މާބަނޑު މީހާއަށް ގެވެށި އަނިޔާކުރި މައްސަލައިގައި އަދި މީހަކު ހައްޔަރެއް ނުކުރޭ
މާބަނޑު އަންހެނަކަށް އަނިޔާ ކުރާ ކަމަށް ބުނާ މައްސަލާގައި މީހަކު އަދި ހައްޔަރުކޮށްފައި ނުވާ ކަމަށް ފުލުހުން ވިދާޅުވެއްޖެއެވެ.
މި މައްސަލަ ފެންމަތިވެފައިވަނީ މިމަހުގެ 14 ވަނަ ދުވަހުއެވެ. ހަމްދާން ހަލީލް ނަމަކަށް ކިޔާ އައިޑީއަކުން ފޭސްބުކް ގައި ކުރި ޕޯސްޓެއްގައި ބުނީ، މާބަނޑު އަންހެނަކަށް އޭނާގެ ބައްޕަ އާއި ކުޑަ ކޮއްކޮގެ ފަރާތުން އަނިޔާ ލިބެމުންދާ ކަމަށެވެ.
އެ ޕޯސްޓްގައި އަނިޔާ ލިބިފައިވާ ފޮޓޯތަކެއް ވަނީ ހިއްސާކޮށްފައެވެ. އާއްމުކޮށްފައިވާ ފޮޓޯތަކުން އަތާއި ކަރުގައި ބައެއް ޒަހަމްތައް ހުރި ތަން ފެނެއެވެ.
ޕޯސްޓު ނިންމާލަމުން، އޭނާ ވަނީ އެ އަންހެން މީހާއަށް އިންސާފު ލިބޭނެތޯ މޯލްޑިވްސް ޕޮލިސް ސާވީސް ޓެގްކޮށް ސުވާލު އުފައްދާފައެވެ. އެ އަންހެން މީހާ ގުޅޭ އިތުރު ތަފްސީލެއް އެ ޕޯސްޓުގައެއް ނެތެވެ.
އަންހެން މީހާގެ މި ޕޯސްޓްް ފުލުހުންގެ ސަމާލުކަމަށް މީހަކު ގެނައުމުން ފުލުހުންގެ ތަރުޖަމާނު އަހްމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ މި މައްސަލައާއި ގުޅިގެން އެފަރާތާ، ފުލުހުން ފަރާތުން ވާހަކަ ދައްކައި, ކަން ހިނގާދިޔަގޮތް އޮޅުން ފިލުވާފައިވާ ކަމަށެވެ.
މިފަދަ ކަންކަން ތަކުރާރު ނުވާނެހެން، ރައްޔިތުންނަށް ސީދާގޮތުން ދެވޭ ޚިދުމަތްތަކުގެ ފެންވަރު މުރާޖާކޮށް ތަރައްގީކުރުމުގެ މަސައްކަތް ދިވެހި ފުލުހުންގެ ޚިދުމަތުން ކުރަމުންދާނެ ކަމަށް ޝިފާން ވިދާޅުވިއެވެ.
