ދައްކާ ވާހަކައަށް ޒިންމާ ވާނަން, މަސައްކަތް ކުރަނީ އިހްލާސްތެރި, ތެދުވެރި ނިޔަތެއްގަ: ރައީސް
ދައްކާ ވާހަކައަށް ޒިންމާ ވާނެ ކަމަށާއި މަސައްކަތް ކުރައްވަނީ ވަރަށް އިހްލާސްތެރި, ތެދުވެރި ނިޔަތެއްގައި ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ކަމުގެ މަޤާމާ ހަވާލުވެވަޑައިގެންނެވުމަށް ފަހު އަތޮޅުތަކަށް ކުރައްވާ ފުރަތަމަ ދަތުރުފުޅުގެ ތެރެއިން ދިޔަމިގިއްޔަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ސަރުކަރުން ބޭނުންވަނީ ކޮންމެ ރައްޔިތަކަށް އިގްތިސޯދީގޮތުން މުއްސަނދިކަން ލިބިގެން ދިއުން ކަމަށެވެ.
އަދި ރައްޔިތުންނަށް ދޭ ބޭނުންވާ ޔަގީންކަމަކީ ތަރައްގީއަށްޓަކައި ކުރަންޖެހޭ ކަންކަމުގައި ވަރަށް ސަމާލުކަން ދެއްވާނެ ކަމަށް ކަމަށާއި ދައްކާ ވާހަކަތަކަށް ފުރިހަމައަށް ޒިންމާ ވާނެ ކަމަށް ރައީސް ވިދާޅުވިއެވެ.
"އަޅުގަނޑު ޒިންމާ ވާން ބޭނުން, ޒިންމާ ވާނަން ދައްކާ ވާހަކައަށް. ޤައުމުގެ ހާލަތު މިއޮތީ އަޅުގަނޑުމެންނަށް ވާރުދަވެފަ. ވަރަށް ދެރަ ނިކަމެތި ހާލަތެއްގަ. އަޅުގަނޑުމެންގެ ދަރަނި މިހިރަ ހިސާބުން އެބަޖެހޭ ކަންތައްތަކެއް ކުރަން" ރައީސް ވިދާޅުވިއެވެ.
މީގެ އިތުރުން އެ ރަށުގެ ތަރައްގީއަށްޓަކައި ބޭނުންވާ ގިނަ ކަންތައްތަކެއް އެބަހުރި ކަމަށާއި ކެމްޕެއިން ތެރޭގައި ހުށަހެޅި ކަންތައްތައްވެސް ހުރި ކަމަށެވެ. އެ މަސައްކަތްތައް ފެށުމަށް އެކަމާ ގުޅުން ހުރި މިނިސްޓްރީތަކާ މަޝްވަރާކޮށްގެން ކައުންސިލުން މަޝްރޫއުތައް ކުރިއަށްގެންދަން ބޭނުންވާ ތަރުތީބު އެކުލަވާލުމަށް ރައީސް ވަނީ އެދިވަޑައިގެންފައެވެ.
ރައީސުލްޖުމްހޫރިއްޔާ ތ. އަތޮޅުގެ ބައެއް ރަށްރަށަށް މިއަދު ފެއްޓެވި 3 ދުވަހުގެ މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ.
