ގެއްލުންވާ އެސްއޯއީތައް އުވާލަން ގާސިމް ގޮވާލައްވައިފި

ސަރުކާރު ހިއްސާވާ ކުންފުނިތަކުގެ ތެރެއިން ގެއްލުންވަމުންދާ ކުންފުނިތައް އުވާލުމަށް މަޝްހޫރު ވިޔަފާރިވެރިޔާ އަދި މާމިގިލީ ދާއިރާގެ މެމްބަރު ގާސިމް އިބްރާހީމް މިއަދު ގޮވާލައްވައިފި އެވެ.

Ads by Hajj Corporation

ގާސިމް މިގޮތަށް ވިދާޅުވީ، ރައްޔިތުންގެ މަޖިލީހުގެ މެންބަރުންގެ އަދަދު ކޮންމެ 5 އަހަރަކުން އިތުރުވަމުންދާ ދިއުމާމެދު މަޖިލީހުގެ ހިޔާލު ހޯދުމަށް ހުށަހެޅި ގަރާރަށް މިއަދުގެ ޖަލްސާގައި ބަހުސްކުރައްވަމުން ނެވެ.

މަޖިލީހުގެ މާލިއްޔަތު ކޮމިޓީގެ މުގައްރިރުކަންވެސް ކުރައްވާ، ގާސިމްގެ ވާހަކައިގައި އޭނާ ވަނީ ރާއްޖޭގައި މިފަހުން ޑެފިސިޓް ބަޖެޓެއް ނޫނީ ހުށަނާޅާކަން ފާހަގަކުރައްވާފަ އެވެ. އެގޮތުން، ކޮންމެ އަހަރެއް ނިމިގެންދާއިރު 15 ބިލިއަނުން ބަޖެޓް ޑެފިސިޓް ވުމަކީ ކަންބޮޑުވެވަޑައިގަންނަވާ ކަމެއް ކަމަށެވެ.

އޭނާ ވިދާޅުވީ ރާއްޖެ އިގްތިސާދީ އަނދަވަޅަކަށް ވައްޓާލުމުގެ ޒިންމާ ނަގަންޖެހޭނީ ކުރީ ސަރުކާރުން ކަމަށެވެ. އިގްތިސާދު އަލުން ކޮޅަށް ޖެހުމުގެ ޒިންމާ މި ސަރުކާރުން އުފުލަންޖެހޭކަން ފާހަގަކުރައްވައި ގާސިމް ވިދާޅުވީ "ހިތިބޭސް ބޮއެގެން ނަމަވެސް، އައިއެމްއެފް ޕްރޮގްރާމެއް ތެރެއަށް ނުވަދެ، އަމިއްލަ ފައިމައްޗަށް" މިއަދު ތެދުވަންޖެހިފައިވާ ކަމަށެވެ. އަދި މިއީ ދައުލަތުގެ ހަރަދުތައް ކުޑަކުރަންވީ ވަގުތުކަމަށް އޭނާ ވިދާޅުވި އެވެ.

އެގޮތުން، އޭނާ ހުށަހެޅުއްވީ ގެއްލުންވަމުންދާ ސަރުކާރުގެ ކުންފުނިތައް އުވާލައި، ޕްރައިވެޓް ސެކްޓަރުގެ ދައުރު ފުޅާކުރުމަށެވެ.

"ގެއްލުންވާ ކުންފުނިތައް ޖެހޭނީ އުވާލަން. ދައުލަތުގެ ހަރަދުގައި، ހަރަދުކޮށްގެން ގެއްލުންވާ ތަންތަން އުފައްދާކަށެއް ނުޖެހޭ. ޕްރައިވެޓް ސެކްޓަރުގެ ދައުރު ފުޅާކޮށް، ޕްރައިވެޓް ސެކްޓަރަށް ފުރުސަތު ދީގެން ޓެކްސްގެ ނިޒާމަކާ ހަމަޔަށް ދާކަމަށްވާއިރު އަޅުގަނޑުމެންނަށް މިއޮތީ ޓެކްސް ނިޒާމަކަށް ފުރިހަމައަަށް ވަދެވިފައި." ގާސިމް ވިދާޅުވި އެވެ.

ގައުމުގެ މާލީ ހާލަތު ހަމަޔަކަށް އެޅުވުމަށް، ވީ އެންމެ އަވަހަކަށް ރިފޯމުތައް އަވަސް ކުރަން ޖެހޭ ކަމަށް މާލީ ވަޒީރު ވަނީ މިފަހުން ވިދާޅުވެގަ އެވެ. އަދި މި އަހަރުވެސް އޮތީ 14 ބިލިއަން ރުފިޔާގެ ޑެފިސިޓެއް ކަމަށާއި ހަރަދު ކުޑަކުރުމަށް ފިޔަވަޅުތައް އަޅާނެ ކަމަށް ވެސް ވަނީ ވިދާޅުވެފަ އެވެ.

އެމެރިކާގެ ކްރެޑިޓް ރޭޓިން އޭޖެންސީ, ފިޗުން ވަނީ ރާއްޖެއިން ބޭރުގެ ފަރާތްތަކުން ނަގާފައިވާ ދަރަނިތައް ނުދެއްކޭނެ ކަމަށް ބަލައި ރާއްޖޭގެ ރޭޓިން މިއަހަރު "ސީސީސީ ޕްލަސް" އަށް ދަށްކޮށްފަ އެވެ. ރާއްޖެއަކީ ބަނގުރޫޓުވުމުގެ ފުރުސަތު ބޮޑު ގައުމެެއްގެ ގޮތުގައި އެ އޭޖެންސީން ވަނީ ފާހަގަކޮށްފަ އެވެ.