ކޮވިޑް-19: މާލޭގެ ފެސިލިޓީއެއްގައި ހުރި މީހަކަށް ޖިންސީ ގޯނާ ކޮށްފި
މާލޭގެ ކޮވިޑް ފެސިލިޓީއެއްގައި ހުރި މީހަކަށް ޖިންސީ ގޯނާ ކުރި މައްސަލައެއް ފެންމަތިވެއްޖެއެވެ.
މިކަމާއި ގުޅޭގޮތުން ފުލުހުން ވިދާޅުވެފައި ވަނީ މާލޭގެ ކަރަންޓީން ފެސިލިޓީއެއްގައި ހުރި ކޮވިޑް-19 އަށް ފައްސިވެފައިވާ 26 އަހަރުގެ އަންހެނަކަށް އެތަނުގައި މަސައްކަތް ކުރާ ބިދޭސީ ފިރިހެނަކު ޖިންސީ ގޯނާކޮށް ޖިންސީ ފުރައްސާރަ ކުރި މައްސަަލައެއް ހުށަހަޅާފައިވާ ކަމަށެވެ.
މިމައްސަލަ ފުލުހަށް ހުށަހަޅާފައިވަނީ މިދިޔަ އާދީއްތަ ދުވަހުގައެވެ.
ފުލުހުން ވިދާޅުވީ މިމައްސަލަ މޯލްޑިވްސް ޕޮލިސް ސަރވިސްގެ ފެމެލީ އެންޑް ޖެންޑަރ އެފެއަރޒް ޑިޕާރޓްމަންޓުން ގެންދަނީ ތަހްޤީޤު ކުރަމުން ކަމަށެވެ.
އެނގިފައިވާ ގޮތުގައި އެބިދޭސީ މީހާ މިހާރު ވަނީ ވަޒީފާއިން ވަކިކޮށްފައެވެ.
ކޮވިޑް ފެސިލިޓީތަކުގައި ޖިންސީ ގޯނާ ކުރާކަމުގެ އަަޑުތަކެއް މީގެކުރިން މީސްމީޑިއާ ގައި ވެސް ވަނީ ދައުރުވެފައެވެ.
