ކޮވިޑް-19: ކެންސަރަށް ފަރުވާ ހޯދަމުންދިޔަ ކަރަންޓީނުގައި ހުރި މީހަކު ނިޔާވެއްޖެ
ކޮވިޑް-19 ޖެހިގެން ރާއްޖޭގައި އިތުރު މީހަކު ނިޔާވެއްޖެއެވެ. މިއީ ކޮވިޑް-19 ޖެހިގެން ރާއްޖޭގައި ނިޔާވި 31 ވަނަ މީހާއެވެ.
މި މީހާ ނިޔާވެފައިވަނީ ރޭ އިރާކޮޅު 8:15ގައި ކަމަށް އެޗްޕީއޭ އިން މައުލޫމާތު ދެއެވެ.
ނިޔާވެފައިވަނީ ހއ.ކެލާއަށް ނިސްބަތްވާ 58 އަހަރުގެ ފިރިހެނެއްކަމަށް އެޗްޕީއޭ އިން ބުނެއެވެ. އަދި ހަމަ އެހެންމެ އެމީހާ ނިޔާވީ ކުޅުދުއްފުށި ރީޖަނަލް ހޮސްޕިޓަލުގައި ކެންސަރަށް ފަރުވާ ހޯދަމުން ދަނިކޮށް ކަމުގައިވެސް އެޗްޕީއޭ އިން ކޮށްފައިވާ ޓްވީޓުގައި ފާހަގަ ކޮށްފައި ވެއެވެ.
މާތް ﷲ މައްޔިތާގެ ފުރާނައަށް ހެޔޮ ރަހުމަތް ލައްވާ ސުވަރުގޭގެ ދާއިމީ ނިއުމަތް މިންވަރުކުރައްވާންދޭވެ. އަދި މި ހިތްދަތި ވަގުތުގައި އާއިލާއަށް ކެތްތެރިކަން ދެއްވާފާންދޭވެ. އާމީން
ރާއްޖެއިން ކޮވިޑް-19ގެ ކޭހެއް އެންމެ ފުރަތަމަ ފެނިފައިވަނީ މީގެ 6 މަސް ކުރިންނެވެ. މި ވޭތުވެދިޔަ 6 މަސް ދުވަހުގެ ތެރޭގައި ރާއްޖެއިން 8،741 މީހުން ފައްސި ވެފައިވާކަން އެންމެ ފަހުގެ ތަފާސް ހިސާބުތަކުން ދައްކައެވެ. އަދި މިހާތަނަށް މި ބަލީގައި މިވަނީ 31 މީހުން ނިޔާވެފައެވެ.
