ހުރި ހަމައެކަނި ދަރިފުޅާއި ވަކިކޮށްފައިވާ މައެއްގެ އާދޭސް: "އަޅުގަނޑަށް އިންސާފުދެއްވާ!"
މިއީ މާލޭގައި ދިރިއުޅޭ، އެކަނިވެރި މައެއްގެ ވާހަކައެކެވެ. އެހެން އެކަނިވެރި މައިންނާއި ޚިލާފަށް، އޭނާގެ 11 އަހަރުގެ ދަރިފުޅު ހުރީ އޭނާ ގާތަކު ނޫނެވެ.
ދަރިފުޅުގެ ބައްޕައަކީ މާލޭގެ ނަންހިނގާ "ގްރޫޕަކަށް" ނިސްބަތްވާ މީހަކަށްވާތީ، އެތައް ކަމަކުން އޭނާ ވަނީ އޭނާގެ ބާރު ދައްކާ، އަންހެންމީހާ އާއިމެދު އަނިޔާވެރި ވެފައެވެ. އެތައް ގޯނާއެއް ކުރުމަށްފަހު މިހާރު އެފިރިހެންމީހާ ހުރީ އޭނާ އަތުން ދަރިފުޅު ވެސް އަތުލާފައެވެ.
ނަން ހާމަ ނުކުރުމަށް އެދި "ދެން" އަށް މައުލޫމާތު ދެމުން އެއަންހެންމީހާ ބުނީ، އޭނާގެ ދަރިފުޅު ފުރަތަމަ އޭނާއާއި ވަކިކޮށްފައި ވަނީ އެކުއްޖާގެ އުމުރުން ދެ އަހަރާއި ބައިގައި ކަމަށެވެ.
"އެއިރު އަދި ވަރިއެއް ނުކުރޭ. އެކަމަކު އެޕްރޮސެސްގައި އުޅުނީ. އެއީ ރޯދަ މަހެއްގައި. ކުއްޖާގެ ބައްޕަ ހަވީރު ކުއްޖާ ގޮވައިގެން ދިޔައީ ދުއްވާލަން. ކޮންމެ ދުވަހަކު ވެސް އެހެން ބޭރަށް ގެންދަން ފުރުސަތު ދިނިން. އިރުއޮއްސުމުގެ ކުރިން ގެންނަން ވެސް ބުނިން. އެކަމަކު އެރޭ ނުގެނޭ. ގުޅާގުޅާ ފޯނުވެސް ނުނަގާ އެރޭ 20:30 ހާއިރު ބުނީ ދެން ދަރިފުޅެއް ނުދޭނަމޭ، ދެން ނާންނާނޭ. އެއިރު އަޅުގަނޑުގެ ބައްޕަ ވެސް ނެތް ރާއްޖެއަކު." އަންހެން މީހާ ބުންޏެވެ.
އެދުވަހުގެ ހިތްދަތިކަން އެހިސާބަކުން ނުނިމެއެވެ. ހަމަޔަގީނުންވެސް ގޭގައި މީހަކު ނޫޅޭނެ ވަގުތު ބަލާފައި، އަންހެންމީހާގެ ގެއަށް އޭނާގެ ދެ ބޭބެއަކާ އެއްކޮށް ގޮސް އެގެއިން ވަނީ އަގުބޮޑެތި މުދާތަކަކަށް ގެއްލުންދީ، އަނެއްބައި މުދާ ވަގަށް ނަގައިގެން ގޮސްފަައެވެ. އެމީހުން އެތަކެތި ގެންދިޔަތަން އެގޭ ލިފްޓު ކައިރީގައިހުރި ސީސީޓީވީ އިންވެސް ހުރީ ފެންނާށެވެ. ނަމަވެސް ފުލުހުންނަށް މައްސަލަ ޖެއްސުމުން ވެސް އެފުޓޭޖުތައް ވެސް ނުބަލާ ކަމަށާއި މިއަދާއި ހަމައަށް ވެސް އޭގެން އެއްވެސް މުދަލެއް ލިބިފައިނުވާ ކަމަށް އަންހެން މީހާ ބުންޏެވެ.
މުދާތައް ގެއްލުނު ނަމަވެސް، ދެން އެންމެ މުހިންމު ކަމަކަށް އެއިރު އެމީހުން މަސައްކަތް ކުރީ އަންހެންމީހާގެ ދަރިފުޅު އަނބުރާ ހޯދައި ދިނުމަށެވެ. އަދި ޤާނޫނީ ވަކީލެއްގެ އެހީތެރިކަމުގެ ދަށުގައި އަލުން ދަރިފުޅު އަނބުރާ ހޯދުނެވެ. ނަމަވެސް ކުއްޖާގެ ބައްޕައަށް އެކުއްޖާ ދެކެން ބޭނުންވާ ވަގުތުތަކުގައި ދެއްކުމުގެ ޝަރުތާއި އެކުގައެވެ. އެއިރުވެސް އެކަމަކު ކުއްޖާގެ ބައްޕަ ކުއްޖާ ގެއަށް ގެންދަނީ ވަރަށް ލަސްވާފަހުން ކަމުގައި އޭނާ ބުންޏެވެ.
