ބުދަ ދުވަހުގެ ރޭ ހިނގި އެކްސިޑެންޓްގައި އަނިޔާވި ޒުވާނާ މަރުވެއްޖެ
ބޮޑުތަކުރުފާނު މަގާ ކޮއިމަލާ ހިނގުން ގުޅޭ ކަންމަތިން މިދިޔަ ބުދަ ދުވަހުގެ ރޭ ދަންވަރު ސައިކަލަކާ ކާރެއް ޖެހި ހިނގި އެކްސިޑެންޓުގައި އަނިޔާވި ޒުވާނާ ރޭ މަރުވެއްޖެ އެވެ.
އެ އެކްސިޑެންޓުގައި ލިބުނު އަނިޔާތަކަށް އައިޖީއެމްއެޗްގެ އައިސީޔޫގައި ފަރުވާދެމުން ދަނިކޮށް މަރުވެފައިވަނީ ގދ. ގައްދޫ, އުމުރުން 21 އަހަރުގެ މުހައްމަދު ލީވާން އެވެ.
ސޯޝަލް މީޑިއާގައި ދައުރުވަމުންދާ ވީޑިއޯ އިން ފެންނަ ގޮތުން އެ އެކްސިޑެންޓުގައި އެ ޒުވާނާގެ ބޯ ފަޅައިގެން ގޮސް ވަރަށް ބޮޑަށް ލޭފައިބަ އެވެ. އެކްސިޑެންޓުގައި ސައިކަލުގެ އިތުރުން ކާރަށްވެސް ބޮޑެތި ގެއްލުންތަކެއް ވަނީ ލިބިފަ އެވެ.
ވަރަށް ކައިރި ކައިރީގައި ގިނަ އެކްސިޑެންތަކެއް ހިނގަމުންދާއިރު މިދިޔަ ބުރާސްފަތި ދުވަހުގެ ރޭ ހިނގި އެކްސިޑެންޓުގައި ލ. އިސްދޫ އުމުރުން 23 އަހަރުގެ ހަސަން ސަމާހު ވަނީ މަރުވެފަ އެވެ. އަދި އިއްޔެ ހެނދުނު ހިނގި އެކްސިޑެންޓުގައި މީހަކަށް އަނިޔާވެގެން ހޮސްޕިޓަލަށް ގެންގޮސްފައިވެ އެވެ.
އޭގެ އިތުރުން ރޭ ހުޅުމާލޭން ހައިވޭއަށް އަރަން އޮންނަ މަގުގައި ހުންނަ ވިލާގެ ޕެޓްރޯލް ޝެޑު ކައިރީ ދެ ސައިކަލެއް ޖެހި ނުރައްކާތެރި އެކްސިޑެންޓެއް ހިނގާފައިވާއިރު އެ އެކްސިޑެންޓުގައި އަންހެނަކާއި ފިރިހެނަކަށް އަނިޔާވެފައިވެ އެވެ.
Ads by STO
