ޓެކްސް ކޮމިޝަނަރުކަމާ ހަވާލުވާާން ޒަރީރު ބީއެމްއެލް ބޯޑުން އިސްތިއުފާ ދީފި
ބޭންކް އޮފް މޯލްޑިވްސް، ބީއެމްއެލް ޑިރެކްޓަރުންގެ ބޯޑުގެ ޗެއާޕާސަން ހަސަން ޒަރީރު އެ މަގާމުން މިއަދު އިސްތިއުފާ ދެއްވައިފި އެވެ.
ޒަރީރު އިސްތިއުފާ ދެއްވާފައި ވަނީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް އޭނާ އައްޔަނުކުރުމަށް ރައްޔިތުންގެ މަޖިލީހުން ރުހުން ދިނުމާއި ގުޅިގެން އެ މަގާމާއި ހަވާލުވެވަޑައިގެންނެވުމަށެވެ. ޒަރީރަށް މަޖިލީހުން ރުހުން ދިނީ މިމަހުގެ 14 ވަނަ ދުވަހު އެވެ.
ބީއެމްއެލް ޑިރެކްޓަރުންގެ ބޯޑުގެ ޗެއާޕާސަންގެ މަގާމަށް ޒަރީރު އައްޔަނު ކުރެއްވީ މިދިޔަ މާޗު މަހުގެ 25 ގަ އެވެ. އޭނާ އައްޔަނު ކުރީ ބޭންކުގެ އާންމު ޖަލްސާއެއްގަ އެވެ.
ބޭންކުގެ ހިންގާ ގަވައިދުގައިވާ ގޮތުން ބޭންކުގެ ބޯޑު އެކުލެވިގެންވަނީ ސަރުކާރުން އައްޔަންކުރާ އަށް މެންބަރުންނާއި އާންމު ހިއްސާދާރުންގެ ފަރާތުން ހޮވާ ތިން މެންބަރުންނާއެކު ޖުމްލަ 11 މެންބަރުންގެ މައްޗަށެވެ. ޒަރީރު ބޭންކުގެ ބޯޑުން އިސްތިއުފާ ދެއްވުމާއެކު، މިވަގުތު ބޭންކުގެ ބޯޑުގައި ތިއްބެވީ ޖުމްލަ ނުވަ ޑައިރެކްޓަރުންނެވެ. އެއީ ސަރުކާރުން އައްޔަން ކުރައްވާ ދެ މެންބަރުންގެ މަގާމު ހުސްވުމާ ގުޅިގެންނެވެ.
ބޭންކުން ބުނީ އަންނަ ޖުލައި މަހުގެ ތެރޭގައި ބާއްވާ އާންމު ޖަލްސާއެއްގައި އެ މަގާމުތަކަށް މެމްބަރުން އައްޔަނު ކުރާނެ ކަމަށެވެ.
ޓެކްސް ކޮމިޝަނަރުގެ މަގާމު ހުސްވީ، އެ މަގާމުގައި ކުރިން ހުންނެވި ފަތުހުﷲ ޖަމީލް މަޖިލިސް އިންތިޚާބުގައި ވާދަކުރުމަށް އިސްތިއުފާ ދެއްވުމާ ގުޅިގެންނެވެ. އޭނާ އިސްތިއުފާ ދެއްވީ ފެބްރުއަރީ މަހުގެ އެއްވަނަ ދުވަހު އެވެ.
ޒަރީރު މީގެ ކުރިން ވަނީ ޑެޕިއުޓީ ޓެކްސް ކޮމިޝަނަރުގެ މަގާމުވެސް ފުރުއްވައިފަ އެވެ.
