ޤާނޫނު ބަދަލުކޮށްގެން ޖޭއެސްސީ ސިޔާސީ ނުފޫޒުން ދުރުކުރާނަން: ޑރ. މުޢިއްޒު
ޤާނޫނަށް ގެންނަންޖެހޭ ބަދަލުތައް ގެނެސް ޖުޑީޝަލް ސަރވިސް ކޮމިޝަނު ސިޔާސީ ނުފޫޒުން ދުރުކުރައްވާނެކަމަށް އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރިޔާސީ އިންތިޚާބު ކާމިޔާބު ކުރެއްވުމަށްފަހު ފުރަތަމަ ފަހަރަށް ބޭރުގެ މީޑިއާ އަކަށް ދެއްވި އިންޓަރވިއުގައި ވާހަކަފުޅު ދައްކަވަމުން މުޢިއްޒު ވިދާޅުވީ މިވަގުތު ރާއްޖޭގެ ޝަރުޢީ ދާއިރާ އޮތީ މިނިވަންކޮށްކަމަށް ޤަބޫލުނުކުރައްވާކަމަށާއި، އެހެން އެކަންވުމުގެ އެންމެ ބޮޑު އެއް ސަބަބަކީ ޖޭއެސްސީ އެކުލެވިފައި އޮތް ގޮތުން ޖުޑީޝަރީއަށް ސިޔާސީ ނުފޫޒު ފޯރުންކަމަށެވެ.
އެމަނިކުފާނުގެ ވެރިކަމުގެ ފުރަތަމަ ދުވަހުން ފެށިގެންވެސް ޖުޑީޝަރީއަކީ މިނިވަން، އިންސާފުވެރިތަނަކަށް ހައްދަވާނެކަމަށް ޑރ. މުޢިއްޒު ފާހަގަކުރެއްވިއެވެ.
"އަޅުގަނޑު ފުރަތަމަ ދުވަހުން ފެށިގެން އެތަން [ޖުޑީޝަލް ސަރވިސް ކޮމިޝަން] މިނިވަން، އިންސާފުވެރި ތަނަކަށް ހަދައިދޭނަން. ޖުޑީޝަލް ސަރވިސް ކޮމިޝަނަކީ ވަރަށް ބޮޑަށް ސިޔާސީވެފައި އޮތް ތަނެއް، އެތަނުގައި އޮތް ސިޔާސީ ނުފޫޒު ފޮހެލުމަށް ޤާނޫނުތަކަށް ބަދަލު ގެންނާނަން. އަދި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންވެސް ޖޭއެސްސީން ވަކިކުރާނަން" ޑރ. މުޢިއްޒު ވިދާޅުވިއެވެ.
އެހެންކަމުން އެމަނިކުފާނުގެ ސަރުކާރަކީ ވަރަށް ޒިންމާދާރު ސަރުކާރެއްކަން ކަށަވަރުކޮށްދެއްވާނެކަމަށާއި، އެމަނިކުފާނުގެ ސަރުކާރެއްގައި ކަންކަން ފޮރުވިފައި ނުހުންނާނެކަމަށް ޑރ. މުޢިއްޒު ވިދާޅުވިއެވެ.
ކޯޓުން ކޮށްފައިވާ ހުކުމަކަށް ޔާމީނު މިނިވަންކޮށް ހެޔަށް ބަދަލު ކުރާނޭ ބުނިބުނުން ޖޭއެސްސީ އަށް އަތްނުބާނާ މިނިވަން ކުރެވިދާނެބާ އެއީ އިންސާފް ގާއިމްކުރުމުގެ ބާރަށް އަތްބޭނުމެއް ނޫންބާ ޖަލަށް ބުކުމް ކޮށްފަވާ މީހަކު ގޭބަންދަށް ބަދަލުކުރުން އެއީ އަތްބޭނުމެއް ނުވަތަ ބާރުގެ ބޭނުން ކުރުމެއް ނޫންބާ