ބަދަލު ހިފުމުގެ ރޫޙެއް ގެންގުޅުއްވާ، އެމްޑިޕީއަށް"ޣައްދާރުވާތީ" ރައީސް ނަޝީދު ހުއްޓުވައިދޭންް އެދިއްޖެ

އެމްޑީޕީގެ ރައީސް އަދި ރައްޔިތުންގެ މަޖިލީހުގެ ވެސް ރައީސް މުޙައްމަދު ނަޝީދު މަސައްކަތްޕުޅު ކުރައްވަނީ އަމިއްލަ މަސްހަލަތު އިސްކޮށްގެން ބަދަލު ހިފުމުގެ ރޫހެއްގައި އެ ޕާޓީ ގުރުބާން ކުރައްވައިގެން ކަމަށާއި އެއީ "ޣައްދާރުވުން" ކަމަށް ބުނެ އެކަން ޕާޓީގެ ފަރާތުން ހުއްޓުވައި ދެއްވުމަށް އެމްޑީޕީގެ ފިޔަވަޅު އަޅާ ކޮމިޓީގެ ނައިބު މުގައްރިރު ޝުއައިބު އަލީ އެދިލައްވައިފިއެވެ.

Ads by Sosun Fihaara

ޝުއައިބު މިފަދައިން އެދިލައްވާފައިވަނީ އެމްޑީޕީގެ ޗެއާޕަރސަން ޙަސަން ލަތީފު އަށް ފޮނުއްވި ސިޓީއެއް ގައެވެ.

ފެބްރުއަރީ7، 2012 ގައި "ބަޣާވާތަކުން" އެމްޑީޕީގެ  ފުރަތަމަ ސަރުކާރު ވައްޓާލި ދުވަހުން ފެށިގެން މިއަދާ ހަމައަށް ވެސް އެޕާޓީން މަސައްކަތް ކުރަނީ ނަޝީދުގެ ހައްގުގައި ކަމަށާއި އެމްޑީޕީގެ އާންމު މެންބަރުންގެ ލޯތްބާއި ތާއީދު ވެސް އޭރު ލިބިފައިވާ ނަޝީދަށް ނުހައްގުން ޝަރީއަތްކޮށް ހުކުމް ކޮށްފައިވާތީ އެމަނިކުފާނު މިނިވަން ކުރުމުގެ ބޭނުމުގައި އޭރުގެ މަޖިލިސް މެންބަރުން ވެސް މަސައްކަތް ކުރެއްވި ކަން ޝުއައިބުގެ ސިޓީގައި ފާހަގަކުރެއްވި އެވެ.

އޭގެއިތުރުން އެދުވަހު އެމްޑީޕީ ގެ ވެރިކަން ވައްޓާލުމުގައި އެންމެ ކުރީގައި ތިބިކަމަށް ބުނާ ފަރާތްތަކާއި އެއްކޮށް އެމްޑީޕީން މަސައްކަތް ކުރަން ނިންމީ ވެސް ރައީސް ނަޝިދުގެ ޙައްޤުގައި ކަމަށާއި ދެވަނަ ފަހަރަށް އެމްޑީޕީގެ ސަރުކާރެއް އުފެދި ރައީސް ނަޝީދު މިނިވަން ވެފައި ވަނީ އާންމު މެންބަރުންގެ އެ މަސައްކަތުން ކަމަށް ވެސް ވިދާޅުވި އެވެ.

މީގެއިތުރުން ޝުއައިބުގެ ސިޓީގައި ވިދާޅުވެފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙަކީ (އެމްޑީޕީގެ އަސާސީ ޤަވާއިދުގައި ވެސް އޮންނަ ގޮތުން)، އެޕާޓީގެ އެންމެ އިސް ލީޑަރު ކަމަށެވެ. ނަމަވެސް ރައީސް ނަޝީދަށް އޮތް އިޙްތިރާމާއެކު މަޖިލީހުގެ ރައީސްކަން ވެސް ޕާޓީގެ މެންބަރުން އެމަނިކުފާނަށް ދެއްވާފައިވާކަން ޝުއައިބުގެ ސިޓީގައި ފާހަގަކޮށްފައިވެ އެވެ.

ކަންމިހެން ހުރި ނަމަވެސް މަޖިލީހުގެ ރައީސްގެ މަގާމުގައި ހުންނަވައިގެން ރައީސް ނަޝީދު މިހާރު މަސައްކަތްޕުޅު ކުރައްވަމުން ގެންދަވަނީ އަމިއްލަ މަސްލަހަތު އިސް ކުރައްވައިގެން ކަމަށާއި ޕާޓީގެ ސްލޮޓްގައި ތިއްބެވި ވަޒީރުންނަށް ފިޔަވަޅު އަޅަން މަސައްކަތް ކުރައްވަނީ އެމަނިކުފާނުގެ ވިސްނުންފުޅުގައިވާ ބަރުލަމާނީ ނިޒާމަށް ވަޒީރުން ތާއީދު ނުކުރައްވާތީ ކަމަށް ޝުއައިބު ގެ ސިޓީގައި ތުހުމަތު ކޮށްފައިވެއެވެ.