ތައުހީދުގެ މަތިވެރި އަސާސުގައި ހިފަހައްޓައިފި ނަމަ އަހަަރެމެންނަކީ ކާމިޔާބު ބަޔަކަށް ވާނެ
ތައުހީދުގެ މަތިވެރި އަސާސުގައި ހިފަހައްޓައިފި ނަމަ އަހަަރެމެންނަކީ ކާމިޔާބުވެފައިވާ ބަޔަކަށް ވާނެ ކަމަށް މިއަދުގެ ހުކުރު ހުތުބާގައި ބުނެފި އެވެ.
ތައުހީދުގެ މައްޗަށް އަލިއަޅުވާލައި ހުތުބާގައި ބުނީ އިސްލާމްދީނުގެ އަސާސަކީ ތައުހީދު ކަމަށެވެ. އެއީ އެންމެ ފުރަތަމަ ﷲ އެކަލާނގެ އަޅުތަކުންނަށް އެ ކަމަކަށް އީމާންވުމަށް އަމުރުކުރައްވާފައިވާ ކަންތައް ކަމަށެވެ. އަދި އެންމެހާ ޖިންނީންނާއި އިންސީން އެ ކަމަކަށް ޓަކައި ހެއްދެވުނު މަގުސަދު ކަމަށެވެ. މާތް ﷲ ފޮނުއްވި އެންމެހާ ނަބިއްޔުންނާއި ރަސޫލުން ވަޑައިގެންނެވީ ތައުހީދުގެ މަތިވެރި އަގީދާ އާއެކު ކަމަށާއި އެކަލާނގެ ބާވައިލެއްވި އެންމެހާ ފޮތްތައް ބާވައިލެއްވުނީ މި މާތް އަސްލުގެ މަތީގައި ކަމަށެވެ.
ތައުހީދަކީ ﷲ ގެ އެއްކައުވަންތަކަން ގަބޫލުކޮށް، ޝިރުކުގެ އެންމެހާ އަމަލަކުން ދުރުހެލިވެ ރައްކާތެރިވުންކަން ފާހަގަކޮށް މިއަދުގެ ހުތުބާގައި ބުނެފައި ވަނީ ތައުހީދުގެ ބައިތަކުގެ ތެރޭގައި ހިމެނޭ ތިން ބައިގައި އެކަލާނގެ އެއްކައުވަންތަކޮށްގެން މެނުވީ މި މަތިވެރި އަގީދާ ހާސިލު ނުކުރެވޭނެ ކަމަށެވެ. އަޅުތަކުންގެ މައްޗަށްވާ ﷲ ގެ އެންމެ މަތިވެރި ހައްގަކީ އެކަލާނގެއަށް ޝަރީކު ނުކޮށް ހުރިހާ މާނައެއްގައި އެކަލާނގެ އެއްކައުވަންތަ ކުރުން ކަމަށެވެ.
ކީރިތި ގުރްއާނާއި ކީރިތި ރަސޫލާގެ ހަދީސްތަކުގެ އަލީގައި އިލްމުވެރިން ތައުހީދު ބައްސަވާފައިވާއިރު، ފުރަތަމަ ބަޔަކީ ރުބޫބިއްޔަތުގައި އެކަލާނގެ އެއްކައުވަންތަ ކުރުމެވެ. އެއީ ﷲ އަށް ހާއްސަވެގެންވާ ކަންކަމުގައި އެކަލާނގެއަށް ޝަރީކުކުރުމުން ދުރުހެލިވުމެވެ. ހަލްގުކުރެއްވުމާއި ދިރުއްވުމާއި މަރުގެންނެވުމާއި ރިޒުގުދެއްވުމާއި ކައުނުގައިވާ ކަންކަން ތަދުބީރުކުރައްވައި ހިންގެވުމާއި މި އެންމެހާ ކަންކަން މިލްކުވެވޮޑިގެންވަނީ ހަމައެކަނި އެކަލާނގެއަށް ކަމާއި މި ކަންކަމުގައި އެކަލާނގެއަށް އެއްވެސް ބައިވެރިޔަކު ނުވާ ކަމަށް ޝައްކެއްނެތި ގަބޫލުކުރުމެވެ.
