ރިޕޯޓްމިފަހަރު ހުސް ގޮނޑިއެއް ނެތް، ކިހިލި ޖަހައިލީ 71 ގޮނޑި

ނިމިދިޔަ 2023 ވަނަ އަހަރުގެ ރިޔާސީ އިންތިހާބަށްފަހު ސިޔާސީ މައިދާންތަކުގައި އެންމެ ބާރަށް ދެކެވުނު އެއް ވާހަކައަކީ ހުސް ގޮނޑިއެއް ދައްކައިގެން ވެރިކަމަށް އައި ވާހަކަ އެވެ. ސާފުކޮށް ދަންނަވާނަމަ ޖަލު ބަންދެއްގައި ހުންނެވި ކުރީގެ ރައީސް އަބްދުﷲ ޔާމީންގެ ފޮޓޯފުޅު ދައްކަވައިގެން އެމަނިކުފާނަށް ހާއްސަކޮށްފައިވާ ހުސް ގޮނޑިއެއް ޖަލްސާތަކުގައި ބަހައްޓައިގެން ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ވާހަކަ އެވެ. ވޭތުވެދިޔަ 6 މަހެއްހާ ދުވަހު މެދު ނުކެނޑި މިވާހަކަ އެކި ފަހަރުމަތިން އެކި ގޮތްގޮތަށް ވަނީ މީޑިއާތަކުގައި ދައްކައިފަ އެވެ.
އާދިއްތަ ދުވަހު ނިމިގެންދިޔަ ރައްޔިތުންގެ މަޖިލީހުގެ އިންތިހާބާއިއެކު މިވާހަކައަށް މިވަނީ ނިމުމެއް އައިސްފަ އެވެ. ރައީސް ޑރ. މުއިއްޒު ގިނިކަންޏާ ނިކުމެވަޑައިގެން އިއްޔެ ކާމިޔާބު ކުރެއްވީ ރާއްޖޭގެ 71 ދާއިރާއެއްގެ މަޖިލިސް ގޮނޑި އެވެ. މިއީ މުޅި މަޖިލީހުގެ ތިންބައިކުޅަ ދެ ބަޔަށްވުރެއް ބޮޑު އަދަދެކެވެ. މިކާމިޔާބީ އަކީ ޕީއެންސީފަދަ އުމުރުން ހަގު ޕާޓީއަކަށް ލިބުނު ތާރީހީ ކާމިޔާބީ އެކެވެ.
ރައީސް ޑރ. މުއިއްޒުއަށް ރިޔާސީ އިންތިހާބުގެ ޓިކެޓު ލިބިވަޑައިގެންނެވީ ވަރަށް ހަނި ފުރުސަތެއްގެ ތެރެއިންނެވެ. ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަ ނުކުރެއްވޭގޮތް މެދުވެރިވުމުން ޕީއެންސީގެ ސެނެޓަރުންގެ މެދުގައި ނެގި ވޯޓު އަގުލަބިއްޔަތު ހޯއްދަވައިގެން ޑރ. މުއިއްޒު އެޕާޓީގެ ރިޔާސީ ޓިކެޓު ހޯއްދެވި އެވެ. އެއަށްފަހު އެޕާޓީން ރިޔާސީ އިންތިހާބުގެ ދެވަނަ ބުރުގައި ބޮޑު ނަތީޖާއަކުން އޭރުގެ ރައީސް އިބްރާހިމް މުހައްމަދު ޞާލިހު ބަލިކުރެއްވި އެވެ.
ރައީސް މުއިއްޒުގެ ކާމިޔާބީގެ ސިއްރު
ޑރ. މުއިއްޒުގެ ރިޔާސީ ދައުރު ފެށިގެން ދިޔުމަށްފަހު ފެނުނީ ޕީއެންސީ އިތުރަށް ވަރުގަދަވެގެން ދިޔަ ތަނެވެ. އެގޮތުން އެޕާޓީއަށް މެމްބަރުން އިތުރު ކުރުމާއި މަޖިލިސް އިންތިހާބުގައި އެޕާޓީގެ ފަރާތުން ހުރިހާ ދާއިރާއަކަށް މެމްބަރުން ނެރެން ރައީސް ނިންމެވި އެވެ. މަޖިލިސް އިންތިހާބުގެ ކެމްޕެއިންގައި ފެނިގެން ދިޔައީ އަމަލީ ގޮތުން ރައީސް މުއިއްޒު ނިކުމެވަޑައިގެން ހަރަކާތްތެރިވީ މަންޒަރެވެ. ރަމަޟާން މަހުގެ ތެރޭގައާއި އޭގެ ފަހުންވެސް ރަށްތަކަށް ވަޑައިގެންނެވި މަންޒަރެވެ. ރައްޔިތުންގެ މެދުގައި އެމަނިކުފާނަށް އޮތް މަގުބޫލުކަން ދުވަހެއް ދުވަހަށް ދިޔައީ އިތުރުވަމުންނެވެ.
