ރެސްޓޯރެންޓެއްގެ އެތެރޭގައި ކަރީނާ އަވި އައިނެއް އަޅައިގެން އިނުމުން ގިނަ ބައެއްގެ ފާޑުކިޔުން
ބޮލީވުޑްގެ މަޝްހޫރު އެކްޓްރެސް ކަރީނާ ކަޕޫރް ޚާން ރެސްޓޯރަންޓެއްގެ އެތެރޭގައި އަވި އައިނެއް އަޅައިގެން އިނުމުން ގިނަ ބައެއްގެ ފާޑު ކިޔުން އޭނާއަށް އަމާޒު ވެއްޖެއެވެ.
ކަރީނާ އިއްޔެ އޭނާގެ އިންސްޓަގްރާމްގައި ޕޯސްޓު ކޮށްފައިވާ ފޮޓޯއަކުން ފެންނަނީ ރެސްޓޯރެންޓެއްގައި މެނޫއަކަށް ބަލަން އޭނާ އިންނަ މަންޒަރެވެ. ނޫ ކުލައިގެ ޖިންސަކާއި ރޮނގު ދެމި ގަމީހެއް ލައިގެން އިން އިރު އުނަގަނޑުގައި ކަޅު ކުލައިގެ ޖެކެޓެއްވެސް އައްސާފައިވެއެވެ.ނަމަވެސް ގިނަ މީހުން އަޅައިގަތީ ކަރީނާ އަޅައިގެން އިން ކަޅު ކުލައިގެ އަވި އައިނުގައެވެ.
އެގޮތުން އެއްބަޔަކު ސުވާލު ކޮށްފައިވަނީ ތަނެއްގެ އެތެރޭގައި އިންނައިރު އަވި އައިނު އަޅާނީ ކާކުތޯ އެވެ. އެސުވާލުގެ ޖަވާބަށް އެކަކު ބުނެފައިވަނީ "އެވާނީ ރެސްޓޯރަންޓުގެ އަލިން މާބޮޑަށް ލޮލަށް އަސަރު ކުރާތީ ކަމަށް" ކަމަށެވެ.
ބައެއް މީހުން ބުނެފައިވަނީ ކަރީނާ އެގޮތަށް ކަންތައް އެކުރީ މިހާރު އުމުރުން ދުވަސްވާތީ ކަމަށެވެ.
ބޮލީވުޑްގެ ގިނަ އެކްޓަރުންނަކީ އެމީހުންގެ ފޭނުން އިންތިހާއަށް ގިނަ ނަމަވެސް، އެމީހުންނަށް ހަޖޫ ޖަހާ ގަނާ ކުރާ މީހުން ވެސް އިންތިހާއަށް ގިނަ ބައެކެވެ. އެގޮތުން ބައެއް ތަރިންނާއި ދިމާލަށް ބައެއް މީހުން ވަރަށް އިހާނެތި ބަސްތައް ވެސް ބުނެފައިވެއެވެ.ކަރީނާ އަކީ ވެސް އެފަދަ މީހުންގެ ޓާގެޓަކަށް އަބަދުވެސް ވެފައިވާ މީހެކެވެ. މީގެކުރިން އެކްޓަރ ޝާހިދު ކަޕޫރާއި ކަރީނާ ލޯބީގެ ގޮތުން ގުޅިގެން އުޅުމުން ބައެއް މީހުން ބުނެފައިވަނީ ޝާހިދު އަކީ ކޮއްކޮއެއް ކަމުގައިދެކި "ރާކީ" ބަނުމަށެވެ.
އެއަށްފަހު ސައިފް އަލީ ޚާން އާއި ކަރީނާ ކައިވެނި ކުރުމުން ހަޖޫ ޖެހި މީހުން ބުނެފައިވަނީ ބައްޕަ އުމުރު މީހަކާއި ކައިވެނި ކުރީ ކަމަށެވެ. އެދެމަފިރިންގެ ފުރަތަމަ ދަރިފުޅު ތައިމޫރަށް ކަރީނާ ބަލިވެއިން އިރު، ބަރުދަން އިންތިހާއަށް އިތުރުވުމުން ބައެއް މީހުން ވަނީ ކަރީނާގެ ސިފައަށް ވެސް ޖޯކު ޖަހާފައެވެ.