"ދަރިފުޅު ލިބުމަށްފަހު ވަރިވާން ކޯޓަށް ހުށަހެޅީ. އެކޭސް އަށް ވެސް ދިޔަ ގާތްގަނޑަކަށް އަހަރެއްވަރު. ވަރިވީ ފަހުން ކުއްޖާ ގޮވައިގެން ވަރަށް ހާލުގައި ގެންގުޅެން ޖެހުނީ. ޤާނޫނު ބަދަލުވީމަ ވީގޮތް ކަންނޭނގެ. ކުއްޖާ ގޮވައިގެން ބޭރަށް ވެސް ނުއެއް ނިކުމެވޭ އަޅުގަނޑު ކައިރީގައި ހުއްޓަސް. އޭނައަށް ދައްކަން އިންނަ ގަޑީގައި އެބަ ހިފަހައްޓާލާ ދަންވަރު 12 ޖަހާއިރު ވެސް ކުއްޖާ ގެއަށް ނުގެނެސް. ހެނދުނު ސްކޫލަށް ދާން ޖެހޭއިރު ކިހާ އުނދަގޫވާނެ އެހެން ހެދީމަ. ދެން އެގޮތަށް އެއްދުވަހު އަޅުގަނޑު ކުއްޖާ ގޮވައިގެން ބޭރަށް ނިކުމެލި ދުވަހެއްގައި އައިސް ކުއްޖާ އަތުލާފައި، އޭގެ ފަހުން ދަރިފުޅު ނުދިން" އަންހެން މީހާ ބުންޏެވެ.
އޭނާގެ ދަރިފުޅު އަނބުރާ ހޯދުމަށް ވަރަށް ގިނަ މަސައްކަތްތަކެއް އޭނާ ކުރިއެވެ. އެގޮތުން ވަރަށް ގިނަ ފަހަރަށް އެމައްސަލަ ކޯޓަށް ވެސް ޖެއްސި ކަމަށް އޭނާ ބުންޏެވެ. އެގޮތުން ކުއްޖާގެ އުމުރުން ހަތް އަހަރުވުމަށްފަހު ކޯޓަށް ހުށަހެޅުމުން، ގާޒީ ވަނީ ކުއްޖާ ގާތު އެކުއްޖާ ހުންނަން ބޭނުން ވަނީ ކާކު ކައިރީގައިތޯ ސުވާލު ކޮށްފައެވެ. އަދި އެކުއްޖާވަނީ އޭނާގެ ބައްޕަ ކައިރީގައި ހުންނަން ބޭނުންވާ ކަމަށް ބުނެފައެވެ.
"އަސްލުގައި ވަގުތުން ބުނީކީއެއް ނޫން ، ބައްޕަ ގެ ގެއަށޭ ދާނީ. އެއިރުވެސް ދަރިފުޅާއި ބައްދަލު ވެސް ނުވޭ. ކޯޓަށް ގެނެސްފަ އެހީމަ ފުރަތަމަ ދެ ފަހަރު ވެސް ހުރީ ދަރިފުޅު އިސް ޖަހައިގެން. ތިންވަނަ ފަހަރު އެހީމަ ބުނީ ޑޭޑް ހައުސް އަށޭ ދާނީ." ވަރަށް ދެރަވެފައި ހުރެ އަންހެން މީހާ ކިޔައިދިނެވެ.
ދަރިފުޅު ދެކިލަން ބޭނުންވާނަމަ އެއިރު އޭނާ ދަނީ ސްކޫލު ކައިރިއަށެވެ. ގޮސް ދުރުދުރުން ދަރިފުޅު ދެކިލާފައި ހިތްހަމަ ޖައްސާލައިގެން ހުންނަނީ އެވެ.
ދަރިފުޅު ދައްކާނެ ކަމަށް މިއަހަރު ފެށުނު ދުވަހު ބުނުމުން، ވަރަށް އުންމީދާއެކު އޭނާ އެދުވަހު ދަރިފުޅުގެ ބައްޕަގެ ގެއަށް ބައިވަރު ހަދިޔާއާއެކު ދިޔައެވެ. ނަމަވެސް ސިޑިން މައްޗަށް އަރަނިކޮށް އިވުނީ ފުލުހުން އަންނަ އަޑެވެ.
"އަޅުގަނޑުގެ މުޅި ޙަޔާތުގައި ވެސް ފުލުހަށް ގެންދިޔަ ދުވަސް އެއީ. ކުއްޖާގެ ބައްޕަ އަޅުގަނޑު ކައިރީގައި އަންނާށޭ ބުނެފައި ފުލުހަށް މައްސަލަ ޖެއްސީ އަޅުގަނޑު އެގެއަށް އޭނަގެ ހުއްދަ ނެތި ވަނީ ކަމަށް ބުނެ. އަޅުގަނޑު ދެއްކިން މެސެޖުތައް ވެސް. ނަމަވެސް ފުލުހުން ދިޔައީ އަަޅުގަނޑު ގޮވައިގެން" ހިތާމައިން ފުރިގެންވާ ހާލު އަންހެންމީހާ ކިޔައިދިނެވެ.
މިހާރު ވެސް އޭނާ މަސައްކަތް ކުރަނީ ހުރި ހަމައެކަނި ދަރިފުޅާ ބައްދަލު ކޮށްލެވޭތޯއެވެ. ނަމަވެސް އެކަމަށް އެދި ޖޫން މަހުގައި ވެސް ހުށަހެޅި މައްސަލަ، ބެލެން ނެތް ކަމަށް ބުނެ މިދިޔަ ބުރާސްފަތި ދުވަހު ކޯޓުން ވަނީ އޭނާއަށް އެހިތާމަވެރި ޚަބަރު ދީފައެވެ.
މިއީ އިންސާފަށް އެދި، ދަރިފުޅު ދެކިލުމަށް ހިތްވަރާއެކު މަސައްކަތް ކުރަމުންދާ މައެއްގެ ވާހަކައެވެ.
މިހުރީ މިރާއްޖޭގެ ހާލަތު ހުރިގޮއް މިކަހަލަ ކިތަންމެ ކަމެއް އިންސާފު ލިބޭނެ ހަމަ އެއްގޮތެއްވެސް ނެއް ،