ޕާޓީ ބައިބައިކޮށް ވެރިކަން ބަލިކަށި ކުރަން މަސައްކަތް ކުރުމަކީ ޤައުމީ ވިސްނުމެއް ނޫން: އާޒިމާ

ޕާޓީ ބައިބައިކޮށް ވެރިކަން ބަލިކަށި ކުރަން މަސައްކަތް ކުރުމަކީ ޤައުމީ ވިސްނުމެއް ނޫން ކަމަށް ވިދާޅުވެ ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ކުރީގެ ވަޒީރު މަލީހު ޖަމާލަށް ރައްދު ދެެއްވައިފިއެވެ.

Ads by STELCO

އާޒިމާ ފޭސްބުުކުގައި ކުރެއްވި ޕޯސްޓެއްގައި މިހެން ވިދާޅުވެފައި މިވަނީ ޕީޕީއެމް އޮފީހުގައި ރޭ ބޭއްވި ނޫސްވެރިންގެ ބައްދަލުވުމުގައި ޕާޓީ ބާރަށް ހިނގައިގަތުމަށް 13 މެމްބަރުންގެ ސްޓިއަރިން ކޮމިޓީއެއް އެކުލަވާލި ކަމަށް މަލީހް ވިދާޅުވެފައި ވާތީއެވެ. ހަމަ އެހެންމެ ޕީޕީއެމް ހިންގުމަށް އެ ޕާޓީގެ ލީޑަޝިޕްގެ ބޭފުޅުންގެ ބައިވެރިވުމެއް އަދި ސެނެޓްގެ ބަހެއް ނެތި ރައީސް ޔާމީން ސްޓިއަރިން ކޮމިޓީއެއް އުފެއްދެވި މައްސަލަ ހޫނުވެފައި ވަނިކޮށެވެ. އަދި މި މައްސަލައާ ގުޅިގެން މަލީހް މިއަދު ވިދާޅުވެފައި ވަނީ މަސައްކަތް ކުރަމުން މިގެންދަނީ ސީދާ ރައީސް ޔާމީންގެ އޯޑަރަށް ކަމަށެވެ.

އެހެންކަމުން މި މައްސަލައާއި ގުޅިގެން ޕީޕީއެމް/ޕީއެންސީގެ އަސާސީ ޤަވައިދާ ޚިލާފަށް ޕީޕީއެމް ބަދުނާމް ކުރައްވައި ޕާޓީ ބައިބައި ކުރުމުގެ މަސައްކަތެއް ކުރައްވަމުން ގެންދަވާ ކަމަށް ބުނެ މަލީހް ޕީޕީއެމްގެ ހަރަކާތްތަކުން ސަސްޕެންޑުކޮށް އޭނާގެ މައްސަލަ އެ ޕާޓީގެ ސުލޫކީ ކޮމިޓީ އަށް މިއަދު ވަނީ ފޮނުވާފައެވެ.

އެގޮތުން މިކަމަށް އިޝާރާތް ކުރައްވާ އާޒިމާ ފޭސްބުކުގައި ކުރެއްވި ޕޯސްޓެއްގައި މަލީހުއަށް ރައްދު ދެއްވާ ވިދާޅުވީ ފަނާ ފަނާކުރަނިވި އަހަރުތަކަކަށްފަހު ޕީޕީއެމް/ޕީއެންސީގެ މިންނަތް މަސައްކަތުން ﷲގެ ވާގިފުޅާއެކު އުންމީދި ވެރިކަމެއް ގެނެވިއްޖެ ކަމަށެވެ.

ޕާޓީބައިބައިކޮށް ވެރިކަން ބަލިކަށި ކުރަން މަސައްކަތް ކުރެއްވުމަކީ ޤައުމީ ވިސްނުމެއް ނޫން ކަމަށާއި މިކަމުން ދެރަވާނީ ޤައުމަށާއި ރައްޔިތުންނަށް ކަމަށް އާޒިމާ ވަނީ ވިދާޅުވެފައެވެ.