ނުރައްކާތެރިކަން އިންތިހާއަށް : ކޮވިޑް19ގެ ދެވަނަ ރާޅެއް ، ޔޫރަޕަށް!
މިއަހަރުގެ ކުރީކޮޅު ޔޫރަޕްގައި ހަލުވި ކަމާއެކު ފެތުރުނު ކޮވިޑް19 ގެ ބަލިމަޑުކަމަށް ލުއިކަން ލިބުމަށްފަހު އަނެއްކާ ވެސް އެ ބަލިމަޑުކަމުގެ ދެވަނަ ރާޅަކާ ދިމާއަށް މިސްރާބު ޖަހާފައިވާ ކަމަށް ޞިއްޙީ މާހިރުން ބުނަން ފަށައިފިއެވެ.
ބަލި ކޮންޓްރޯލް ކުރުމަށް ޓަކައި އެޅި އެކި ފިޔަވަޅު ތަކުގެ ސަބަބުން ވޭތުވެ ދިޔަ ތަނުގައި ޔޫރަޕުން ފައްސިވާ ވަރު ވަނީ ވަރަށް ބޮޑަށް ދަށް ވެފައެވެ. ނަމަވެސް މިއަދަދުތައް އަނެއްކާ ވެސް ވަނީ މައްޗަށް ޖަހާފައެވެ. ކޮވިޑްގެ ނުރައްކާތެރިކަން އަލުން ފެށުނު ފްރާންސް، މޯލްޓާ، ހަންގޭރީ، ބެލްޖިއަމް އަދި އޮސްޓްރިއާއާއި ޗެކްރިޕަބްލިކް ފަދަ ގައުމުތަކުން ފައްސި ކޭސްތައް ފެންނަ މިންވަރު މިވަނީ އިތުރުވާން ފަށާފައެވެ. އެގޮތުން މިމަހުގެ 12 ވަނަ ފްރާންސުން 10،000 އަށް ވުރެ ގިނަ މީހުން ފައްސިވެ އެ ދުވަހަކީ ފްރާންސުން އަދި މިހާތަނަށް އެންމެ ގިނަ މީހުން ފައްސިވީ ކަމަށް ރެކޯޑް ކުރެވުނު ދުވަހެވެ.
ޔޫރަޕުން ފައްސި ކޭސްތައް އިތުރުވާ ސަބަބުތަކެއް ކަމަށް ފަންނީ މާހިރުން ފާހަގަ ކުރައްވާފައިވަނީ މައިގަނޑު ދެ ސަބަބެކެވެ. އެއްކަމެއްގެ ގޮތުގައި ފާހަގަ ކޮށްފައިވަނީ އަހަރުގެ ކުރީކޮޅު ޓެސްޓް ކުރެވޭ މިންވަރު މަދުވުމާއެކު މިހާރު އެއަދަދު އެތައް ތަނަކުން އިތުރުވުމެވެ. އަނެއް ކަމަކީ ލޮކްޑައުން އަށް ފަހު ލިބުނު ލުޔާއެކު މީހުންގެ ދިރިއުޅުމަށް އައި ބަދަލެވެ. އެއްވެ އުޅުމާއި ގިނަ މީހުން ބައިވެރިވާ ހަރަކާތްތައް އިތުރުވުމެވެ.
ޔޫރަޕަށް ދިމާވެފައިވާ މި ބިރުވެރިކަމުން އަރައިގަތުމަށް ދެވަނަ ލޮކްޑައުން އަކަށް ދިޔުމަށް ބައެއް ފަރާތްތަކުން ގޮވާލި ނަމަވެސް އިގްތިސާދީ އަދި ޞިއްޙީ މާހިރުން ފާހަގަ ކުރައްވަނީ އެއީ އެގައުމުތަކަށް ކެތްކުރެވޭނޭ ކަމެއް ނޫން ކަމަށެވެ. ސަބަބަކީ މިހާރު ވެސް އިގްތިސާދަށް އެތައް ގެއްލުންތަކެއްވެ އެތައް ބައެއްގެ ވަޒީފާ ގެއްލި ، އާމްދަނީ ލިބޭނެ ގޮތެއް ނެތި ނިކަމެތި ވެފައިވުމެވެ، އެހެންކަމުން މިކަމަށް އޮތް ހަމައެކަނި ހައްލަކީ ލޮކްޑައުންއަކަށް ނުގޮސް ރައްކާތެރިކަމުގެ ފިޔަވަޅުތައް ވަރުގަދަ ކުރުން ކަމަށް ފަންނީ މާހިރުންނާ ހަވާލާދީ ބޭރުގެ މީޑިއާތައް ރިޕޯޓްކޮށްފައި ވެއެވެ،