މިފަހަރުގެ އިންތިހާބު ޕީއެންސީއަށް ކާމިޔާބުވުމުގެ އެންމެ ބޮޑު އެއް ސިއްރަކީ އިންޑިއާ ސިފައިން ދިވެހި ފަސްގަނޑުން ބޭލުމަށް ރައީސް މުއިއްޒު ވެވަޑައިގެންނެވި ވައުދު ފުއްދެވުމެވެ. އެގޮތުން ލިޔުންތަކެއް ތައްޔާރު ކުރެވި އެލިޔުންތަކުގައި ދެގައުމުން އެއްބަސްވެފައިވާ ގޮތަށް ސިފައިން ދިޔައީ ބާލަމުންނެވެ. އަންނަ މަހު އިންޑިއާ ސިފައިންގެ އެންމެ ފަހު ބެޗު ރާއްޖެއިން ފައިބާނެ އެވެ.
މީގެ އިތުރުން ރައީސް މުއިއްޒުގެ އިގްތިޞާދީ ސިޔާސަތަށް ރައްޔިތުންގެ ފަރާތުން ލިބުނު ތާއީދު ވަރަށް ބޮޑެވެ. ރާއްޖެ ބޮޑު ދަރަންޏެއްގެ ތެރޭގައި ވަނިކޮށް ސަރުކާރުން އެކުލަވައިލީ ހަރުދަނާ އިގްތިޞާދީ ޕްލޭން އެކެވެ. އެގޮތުން އަހަރުގެ ފުރަތަމަ ހަ މަސްދުވަހު ކުދި މަޝްރޫއުތައް ފަށައި ބޮޑެތި މަޝްރޫއުތައް އަހަރުގެ މެދުތެރޭގައި ފެށުމަށް ރައީސް ނިންމެވި ނިންމެވުމަށް އިގްތިޞާދީ މާހިރުންގެވެސް ތައުރީފު ލިބުނެވެ.
ދެން އޮތީ ރައީސް މުއިއްޒު ވެވަޑައިގެންނެވި ވައުދާއި ހިލާފު ނުވުމުގެ ވާހަކަ އެވެ. ވެރިކަން ބަދަލުވިއިރު މާލެ ސަރަހައްދުން ގިނަ އަދަދެއްގެ ބިމާއި ފްލެޓުތައް ދޭން ލިސްޓުތަކެއް ހަދައި ލިޔުންތަކެއް ވަނީ ދޫކޮށްފަ އެވެ. ރިޔާސީ އިންތިހާބުގެ ކެމްޕެއިންގައި ރައީސް ވައުދުވެވަޑައިގެންނެވީ އެއިން އެއްވެސް ލިޔުމެއް ބާތިލް ނުކުރާނެ ކަމަށެވެ. އަދި ބިމާއި ފްލެޓު ލިބުނު އެއްވެސް މީހެއްގެ އަތުން އެތަކެތި އަތުނުލާނެ ކަމުގެ ވައުދެވެ. މި ވައުދު ފުއްދަވައި ރައީސް މުއިއްޒު ވަނީ އެމީހަކަށް ބިން ލިބުނު ތަނަކުން އެބިންތައް ދޭން ނިންމަވައި ދޫނުކޮށް ހުރި ލިޔުންތައްވެސް ދޫކޮށްފަ އެވެ. އަދި ކުރީ ސަރުކާރުގައި ފަށާފައިވާ ފްލެޓު މަޝްރޫއުތައް އިތުރަށް ހަލުވިކޮށް އާ މަޝްރޫއުތައް ފެށުމަށްވެސް ތައްޔާރުވެފަ އެވެ. މީގެ އިތުރުން ރަސްމާލޭގެ ނަމުގައި އާ މަޝްރޫއެއް ފެށުން ވެގެން ދިޔައީވެސް ރައްޔިތުންގެ ތާއީދު އިތުރުވި ކަމަކަށެވެ.
ބަދަލުވީ ސިޔާސީ ބޮޑު މަންޒަރު
އެމްޑީޕީގެ ބޮޑެތި ކިއްލާތައް ރާއްޖޭގެ ބައެއް ސަރަހައްދުތަކުގައި އެބަހުއްޓެވެ. މިސާލަކަށް ރައީސް ޞާލިހުގެ އާއިލާއިން ރަސްކަން ކުރަމުންދިޔަ ޅ. ހިންނަވަރު، އައްޑޫ ސިޓީ، ފުވައްމުލައް ސިޓީ، ކުޅުދުއްފުށި ސިޓީފަދަ ތަންތަނެވެ. މިފަހަރުގެ އިންތިހާބުގައި ރައީސް މުއިއްޒު ކާާމިޔާބު ކުރެއްވި 71 ގޮނޑީގެ ތެރޭގައި ސިޔާސީ މައިދާން މުޅިން ސިއްސުވައިލި ނަތީޖާތަކެއް އެބަ ހުއްޓެވެ.
