އަންތަރީސް ކުރުވާ ފަދަ ވާހަކައެއް: ސައުދީއިން ފެނުނީ 120،000 އަހަރު ވެފައިވާ އިންސާނުންގެ ފިޔަވަޅުތަކެއް
ސައުދީ އަރަބިއްޔާއިން އިންސާނުންނާއި އަދި އެތް ފަދަ ތަފާތު އެކި ޖަނަވާރުންގެ 120،000 އަހަރުވީ ފިޔަވަޅުތަކެއް ފެނިއްޖެއެވެ. މި ފިޔަވަޅުތަކެއް ފެނުނީ ކުރިން ކޯރެއް އޮތް ނަމަވެސް މިހާރު ހިކިފައިވާ ތަނަކުންނެވެ.
ސައިންސްވެރިން ގަބޫލުކުރާ ގޮތުގައި މި ފިޔަވަޅުތަކުގެ އަލީގައި އެ ޒަމާނުގައި މީހުން ތަންތަނަށް ދަތުރުކޮށް ހިޖުރަ ކުރުމަށް ކުރި މަސައްކަތް އެނގިގެން ދާނެއެވެ. އެގޮތުން މި ސައިންސްވެރިން ވަނީ މި ސަރަހައްދުން އިންސާނުންގެ 7 ފިޔަވަޅެއް ހޯދާފައެވެ. އެ ސައިންސްވެރިން ލަފާކުރާ ގޮތުގައި އެއީ ދެމީހެއްގެ ފިޔަވަޅު ތަކެކެވެ.
ހަމައެހެންމެ މި ސައިންސްވެރިން ކުރި ދިރާސާއިން ދައްކާ ގޮތުގައި، އެޒަމާނުގައި އުޅުނު މީހުން ދަތުރުފަތުރުކޮށް އުޅުނީ ކޯރުތައް ހުރަސްކޮށެވެ. އަދި މި ފިޔަވަޅުތަކަކީ މިހާތަނަށް ސައުދީ އަރަބިއްޔާއިން ފެނުނު އެންމެ ދުވަސްވީ ފިޔަވަޅުތައް ކަމަށް ވެސް މި ދިރާސާއިން ވަނީ ހާމަވެފައެވެ.
މި ސައިންސްވެރިން ގަބޫލުކުރާ ގޮތުގައި މި ފިޔަވަޅުތައް ނިސްބަތް ވަނީ ވަރަށް ގަދަރުވެރި އަދި އެޒަމާނުގައި ނަން ހިނގާ ބަޔަކަށެވެ. ސަބަބަކީ އެ ޒަމާނުގައި އެތަނަށް ޒިޔާރާތްކޮށް އުޅުނީ އެފަދަ މަތީ މީހުން ކަމަށް ވާތީ ކަމުގައި ވެސް އެ ސައިންސްވެރިން ގަބޫލު ކުރެއެވެ.
މި ސަރަހައްދު ދިރާސާކުރި ސައިންސްވެރިއެއް ކަމަށްވާ ސްޓީވާޓް ވިދާޅުވާ ގޮތުގައި އެ ކޯރަކީ އެ ޒަމާނުގައި އިންސާނުން ވަރަށް ގިނައިން ގޮސް އުޅުނު ތަނެކެވެ. އަދި އެކިކަހަލަ ޖަނަވާރުން ވެސް އެތަނުގައި އުޅޭކަމަށް އޭނާ ބުނެފައި ވެއެވެ.
