ޕޮލިސް އެކެޑަމީގެ މަސައްކަތަށް އައި 53 މީހަކު ކޮވިޑް-19 އަށް ފައްސިވެއްޖެ
އިންޑިއާ ސަރުކާރުގެ އެހީގައި އައްޑޫ ސިޓީގައި އިމާރާތް ކުރަމުން އަންނަ ޕޮލިސް އެކަޑެމީގެ މަސައްކަތް ކުރުމަށް އިންޑިއާއިން އައި 53 މީހަކު ކޮވިޑް-19 އަށް ފައްސި ވެއްޖެއެވެ.
މި އިމާރާތް ކުރުމުގެ މަސައްކަތް ކުރުމަށް ޓަކައި އައްޑޫއަށް އިންޑިއާގެ ކޮޗިން އިން ޖުމްލަ 128 މީހުން ވަނީ ރާއްޖެ އައިސް އައްޑޫގައި ކަރަންޓީނުވެފައެވެ.
އައްޑޫ އިކުއިޓޯރިއަލް ހޮސްޕިޓަލާއި ހަވާލާދީ އޮންލައިން ނޫހެއް ކަމަށްވާ "ވަގުތު" ގައި ރިޕޯޓުކޮށްފައިވާ ގޮތުގައި އެ މަސައްކަތަށް އައި މީހުންގެ ތެރެއިން 53 މީހަކު ވަނީ ކޮވިޑަށް ފައްސިވެފައެވެ.
އެގޮތުން ކަރަންޓީނު ނިންމުމަށްފަހު ހެދި ޓެސްޓުތަކުން މި 53 މީހުން ފިޔަވައި އެހެން އެންމެންގެ ނަތީޖާ ވަނީ ނައްސިވެފައެވެ.
ބައްޔަށް ފައްސިވީ މީހުން މީހުން ގަމުގައި ހުންނަ ދޫގަސްގައި ބައިތިއްބާފައިވާއިރު އޭގެން އެއްވެސް މީހެއްގެ ގައިން އަދި ބަލީގެ އަލާމާތެއް ފެނިފައެއް ނުވެއެވެ.
އައްޑޫ ސިޓީގައި ހޮނިހިރު ދުވަހާއި އާދީއްތަ ދުވަހު ރެންޑަމް ސާމްޕަލްތަކެއް ނަގާފައިވާއިރު ނެގި 272 ސާމްޕަލްވެސް ކޮވިޑް-19 އަށް ނައްސިވެފައި ވާކަން ފާހަގަ ކުރެވެއެވެ. ރާއްޖޭގައި ކޮވިޑް-19 ޖެހޭ މީހުންގެ އަދަދު މިހާރު މަދުވަމުން އަންނަކަން ވެސް ފާހަގަ ކޮށްލެވެއެވެ.
