްކަތް ކުރުމުން ޕީއެސްޖީގެ ލެއިންޑްރޯ ލިއޮނަލް ޕަރޭޑްސް އަށްވެސް ރެފްރީ ވަނީ ރީނދޫ ކާޑު ދައްކާފައެވެ.

މެޗުގެ 58 ވަނަ މިނެޓުގައި ބަޔާނުން ވަނީ މެޗުގެ ހަމައެކަނި ގޯލް ޖަހާ ލީޑު ނަގާފައެވެ. އޭރިއާގެ ބޭރުން ކިމިޗް ނަގައިދިން ހުރަހަކުން ބޮލުން ޖަހާ މި ގޯލް ކާމިޔާބު ކުރިއިރު ކޫމަން ހުރީ ހުސްކޮށެވެ. އެ ގޯލަކީ އޭނާ ޗެމްޕިއަންސް ލީގު މި ސީޒަނުގައި ޖެހި 3 ވަނަ ގޯލެވެ.

މެޗުގެ 62 ވަނަ މިނެޓުގައި ވެސް ކޫމަން ވަނީ ނުރައްކާތެރި ހަމަލާއެއް ޕީއެސްޖީގެ ގޯލަށް ފޮނުވާލާފައެވެ. މި ހަމަލާ ގޯލުގެ ތެރެއަށް ވަދެވަދެ އޮއްވާ ދިފާއު ކުރީ ޕީއެސްޖީގެ ކެޕްޓަން ތިއާގޯ ސިލްވާއެވެ.

މެޗުގެ 67 ވަނަ މިނެޓުގައި ބަޔާނުން ވަނީ ދެ ބަދަލެއް ކޮށްފައެވެ. އެގޮތުން ނެބްރީ އާއި ކޫމަން ވަނީ ބާލުވާފައެވެ. އަދި އިވާން ޕެރިސިކް އާއި ކުޓީނިއޯ ވަނީ ކުޅެން އަރުވާފައެވެ.

މެޗުގެ 69 ވަނަ މިނެޓުގައި ޕީއެސްޖީގެ މާކީނިއޯޒް އަށްވެސް ވަނީ އޭރިއާ ތެރެއިން ރަނގަޅު ފުރުސަތެއް ލިބި ބޭކާރު ވެފައެވެ.

މެޗުގެ 84 ވަނަ މިނެޓުގައި ލެވަންޑޮސްކީ ބޯޅަ ހިފައިގެން ޕީއެސްޖީގެ އޭރިއާގެ ތެރެެއަަށް ވަންނަން ދިއުމުގެ ތެރޭގައި ތިއާގޯ ސިލްވާ ވަނީ ފައުލް ކޮށްފައެވެ. ރެފްރީ އޭނާއަށް ރީނދޫ ކާޑެއް ދެއްކިއެވެ. އަދި ލިބުނު ހިލޭ ޖެހުން ބަޔާނުން ފޮނުވާލީ ބަދަލު ކުޅުންތެރިއެއްގެ ގޮތުގައި ކުޅުމުގެ ތެރެއަށް ނުކުތް ކުޓީނިއޯއެވެ.

ބަޔާންގެ ގޯލަށް ފަހު ޕީއެސްޖީގެ ފަރާތުން މާ އެދެވޭ ކުޅުމެއް ފެނިގެން ގޮސްފައި ނުވާކަން ފާހަގަ ކުރެވެއެވެ. އެގޮތުން ފެނިގެން ދިޔައީ ވަރަށް ޕްރެޝަރުގައި ތިބެ ކުޅެމުން ދިޔަ މަންޒަރެވެ.

މެޗުގެ އިތުރު ވަގުތުގެ 5 މިނެޓުގެ ތެރޭގައިވެސް ޕީއެސްޖީއަށް ލަނޑު ޖަހާނެ ރަނގަޅު ފުރުސަތެއް ލިބުނެވެ. ނޭމާއަށް ލިބުނު މި ފުރުސަތުގެ ބޭނުން ވެސް ހިފިފައެއް ނުވެއެވެ.

ބަޔާނުން ހޯދި މި މޮޅާއެކު އެޓީމުން ޗެމްޕިއަންސް ލީގުގެ ތަށި 6 ވަނަ ފަހަރަށް މިރޭ ވަނީ އުފުލާލައިފައެވެ.