ސަލްމާން ޚާން ދެކެ އައިސްފައިހުރި ރުޅިގަނޑު އެންމެފަހުން "ކަޕިލް ޝަރްމާ ޝޯ" އަށް!
ބޮލީވުޑްގެ އެކްޓަރ ސުޝާންތު ސިންގް ރާޖްޕޫތުގެ މަރަށްފަހު އިންޑިއާގެ ގިނަ މީހުން އަންނަނީ ބޮލީވުޑްގެ އެހެން ބައެއް ފަންނާނުންގެ ފިލްމްތަކާއި އެ ފަންނާނުން ބައިވެރިވާ ޝޯތައް ވެސް ބޯއިކޮޓް ކުރަމުންނެވެ.
އެގޮތުން އެންމެ ގިނަ މީހުން މިހާތަނަށް ބޯއިކޮޓް ކޮށްފައިވާ އެކަކީ އާލިއާ ބަޓް އެވެ. މަހޭޝް ބަޓް ދެކެ އައިސްފައިހުރި ރުޅިގަނޑު އޭނާގެ ދަރި އާލިއާއަށް ވެސް ގިނަ މީހުން ބާލާލަނީ، އެމީހުންނަކީ ސުޝާންތުގެ ކުރިމަގަށް އެޅުނު ހުރަހެއް ކަމަށާއި ނަފްސާނީ ގޮތުންވެސް އެމީހުން ސުޝާންތަށް ގެއްލުން ދިން ކަމަށް ބުނަމުންނެވެ.
ސުޝާންތުގެ މަރާއި ގުޅިގެން ބޯއިކޮޓު ކުރި ލިސްޓަށް ދާދި ފަހުން މިވަނީ "ދަ ކަޕިލް ޝަރްމާ ޝޯ" ވެސް އިތުރުވެފައެވެ. އިންޑިއާގެ ގިނަ ބައެއްގެ މަގުބޫލުކަން ލިބިފައިވާ ކޮމީޑިއަން ކަޕިލް ޝަރްމާ ހުށަހަޅައިދޭ މި ޝޯވ، ކުއްލިއަކަށް ބޯއިކޮޓް ކުރުމަށް ބައެއް މީހުން ގޮވާލީ އެންމެ ސަބަބަކާއި ހެދިއެވެ.
ދާދި ފަހުން އެނގިފައިވާ ގޮތުގައި ކަޕިލް ޝަރްމާ ޝޯއަކީ ބޮލީވުޑްގެ އެކްޓަރ ސަލްމާން ޚާން ކޯ-ޕްރޮޑިއުސް ކޮށްފައިވާ ޝޯއެކެވެ. ސުޝާންތުގެ މަރުގެ މައްސަލައިގައި އިންޑިއާގެ ގިނަ މީހުން ނުރުހުން ފާޅު ކުރަމުން އަންނަ މީހުންގެ ލިސްޓުގެ އެންމެ ކުރީގައި ސަލްމާން ޚާން ވެސް ވެއެވެ.
އެގޮތުން ސަލްމާން ޚާން މިފަހަކަށް އައިސް ކޮންމެ ކަމެއް ކުރިޔަސް އެކަމާއި ފާޑުކިޔާ މީހުން އިންތިހާއަށް ގިނައެވެ. ކޮވިޑުން ރައްކާތެރިވުމުގެ ގޮތުން ސަލްމާން ޚާން ވަނީ "ބިއިންގ ހިއުމަން" ބްރޭންޑުގެ މާސްކުތަކެއް ވެސް ލޯންޗު ކުރުމުން ވެސް ގިނަބަޔަކު އެކަމަށް ފާޑުކިޔާ، އަހާފައި ވަނީ ސަލްމާން ޚާން އަކީ "ހިއުމަން" (އިންސާނެއް) ތޯއެވެ.
ސުޝާންތުގެ ފޭނުން ފޭސްބުކްގައި ވަނީ "ޖަސްޓިސް ފޮ ސުޝާންތު ސިންގް ރާޖްޕޫތު" ނަމުގައި ގްރޫޕެއް ވެސް ހަދާފައެވެ. އެގްރޫޕަށް މީހަކު ކުރި ޕޯސްޓެއްގައި ބުނެފައިވަނީ ކަޕިލް ޝަރްމާ ޝޯއަކީ ސަލްމާން ޚާން ކޯޕްރޮޑިއުސް ކުރާ ޝޯއެއް ކަމަށާއި، ސަލްމާން ޚާންގެ ފިލްމުތަކާއި އެހެނިހެން އެއްޗެހި ބޯއިކޮޓް ކުރާއިރު، މިޝޯ ވެސް ބޯއިކޮޓް ކުރަން ޖެހޭ ކަމަށެވެ.
މިހާރުވެސް 91،000 އަށްވުރެ ގިނަ މެންބަރުން ހިމެނޭ އެގްރޫޕުން ގިނަ މީހުން ވަނީ މިނިންމުމަށް ތާއީދުކޮށް ކަޕިލް ޝަރްމާ ޝޯ ބޯއިކޮޓް ކުރަން ޖެހޭ ކަމަށް އެއްބަސް ވެފައެވެ.