ތައުހީދުގެ ދެވަނަ ބަޔަކީ ހުރިހާ އަޅުކަމެއް ހަމައެކަނި މާތް ﷲ އަށް އަދާކުރުމެވެ. ތައުހީދުލްއުލޫހިއްޔާއަކީ އަޅުކަމުގެ ގޮތުން ކުރެވޭ ހުރިހާ ކަމެއް އެކަލާނގެއަށް ހާލިސްކުރުމާ އެކު، އަޅުކަމުގެ އެއްވެސް ކަމެއްގައި އެކަލާނގެ ފިޔަވައި އެހެން ފަރާތެއް ބައިވެރިކުރުމަކާ ނުލައި އަޅުކަން ކުރުމެވެ. ނަމާދުކުރުމާއި ރޯދަހިފުމާއި ދުއާކުރުމާއި ނަދުރުބުނުމާއި ގުރުބާންކުރުމާއި ބިރުވެތިވުމާއި ކަންކަމުގައި ވާތްގަށް އެދި ދެންނެވުމާއި އަޅުކަމުގެ ގޮތުން ކުރާ މި ފަދަ ހުރިހާ އަމަލެއް ހަމައެކަނި އެކަލާނގެއަށް ހާލިސްކުރުމެވެ. މާތް ﷲ ފޮނުއްވި އެންމެހާ ނަބީ ބޭކަލުންނާއި ރަސޫލުބޭކަލުން، އެބޭކަލުންގެ ގައުމުގެ މީސްތަކުންނަށް އެންމެ ބޮޑަށް ގޮވައިލައްވާން ޖެހިވަޑައިގަތީ ތައުހީދުގެ މި ބަޔަށެވެ.
ތައުހީދުގެ ތިންވަނަ ބަޔަކީ ތައުހީދުލްއަސްމާއި ވައްސިފާތި އެވެ. މާތް ﷲ ގެ އިސްމުފުޅުތަކާއި ސިފަފުޅުތަކުގައި އެކަލާނގެ އެއްކައުވަންތަ ކުރުމެވެ. އެންމެ ފުރިހަމަވެގެންވާ، މަތިވެރި ނަންފުޅުތަކާއި ސިފަފުޅުތަކެއް ލިބިވޮޑިގެންވަނީ ހަމައެކަނި އެކަލާނގެއަށްކަން ގަބޫލުކުރުމެވެ. ތައުހީދުގެ މި ބަޔަށް އީމާންވުމުގައި ވަރަށް މުހިންމު ދެ އަސާސެއް ހިމެނެ އެވެ. ފުރަތަމަ އަސާސަކީ ﷲ އެކަލާނގެ ޒާތުފުޅަށް ނިސްބަތްކުރައްވާފައިވާ ސިފަފުޅުތަކާ އަދި ނަބިއްޔާގެ ހަދީސް ބަސްފުޅުތަކުގައި އައިސްފައިވާ އެކަލާނގެ ސިފަފުޅުތަކަށް އީމާންވުމެވެ. ދެވަނަ އަސާސަކީ އެންމެހާ މަހުލޫގުންގެ އުނިސިފަތަކާއި އެއް ވައްތަރުވުމުން އެކަލާނގެ ހުސްދުރުވެވޮޑިގެންވާކަން ގަބޫލުކުރުމެވެ.
ހުކުރު ހުތުބާގައި ބުނި ގޮތުގައި އަޅާ ތައުހީދުގެ މި ތިން ބައިގައި ވަރުގަދަޔަށް ހިފަހައްޓައިގެން މެނުވީ، އެންމެ ފުރިހަމަ ގޮތުގައި ﷲ އެއްކައުވަންތަކުރާ މީހަކަށް ނުވާނެ ކަމުގަ އެވެ. އިސްލާމްދީން އެ އަސާސެއްގެ މައްޗަށް ބިނާވެފައިވާ އަސާސަކީ ތައުހީދު ކަމަށްވާއިރު، މި މަތިވެރި އަސާސުގައި ހިފަހައްޓައިފި ނަމަ އަހުރެމެންނަކީ ކާމިޔާބުވެފައިވާ ބަޔަކަށްވާނެ ކަމުގަ އެވެ. އަހުރެމެން ކުރާ ކޮންމެ އަމަލެއް ﷲ އަށް ހާލިސްކޮށް ޝިރުކުން އެއްކިބާ ކުރެވިއްޖެ ނަމަ، ސީދާމަގުގައި ފައިތިލަ ސާބިތުކޮށްފައިވާ ބާއްޖަވެރި ބަޔަކަށް ވާނެ ކަމުގަ އެވެ.
މި މަތިވެރި އަގީދާ ދޫކޮށް ބާތިލު އަގީދާތަކަށް ތަބާވެ، ﷲ ގެ މަގަށް ފުރަގަސްދީ، ކުރާ އަމަލުތަކުގައި ޝިރުކު ހިމެނިއްޖެ ނަމަ، ހުރިހާ އަމަލުތަކެއް ބާތިލުވެ، ގެއްލެނިވެގެން ހިނގައިދާނެކަން ވެސް މިއަދުގެ ހުކުރު ހުތުބާގައި ވަނީ ފާހަގަކޮށްފަ އެވެ.
