ރައީސް މިއަދު ޤައުމާ މުހާތަބު ކުރައްވަނީ
މިއަދު ފާހަގަކުރާ ޝަހީދުންގެ ދުވަހާއި ގުޅުވައިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޤައުމާ މުހާތަބު ކުރައްވާނެއެވެ.
އެމަނިކުފާނު ޤައުމާ މުހާތަބު ކުރައްވާނީ މިއަދު ހެނދުނު 10:00 ގައެވެ.
ޝަހީދުންގެ ދުވަސް ފާހަގަކުރަނީ ޤައުމަށްޓަކައި ޝަހީދުވެ ގޮސްފައިވާ ޤައުމީ އަބްޠާލުންގެ ޚިދުމަތްތަކުގެ ހަނދާންކޮށް، އެ އަބްޠާލުންގެ ޒިކުރާ އާކުރުމަށެވެ. ޝަހީދުންގެ ދުވަހުގެ ގޮތުގައި ފާހަގަކުރަނީ ޝަޢުބާން މަހުގެ އެއްވަނަ ދުވަހެވެ.
ޝަހީދުންގެ ދުވަހަކީ މީގެ އަހަރުތަކެއް ކުރިން ފެށިގެން ރާއްޖޭގައި ފާހަގަކުރަމުން އަންނަ ދުވަހެކެވެ. މި ދުވަސް ފާހަގަކުރެއްވުމަށް ޤައުމީ ފެންވަރުގައި ކޮންމެ އަހަރަކު ޖަލްސާއެއް ބާއްވައި، ޝަހީދުންގެ ޒިކުރާ އައުކޮށް، އެމީހުންގެ ޖިހާދުން ހިއްވަރު ލިބިގަތުމަށާއި ދިވެހިންގެ އެއްބައިވަންތަކަމުގެ ސަފުތައް ވަރުގަދަކުރުމަށް ބާރުއަޅަމުން ގެންދެއެވެ.
Ads by STO
