ޕީއެންއެފް އުފައްދަން 3060 ފޯމު ހުށަހަޅައިފި

ޕީޕަލްސް ނޭޝަނަލް ފްރަންޓް (ޕީއެންއެފް)ގެ ނަމުގައި ސިޔާސީ ޕާޓީއެއް އުފެއްދުމަށް 3060 ފޯމު ހުށަހަޅައިފިއެވެ.

Ads by Hajj Corporation

އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު އެކްސްގައި ކުރެއްވި ޕޯސްޓެއްގައި ވިދާޅުވީ ޕީއެންއެފް އުފެއްދުމަށް ސިޔާސީ ޕާޓީގެ ޤާނޫނުގައި ބަޔާންކުރާ މުއްދަތުގެ ތެރޭގައި ހުށަހަޅަން ޖެހޭ އަދަދަށް ފޯމު ހުށަހަޅާފައިވާ ކަމަށެވެ. އެ ފޯމުތަކުގެ ސައްޙަކަން ކަށަވަރު ކުރުމުގެ މަސައްކަތް ފަށްޓަވާފައިވާ ކަމަށް ވެސް ހަބީބު ވިދާޅުވިއެވެ.

އަދި މިހާރު ހުށަހަޅާފައިވާ ފޯމުތަކުގެ ތެރެއިން 3000 މެންބަރުންގެ ފޯމުގެ ސައްޙަކަން ކަށަވަރުވުމާއެކު ލަސްނުވެ ޕީއެންއެފް އުފެއްދުމަށް ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން ދެއްވާނެ ކަމަށް ވެސް ހަބީބު ވިދާޅުވިއެވެ.

ޕީއެންއެފް އުފެއްދުމަށް އިލެކްޝަންސް ކޮމިޝަނަށް މިދިޔަ އަހަރުގެ ނޮވެމްބަރު މަހު ހުށަހެޅުއްވީ ކުރީގެ ރައީސް ޢަބްދުﷲ ޔާމީން އަބްދުލްޤައްޔޫމްގެ ދަރިކަލުން ޒެއިން ޢަބްދުﷲ ޔާމީނެވެ.