އިންޑިއާ އެއްބަސްވުންތައް ބަލަން 241 ކޮމިޓީން ނިންމައިފި
ރާއްޖޭގެ މިނިވަންކަމާއި އިސްތިގުލާލަށް އަސަރު ކުރާގޮތަށް ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން އިންޑިއާ އާއިއެކު ހެދި އެއްބަސްވުންތަކުގެ މައްސަލަ ބަލަން ރައްޔިތުންގެ މަޖިލީހުގެ 241 ކޮމިޓީން ނިންމައިފި އެވެ.
މިމައްސަލަތައް ބަލަން އެދި ކޮމިޓީއަށް ހުށަހެޅީ ހިތަދޫ މެދު ދާއިރާގެ މެމްބަރު އަހުމަދު އަޒާން އެވެ. އޭނާގެ ހުށަހެޅުއްވުމާއި ގުޅިގެން ހަތަރު އެއްބަސްވުމެއްގެ މައްސަލަ ބަލަން މިއަދު ބޭއްވި 241 ކޮމިޓީގެ ތިންވަނަ ބައްދަލުވުމުގައި ވަނީ ފާސްކޮށްފަ އެވެ.
އަޒާންގެ ހުށަހެޅުއްވުމުގައި ވަނީ ދިވެހިރާއްޖޭގެ މިނިވަންކަމާއި އިސްތިގްލާލަށް އުނިކަން އަންނަ ގޮތަށް 2018 ވަނަ އަހަރުން ފެށިގެން 2023 ވަނަ އަހަރާ ދެމެދުގައި ހިނގާފައިވާ ކަންކަން ބެލުމަށް ޕާލިމަންޓަރީ އިންކުއަރީއެއް ހެދުމަށެވެ. އެ އިންކުއަރީ ކުރިއަށް ދާނެ ގޮތް ރޭވުމަށް ހަތަރު މެންބަރުންގެ ސަބް ކޮމެޓީއެއް ނެގުމަށްވެސް އެ ހުށަހެޅުމުގައި ވެއެވެ.
އެގޮތުން ބަލަން ނިންމާފައިވާ މައްސަލަތަކުގެ ތެރޭގައި ހިމެނެނީ؛
- ރާއްޖެ އާއި އިންޑިއާއާ ދެމެދު ވެފައި އޮތް ހައިޑްރޯގްރަފީ އެއްބަސްވުމުގައި ސޮއި ނުކުރުމަށް ރައީސް އަބްދުالله ޔާމީންގެ ވެރިކަމުގައި އެމްއެންޑީއެފްއިން އެދުމަށް ފަހު މިދިޔަ ވެރިކަމުގައި އެ އެއްބަސްވުމުގައި ސޮއިކުރިއިރު އެމްއެންޑީއެފްގެ ވިސްނުން ބަދަލުވި ގޮތް ހޯދުމަށް
- އުތުރު ތިލަފަޅުގައި ބިނާކުރަމުންދާ ސިފައިންގެ އަސްކަރީ ޑޮކްޔާޑާ ގުޅޭ އެއްބަސްވުމުގެ މައްސަލަ ބެލުމަށް
- ޑޯނިއާ އެއްބަސްވުމަށް ވާސިލުވި ގޮތް ހޯދުމަށް
މިމައްސަލަ ހުށަހެޅީ ކުރިން ތިބި ބައެއްގެ މައްސަލަ ބަލައި އެމީހުން ފަޟީހަތް ކުރަން ނޫންކަމަށް އަޒާން ވިދާޅުވި އެވެ. އެހެންނަމަވެސް ފަހުން ވެސް މިފަދަ އެއްބަސްވުންތައް ހެދިގެން އަންނައިރު ރާއްޖޭގެ އެންމެ މަތީ މަސްލަހަތު އިސްކޮށް ކުރާ ކަމެއްކަން ކަށަވަރު ކުރަން މި އިންކުއަރީ ކުރިއަށް ގެންދިޔުން މުހިންމުކަމަށް އަޒާން ވިދާޅުވި އެވެ.
އަޒާންގެ ހުށަހެޅުމާއިއެކު މާމިނގިލީ ދާއިރާގެ މެމްބަރު ގާސިމް އިބްރާހިމް ވަނީ ރާއްޖޭގެ ކަނޑުގެ ބައެއް މޮރިޝަސްއަށް ދިން މައްސަލަ ބަލަން ހުށަހަޅައިފަ އެވެ. އެހެންކަމުން މިމައްސަލައިގެ އިންކުއަރީވެސް ކޮމިޓީން ކުރިއަށް ގެންދާނެ އެވެ.
މިމައްސަލަތައް ބަލަން ހަތަރު މެމްބަރުންގެ ސަބް ކޮމިޓީއެއް އެލުލަވައިލިއިރު އެ ކޮމިޓީގައި ތިއްބަވާނީ އަޒާންގެ އިތުރުން ދިއްގަރު ދާއިރާގެ މެންބަރު އަހްމަދު ނާޒިމްއާއި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ އަދި ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރެވެ.
މެމްބަރެއްގެ ގޮތުގައި އިންތިހާބުވުމުގެ ކުރިން ނޫސްވެރިއެއްގެ ގޮތުގައި ހުންނަވައިވެސް އަޒާން ވަނީ ރާއްޖެއާއި އިންޑިއާ އާއި ދެމެދު ކުރީ ސަރުކާރުން ހެދި އެއްބަސްވުންތަކާއި ގުޅޭގޮތުން ކަންބޮޑުވުން ފާޅު ކުރައްވައިފަ އެވެ. ހާއްސަކޮށް ރާއްޖޭގައި އިންޑިއާ ސިފައިން ގާއިމްވެ ތިބި މައްސަލައިގައި އެންމެ ބޮޑަށް އަޑު އުފުއްލަވަމުން ގެންދެވީ އަޒާން އެވެ.
