ސުންގަޑި ހަމަވިއިރު މަޖިލިސް އިންތިހާބަށް ހުށަހެޅީ 381 ފޯމް
ރައްޔިތުންގެ މަޖިލީހުގެ އިންތިހާބަށް ކުރިމަތިލާން ހުޅުވާލި ސުންގަޑި މިއަދު ހަމަވިއިރު 381 ފޯމް ހުށައަޅާފައިވާ ކަމަށް އިލްކެޝަން ކޮމިޝަން (އީސީ) ބުނެފިއެވެ.
އެ ކޮމިޝަންގެ ރައީސް ފުއާދު ތައުފީގު ވިދާޅުވީ ސުންގަޑި ހަމަވި އިރު ހުށަހެޅި 381 ފޯމްގެ ތެރެއިން ބައެއް ފޯމް ފަހަރުގައި ރިޖެޓްވުމަކީ އެކަށީގެންވާ ކަމެއް ކަމަށެވެ.
ފުއާދު ވިދާޅުވީ ކުށުގެ ރިކޯޑާއި އެހެންނިހެން ލިޔެކިޔުންތައް ހަމަ ނޫންނަމަ އެފޯމެއް ބަލައި ނުގަންނާނެ ކަމަށެވެ.
މަޖިލިސް އިންތިހާބަށް އެންމެ ގިނަ ކެންޑިޑޭޓުން ނެރެނީ ސަރުކާރު ހިންގާ ކޯލިޝަން ޕީޕީއެމް ޕީއެންސީނެވެ. އެ ކޯލިޝަނުން 90 ކެންޑިޑޭޓުން ކުރިމަތިލާއިރު އެމްޑީޕީން 89 ކެންޑިޑޭޓުން، ޑިމޮކްރެޓްސް 41 ކެންޑިޑޭޓުން، ޕީއެންއެފް އިން 49 ކެންޑިޑޭޓުން، އަދާލަތުން 4 ކެންޑިޑޭޓުން އަދި ޖުމްހޫރީ ޕާޓީން 10 ކެންޑިޑޭޓުން ވާދަކުރަން ވަނީ ފޯމު ހުށަހަޅާފައެވެ.
މިއަހަރުގެ މަޖިލިސް އިންތިޚާބު ބޭއްވުމަށް އިލެކްޝަންސް އިން ނިންމަވާފައިވަނީ އަންނަ މާރިޗު މަހުގެ 17 ގައެވެ. ނަމަވެސް މަޖިލީހުގެ އިންތިހާބު ރޯދަ މަސް ނިމޭތާ ދިހަ ދުވަސް ފަހުން ބާއްވަން ރައްޔިތުން މަޖިލީހުން މިހާރު ވަނީ ފާސްކޮށްފައެވެ.
