ކޮވިޑް-19: އަލްޙަމްދުލިﷲ. މިއަދު ބަލިން ރަނގަޅުވީ 145 މީހުން
ކޮވިޑް-19 އަށް ފައްސި މީހުންގެ ތެރެއިން މިއަދު ބަލިން ރަނގަޅުވެފައިވަނީ 145 މީހުންނެވެ.
"ދެން" އަށް މައުލޫމާތު ދެއްވަމުން ހެލްތު މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް ތަސްލީމާ އުސްމާން ވެސް ވިދާޅުވީ މިރޭ ބަލިން ފަސޭހަވީ މީހުންގެ އަދަދަކީ 145 ކަމަށެވެ.
މިރޭ އެޗްޕީއޭއިން މައުލޫމާތު ދީފައިވާ ގޮތުގައި އިއްޔެގެ އިރުއޮއްސި 18:00 ން މިއަދު ގެ އިރުއޮއްސި 18:00 އާއި ހަމައަށް 141 މީހުން ރާއްޖެއިން މިބައްޔަށް ފައްސި ވެފައިވެއެވެ. އޭގެ ތެރޭގައި ހިމެނެނީ 98 ދިވެހީންނާއި 43 ބިދޭސީންނެވެ.
ފައްސިވީ މީހުންގެ ތެރޭގައި، މާލެ ސަރަޙައްދުން 134 މީހުން ފައްސި ވެފައިވާއިރު އަތޮޅުތެރެއިން ފައްސިވީ 7 މީހެކެވެ.
މިއަދަދާއެކު ރާއްޖެއިން ކޮވިޑަށް ފައްސިވީ މީހުންގެ ޖުމްލަ އަދަދު މިވަނީ 8،281 އަށް އަރާފައެވެ.
އައިސޮލޭޝަން ފެސިލިޓީތަކުގައި މިބައްޔަށް ފަރުވާ ހޯދާ 1،304 މީހުން ތިބިއިރު، ހޮސްޕިޓަލުތަކުން ފަރުވާ ހޯދަމުންދަނީ 157 މީހެކެވެ.
މިހާތަނަށް ބަލާއިރު ރާއްޖެއިން މި ބަލިން ފަސޭހަވެފައިވަނީ ޖުމްލަ 5،483 މީހުންނެވެ. އަދި 29 މީހަކު މިބަލީގައި ނިޔާވެފައިވެއެވެ.
