މަޖިލިސް އިންތިޚާބުގައި އަލުން ރީރަޖިސްޓްރީވުމުގެ ފުރުސަތު މިމަހުގެ 14ގައި ހުޅުވާލަނީ
ރައްޔިތުންގެ މަޖިލީހުގެ އިންތިޚާބު ފަސްވުމާއި ގުޅިގެން، މިހާރު ވޯޓުލުމަށް ރަޖިސްޓްރީވެފައި އޮތް ތަން ނޫން އެހެން ތަނަކަށް ރަޖިސްޓްރީ ވާން ބޭނުންވާ ފަރާތްތަކަށް އެ ފުރުސަތު މިމަހުގެ 14 ގައި ހުޅުވާލާނެ ކަމަށް އިލެކްޝަންސް ކޮމިޝަން (އީސީ)އިން ވިދަޅުވެެއްޖެއެެވެ.
އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ 21 އޭޕްރީލްގައި އިންތިޚާބު ބޭއްވުމަށް ނިންމުމާ ގުޅިގެން މިމަހުގެ 14 ގައި ރީ-ރަޖިސްޓްރީވުމަށް އަލުން ހުޅުވާލާނެ ކަމަށެވެ.
"ރީ-ރަޖިސްޓްރޭޝަނަށް އިތުރު ފުރުސަތެއް މިހުޅުވާލަނީ މިމަހުގެ 14 ވަނަ ދުވަހު. އިތުރު ފުރުސަތެއް މިދެނީ ތިން ދުވަސް" ޒަކަރިއްޔާ ވިދާޅުވިއެވެ.
ރޯދަ މަހުގެ ދުވަހަކަށް އިންތިހާބު ދިމާވާތީ، ގާނޫނަށް އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގު ކުރެއްވުމުން އިލެކްޝަންސް ކޮމިޝަނުން ނިންމާފައި ވަނީ އަންނަ އޭޕްރިލް މަހުގެ 21 ގައި ވޯޓުލުން ކުރިޔަށް ގެންދިއުމަށެވެ.
އިންތިހާބު އެ ދުވަހަށް ފަސްކުރުމާއެކު އަލަށް 560 ފަރާތަކަށް 18 އަހަރު ފުރި ވޯޓުލުމުގެ ހައްގު ލިބޭނެއެވެ.
