ކޮވިޑް19: ބަލި ޖެހޭ މީހުންގެ އަދަދު މަދުވެ ، ރަނގަޅުވާ މީހުންގެ އަދަދު އިތުރުވެއްޖެ ، ރަނގަޅުވި އިންސައްތަ 87 އަށް
ރާއްޖެއިން ކޮވިޑް19 ޖެހޭ މީހުންގެ އަދަދު މަދުވެ ރަނގަޅުވާ މީހުންގެ އަދަދު އިތުރުވަމުން ދާން ފަށައިފިއެވެ. މިއާއެކު ވޭތުވެދިޔަ ހަތަރު ދުވަހު ރަނގަޅުވި މީހުންގެ ޢަދަދު ވަނީ 2 އިންސައްތަ ކުރިއަށް ޖެހި 87 އިންސައްތަ އަށް ބަދަލު ވެފައެވެ.
ތަފާސް ހިސާބުތަކަށް ބަލާލާއިރު ރާއްޖެއިން މިހާތަނަށް ކޮވިޑް19 ޖެހުނީ 10098 މީހުންނަށެވެ. އޭގެ ތެރެއިން 1210 މީހުން އެކްޓިވް ކޭސް ގޮތުގައި ފާހަގަ ވެފައިވާއިރު 8847 މީހުން ވަނީ ބަލީން ރަނގަޅު ވެފައެވެ. މި ބަލީގައި ރާއްޖެއިން މިހާތަނަށް 34 މީހަކު ނިޔާވެފައި ވެއެވެ.
ވޭތުވެދިޔަ އަހަރުގެ ނޮވެމްބަރ މަހު ޗައިނާގެ ވުހާން އިން ފެނުނު ކޮރޯނާ ވައިރަސް ރާއްޖެއަށް ފޯރިތާ މި މިއަދަށް މިވީ 204 ދުވަހެވެ. ރާއްޖެއިން ފައްސިވާ މީހުންގެ ޢަދަދު ކުރީކޮޅުގައި އިތުރު ވެގެން ދިޔަ ނަމަވެސް މިހާރު އެ ޢަދަދު އަންނަނީ ވަރަށް ބޮޑަށް މަދު ވަމުންނެވެ. އެގޮތުން ރައްކާތެރިވުމުގެ ގޮތުން އެޗްޕީއޭއިން އަޅުއްވާފައިވާ އުސޫލުތައް މިގޮތަށް ދެމެހެއްޓިއްޖެނަމަ ކުރިއަށް އޮތް 60 ދުވަސް ތެރޭގައި ރާއްޖޭގެ ޙާލަތު އާންމު ޙާލަތަކަށް ބަދަލު ވެގެންދާނެ ކަމަށް ޞިއްޙީ މާހިރުން ލަފާ ކުރައްވައެވެ.