އައްޑޫ ހިތަދޫ މަޖިލިސް ގޮނޑީގައި 20 އަހަރު ދުވަހު އިންނެވުމަށްފަހު ކުރީގެ މަޖިލިސް ރައީސް މުހައްމަދު އަސްލަމްއަށް މިވަނީ ގޮނޑި ގެއްލިފަ އެވެ. އަނެއްކޮޅުން އައްޑޫ ސިޓީން މެޖޯރިޓީ ނެގީވެސް ކޮންގްރެސް ޕާޓީންނެވެ. މިއާއެކު ފުވައްމުލައް ސިޓީ އަދި ކުޅުދުއްފުށި ސިޓީންވެސް މެޖޯރިޓީ ނެގި އެވެ. މިއީ ފަހުގެ ތާރީހެއްގައި ސިޔާސީ ގޮތުން އެއް ޕާޓީއަކުން މިވަރުގެ ކާމިޔާބީއެއް ހޯދި ފުރަތަމަ ފަހަރެވެ.
މީގެ އިތުރުން ރައީސް ޞާލިހު 25 އަހަރު މެމްބަރުކަން ކުރައްވައި ކޮއްކޯފުޅު ޖީހާން މަހަމޫދަށް މިދިޔަ ދައުރުގައި ހޯއްދަވައިދެއްވި ހިންނަވަރު ގޮނޑިވެސް މުޅިން އަލަށް އެމްޑީޕީ ނޫން ޕާޓީއަކުން މިވަނީ ހޯދައިފަ އެވެ. މިއީ ރައީސް މުއިއްޒުއަށް ލިބުނު ކާމިޔާބީއެއް އެކަންޏެއް ނޫނެވެ. އެމްޑީޕީއާއި ރައީސް ޞާލިހަށް ލިބުނު ބޮޑު ސިޔާސީ ނާކާމިޔާބީއެއްވެސް މެއެވެ.
ރައީސް މުއިއްޒުއާއި ދެކޮޅަށް ކުރީގެ ރައީސް އަބްދުﷲ ޔާމީން، ކުރީގެ ރައީސް މުހައްމަދު ނަޝީދު އަދި ކުރީގެ ރައީސް ޞާލިހުވެސް ކެނޑިޑޭޓުން ނެރުއްވި އެވެ. ރައީސް ޔާމީނަށާއި ރައީސް ނަޝީދަށް އެންމެ ގޮނޑިއެއްވެސް ނުލިބުނުއިރު ރައީސް ޞާލިހަށް ލިބިލެއްވީ އެންމެ 10 ގޮނޑި އެވެ. މިއާއެކު ދެން ސިޔާސީ ކުޅިބައި އަތުރާނެ ވެރިޔަކީ ޑރ. މުއިއްޒުކަން މިވަނީ ސާބިތުވެގެން ގޮސްފަ އެވެ.
ރައީސް މުއިއްޒުއަކީ ވަކި ބޭފުޅެއްގެ ގޮނޑި ކޮއްކޮއެއް ނޫންކަން ސާބިތުވެއްޖެ އެވެ. އިހުގައި ވެރިކަންކޮށް ބޮޑު ޕާޓީއެއްގެ ލީޑަރެއްގެ ގޮތުގައި ހުންނެވުމަކުން ސިޔާސީ ހަގީގަތް ބަދަލު ނުކުރެވޭނެ އެވެ. އޭރުވެސް ރައްޔިތުން ވޯޓު ދިނީ ހުސް ގޮނޑިއަކަށް ނޫނެވެ. ރައްޔިތުން ވޯޓު ދިނީ ރައީސް މުއިއްޒުއަށް ކުރެއްވި އިތުބާރެއްގެ ބޮޑުކަމުންނެވެ. ގައުމު ހަމަ މަގަށް ގެންދިޔުމުގެ ޒިންމާ އެންމެ ފުރިހަަމައަށް ނެންގެވޭނީ ރައީސް މުއިއްޒުކަމަށް ފެންނާތީ އެވެ. ރައީސް ޞާލިހުގެ ވެރިކަމުގައި ގޯސްކޮށް ދިޔަ ކަންކަން އަލުން ރަނގަޅު ކުރާށެވެ.
ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.