އާބާދީގެ ނިސްބަތުން ބަލާއިރު، މުޅި ދުނިޔެއިންވެސް 16 ވަނައަށް އެންމެ ގިނަ މީހުން ފައްސިވި ޤައުމަކަށް ރާއްޖެ
ރާއްޖޭގެ ކޮވިޑްގެ ހާލަތު ދުވަހެއް ދުވަހަކަށް މިދަނީ ނުރައްކާ ވަމުންނެވެ. ކޮންމެ ދުވަހަކު އެތައް ދިވެހިންނަކާއި ބިދޭސީންނަށް މި ބަލި ޖެހެމުންދާއިރު، ރާއްޖޭގައި އިއްޔެއާ ހަަމައަށް 7,804 މީހުންނަށް ވަނީ މިބަލި ޖެހިފައެވެ. މިއާއެކު ރާއްޖެ ވެގެން ގޮސްފައިވަނީ މުޅި ދުނިޔެއަށް ބަލާއިރު، އާބާދީގެ ނިސްބަތުން 16 ވަނައަށް އެންމެ ގިނަ މީހުން ފައްސިވި ޤައުމަށެވެ.
ކޮވިޑް ކޭސްތަކުގެ އަޕްޑޭޓް ގެެނެސްދޭ ސައިޓެއް ކަމަށްވާ، ވޯލްޑްމީޓަރ އިން ރިޕޯޓްކޮށްފައިވާ ގޮތުގައި ރާއްޖޭގެ ކޮންމެ 69 މީހަކުން އެކަކަށް ވަނީ މިބަލި ޖެހިފައެވެ. އެ ސައިޓުގެ ޑޭޓާއިން ދައްކާގޮތުގައި، ރާއްޖޭގެ މިހާރުގެ އާބާދީއަކީ 542,099 އެވެ.
އާބާދީގެ ނިސްބަތުން މުޅި ދުނިޔެއިން ކޮވިޑްގެ ހާލަތު އެންމެ ނުރައްކާ ޤައުމަކީ، ޤަތަރެވެ. މިޤައުމުން މިބައްޔަށް 118,778 ފައްސިވެފައިވާއިރު. އެޤައުމުގެ އާބާދީއަކީ، 2,807,805 އެވެ.
މިހާތަނަށް ރާއްޖެއިން ކޮވިޑް ޖެހިގެން 29 މީހަކު ނިޔާވެފައިވާއިރު، ރާއްޖޭގެ ބެޑް އޮކިއުޕެންސީ ހުރީ 62 އިންސައްތައިގައެވެ. އަދި 172 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ. ރާއްޖޭގެ 31 ރަށަކުން ކޮރޯނާ ވައިރަސް މިހާރު ފެނިފައިވާއިރު، 15 ރިސޯޓަކުންވެސް މިބަލި ވަނީ ފެނިފައެވެ.
