ހުޅުމާލެ ސިނާއި ސަރަހައްދުގައި ހުރި އުޅަނދުތައް މިރޭ 11 ކުރިން ނަގަން އަންގައިފި

ހުޅުމާލެ އިންޑަސްޓްރިއަލް ޒޯނު ސަރަހައްދުގެ މަގުތަކުގައި ޕާކުކޮށްފައި ހުރި އުޅަނދުތައް އެ ސަރަހައްދުން ނެގުމަށް ފުލުހުން އަންގައިފި އެވެ.

Ads by STELCO

އެކްސް ގައި މިއަދު ކުރި ޕޯސްޓެއްގައި ފުލުހުން ބުނީ އެ ސަރަހައްދުން އުޅަނދުތައް ނަގަން އެންގީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެ ސަރަހައްދު ސާފު ކުރުމަށް ކަމަށެވެ.

އެހެންވެ މިއަދު ހެނދުނުން ފެށިގެން މިރޭ 11 ޖެހުމުގެ މުއްދަތުގެ ތެރޭގައި އެ އުޅަނދުތައް ނެގުމަށް އަންގައިފައިވެ އެވެ. އަދި އެ ވަގުތުގެ ތެރޭގައި އުޅަނދުތައް ނުނަގައިފިނަމަ އެއުޅަނދުތައް ޓޯ ކުރާނެކަމުގެ އިންޒާރުވެސް ފުލުހުން ވަނީ ދީފަ އެވެ.

އެޗްޑީސީގެ މީޑިއާ އޮފިޝަލް "ދެން އޮންލައިން" އަށް ވިދާޅުވީ އިންޑަސްޓްރިއަލް ޒޯން ސަރަހައްދުގެ މަގުތައް ސާފުކުރުމުގެ މަސައްކަތްކުރަނީ ހުޅުމާލޭގައި ގަވާއިދާ ހިލާފަށް ޕާކްކޮށްފައި ހުންނަ އުޅަނދުތަކާއި ވިޔަފާރިތަައް ހަމަޔަކަށް އެޅުވުމަށް އެޗްޑީސީން ކުރަމުންދާ މަސައްކަތުގެ ތެރެއިން ކަމަށެވެ.

ހުޅުމާލެއަކީ ހިނގައި ބިނގައިވެ އުޅުމަށް ފަސޭހަ ތަނަކަށް ހެދުމަށްޓަކާ އެޗްޑީސީން ދަނީ ގިނަ މަސައްކަތްތަކެއް ކުރަމުންނެވެ.

ދާދި ފަހުން ހުޅުމާލޭ މަގުތަކުގެ ދުވާރުތައް މަތީގައި މޭޒުތައް ބަހައްޓައިގެން ދެމުން އައި ހިދުުމަތްތައް އެޗްޑީސީން ވަނީ ހުއްޓުވާފަަ އެވެ. މީގެ އިތުރުން ޕާކިން މައްސަލައަށް ހައްލު ގެނައުމަށްވެސް އެޗްޑީސީން ދަނީ މަސައްކަތްތަކެއް ކުރަމުންނެވެ.

މާލެ ސަރަހައްދުގައި ގަވާއިދާ ހިލާފަށް ހުރި ވެހިކަލްތައް ގަވާއިދަށް ފެއްތެންދެން ވަގުތީ ގޮތުން ޕާކުކުރަން ހުޅުމާލޭ ދެވަނަ ފިޔަވަހިން މި ފަހުން ބިމެއް ހަމަޖައްސާފައިވެ އެވެ.

ޓްރާންސްޕޯޓް މިނިސްޓްރީން ބުނީ އެ ބިމަކީ ޓޯ ނުކޮށް ވެހިކަލްތައް ގަވާއިދަށް ފެއްޓުމަށް ހަ މަސް ދުވަހު ވަގުތީ ގޮތުން ބަހައްޓަން ހަމަޖެއްސި ބިމެއް ކަމަށެވެ.