ވަޒީރުކަމަށް އައްޔަން ކުރެއްވީ ވެސް، ވަކި ކުރައްވާނީ ވެސް ރައީސް ޞާލިޙު: މިނިސްޓަރ ފައްޔާޒު
ވަޒީރު ކަމަށް އައްޔަން ކުރެއްވީ ވެސް އަދި އެމަގާމުން ވަކި ކުރައްވާނީ ވެސް ރައީސް އިބްރާހިމް މުޙައްމަދު ޞާލިޙު ކަމަށް، އިކޮނޮމިކް މިނިސްޓަރ ފައްޔާޒު އިސްމާއިލް މިއަދު ވިދާޅުވެއްޖެއެވެ.
މިނިސްޓަރ ފައްޔާޒު މިހެން ވިދާޅުވެފައިވަނީ އެމްޑީޕީގެ ރައީސް މުޙައްމަދު ނަޝީދު، އެޕާޓީގެ ޗެއާޕަރސަން ޙަސަން ލަތީފަށް އެޑްރެސް ކުރައްވާ މިއަދު ފޮނުއްވި ސިޓީއަކާއި ގުޅިގެންނެވެ. އެސިޓީގައި ރައީސް ނަޝީދު އެދިވަޑައިގެންފައި ވަނީ މިނިސްޓަރ ފައްޔާޒު އަމިއްލައަށް މަގާމުން އެކަހެރިވެ ވަޑައިގަތުމަށެވެ.
މިކަމާއި ގުޅޭގޮތުން މިނިސްޓަރ ވިދާޅުވީ، އެސިޓީގައިވާ ދެ ކަމަކަށް ރައްދެއް ދެއްވަން ބޭނުންފުޅުވާ ކަމަށެވެ.
"އެއް ކަމަކީ ސިޓީގައި އެދިވަޑައިގެންފައިވާ ގޮތަށް އެ ސިޓީ އަޅުގަނޑު ވެސް ބޭނުން ރާއްޖޭގެ އެންމެންނަށް ވެސް ފެންނަން. ދެވަނަ ކަމަކީ އަޅުގަނޑު މަގާމަށް އައްޔަން ކުރީ ރައީސް އިބްރާހިމް މުހައްމަދު ޞާލިހު. ރައީސް އެދިވަޑައިގެންފިއްޔާ އެއީ ލޮލުން ވިޔަސް އެކަހަލަ އިޝާރާތެއް ކޮށްލައްވާއިރަށް އަޅުގަނޑު އިސްތިއުފާ ދޭނަން،" ފައްޔާޒް ވިދާޅުވި އެވެ.
މިނިސްޓަރ ފައްޔާޒު މަގާމުން ދުރުކުރަން ރައީސް ނަޝީދު ވަނީ މީގެ ކުރިން މަސައްކަތްތަކެއް ފައްޓަވާފައެވެ. އެގޮތުން މިނިސްޓަރު ފައްޔާޒުގެ އިތުބާރު ނެތް ކަމުގެ ވޯޓެއް ނެގުމުގެ މަސައްކަތް ފަށައިފައިވެއެވެ.
ހަސަން ލަތީފަށް ރައީސް ނަޝީދު ފޮނުއްވި ސިޓީގައި ވިދާޅުވެފައިވާ ގޮތުގައި އެމަނިކުފާނު އެއްވެސް ވަޒީރަކާ ޒާތީ އެއްވެސް ކަމެއް ނެތެވެ. އެހެން ނަމަވެސް، ސިޓީގައިވާ ގޮތުން، ފައްޔާޒުގެ މައްޗަށް ނަޝީދު ކުރައްވާފައި ވަނީ ކޮރަޕްޝަންގެ ތުހުމަތުތަކެއް ކަމަށް ދޭހަވާ މޭރުމަކުން އެސިޓީގައި ވާހަކަ ދައްކަވާފައިވެއެވެ.
އެގޮތުން ރައީސް ނަޝީދު ވިދާޅުވެފައިވަނީ އެމްޑީޕީއާ އެންމެ ދުރީ ކޮރަޕްޝަންގެ ތުހުމަތުތައް ކަމަށްވާއިރު، އެމަނިކުފާނުގެ ތިން އަހަރުގެ ވެރިކަން ނިމުނުއިރު ވެސް އެންމެ ގިނައިން ނުދައްކާ ވާހަކައަކީ ވެސް ކޮރަޕްޝަނުގެ ތުހުމަތުތައް ކަމުގައެވެ.
Ads by STO
