ދިވެއްސަކަށް، ދިވެހިބަސް ނޭނގޭތީވެ ކޯޓުން ތަރުޖަމާނަކު ހަމަޖައްސައިދީފި
މުދަލަށް ގެއްލުން ދިނުމުގެ މައްސަލައެއްގައި ކްރިމިނަލް ކޯޓަށް ހާޒިރުކުރިި ދިވެހި ފިރިހެނަކަށް، ދިވެހި ބަސް ނޭނގޭ ކަމަށް ބުނުމުން ކޯޓުން އޭނާއަށް ތަރުޖަމާނަކު ހަމަޖައްސައިދީފިއެވެ.
ކްރިމިނަލް ކޯޓުން ނެރެފައިވާ އަމުރުގައިވާ ގޮތުން، އެކަން ހިނގާފައިވަނީ މިއަދުއެވެ.
އެ އަމުރުގައިވާ ގޮތުން ބިރުދެއްކުމާއި، މުދަލަށް ގެއްލުން ދިނުމުގެ މައްސަލައިގައި ބަންދާމެދު ގޮތެއް ނިންމުމަށް ކޯޓަށް ހާޒިރުކުރީ 39 އަހަރުގެ ދިވެހި ފިރިހެނެކެވެ. އޭނާގެ އެޑްރެސް އޮތީ މާލޭގައެވެ.
ޝަރީއަތުގެ މަޖިލީހުގައި އޭނާއަށް ދިވެހި ބަހުން ވާހަކަ ދައްކަން ނޭންގޭ ކަމަށާއި، ތަރުޖަމާނަކު ބޭނުންވާ ކަމަށް ބުނުމުން އެ ފުރުސަތު ދީފައިވާ ކަމަށް އެ އަމުރުގައި ބުނެފައިވެއެވެ. ނަމަވެސް، އެމީހާއަށް އެނގެނީ ކޮން ބަހެއްކަމާއި، ތަރުޖަމާ ކުރަން ބޭނުންވަނީ ކޮން ބަހެއްކަމެއް ކޯޓު އަމުރަކުން އެނގޭކަށް ނެތެވެ.
''ދިވެހި ބަހުން ވާހަކަ ދައްކަން ނޭނގޭ ކަމަށް ބުނެ ތަރުޖަމާނަކު ބޭނުންވާ ކަމަށް ބުނެފައިވާތީ އެ ފުރުސަތު ޝަރީއަތުން ދީފައިވޭ'' ކޯޓު އަމުރުގައިވެއެވެ.
މުދަލަށް ގެއްލުން ދިނުމުގެ މައްސަލައިގައި ކްރިމިނަލް ކޯޓުން ވަނީ، އޭނާ 24 ގަޑިއިރަށް ބަންދުކުރުމަށް ވެސް އަމުރުކޮށްފައިވެއެވެ.
