އިތުރު 200 ބަނގްލަދޭޝީން ގައުމަށް ފޮނުވާލަނީ
އިތުރު 200 ބަނގްލަދޭޝީން އަނބުރާ ގައުމަށް ފޮނުވާލުމަށް ތައްޔާރު ވެފައިވާކަމަށް މޯލްޑިވިއަނުން ބުނެފިއެވެ.
މޯލްޑިިވިއަނުން މިއަދު ކުރި ޓްވީޓެއްގައި ބުނެފައިވަނީ 200 ބަނގްލަދޭޝީން ގޮވައިގެން ވެރިރަށް ޑާކާއަށް ފުރުމަށް މޯލްޑިވިއަންގެ ފްލައިޓެއް ތައްޔާރުވެފައިވާ ކަމަށެވެ. މިއީ މޯލްޑިވިއަނުން ބަންގްލަދޭޝީން ގޮވައިގެން ކުރާ 35 ވަނަ ދަތުރުކަން ފާހަގަ ކުރެވެއެެވެ.
މިހާތަނަށް މޯލްޑިވިއަނުން ވަނީ 6732 ބަންގްލަދޭޝީން އަނބުރާ ގައުމަށް ގެންގޮސްދީފައެވެ.
ރާއްޖޭގައި އުޅެމުންދާ ބަނގްލަދޭޝް ރައްޔިތުން އަނބުރާ ގައުމަށް ފޮނުވާލުމުގެ މަސައްކަތަކީ ރާއްޖޭގައި އުޅޭ ސައްހަ ލިޔުން ނެތް ބަނގްލަދޭޝީންނާއި އަދި ގައުމަށް އެނބުރި ދާން ބޭނުންވާ ބަންގްލަދޭޝީން ފުރުވާލުމަށް އިކޮނޮމިކް މިނިސްޓްރީ އާއި މޯލްޑިވިއަނާ ގުޅިގެން ކުރިއަށް ގެންދާ ޕްރޮގްރާމެކެވެ.
ރާއްޖޭގައި ގަވައިދާ ޚިލާފަށް 80،000 އާ ގާތް ކުރާ އަދަދަކަށް ބަންގްލަދޭޝީން އުޅޭ ކަމަށް ކަމާބެހޭ އިދާރާތަކުގެ ތަފާސް ހިސާބުތަކުން ދައްކައެވެ. މި އަހަރު ތެރޭގައި 20،000 ބިދޭސީއަކު އަނބުރާ ގައުމަށް ފޮނުވާލެވޭނެ ކަމަށް އިކޮނޮމިކް މިނިސްޓްރީން ބުނެއެވެ.
